Ifya Kulanda pa Kushalika Magazini

Ulupungu lwa kwa Kalinda October 1

“Abengi balatwishika nga ca kuti Lesa alabikako amano ilyo tulesakamikwa no kuloosha. Nga imwe mutontonkanyapo shani? [Lekeni basuke. Lyena belengeni Amalumbo 34:18.] Icipande icitendekele pe bula 19 cilelanda pa fyo Lesa atwafwa nga twafupulwa pa mulandu wa kuti tuleimona kwati tuli ba cabe cabe, nangu natubipilwa sana, no kumfwa sana ububi pa cabipa ico tucitile.”

Loleni! October–December

“Imikalile shino nshiku ilelenga abantu ukusakamana sana. Abaleka ukubomba baba fye abafuupuka, na babomba balasakamana ukuti bakabafumya incito. Bushe mulemona ukuti aya mashiwi yalembwa apa kuti yatwafwa ukukanasakama sana? [Belengeni Mateo 6:34. Lyena lekeni basuke.] Iyi magazini ilelanda pa fintu fimo ifingatwafwa ukwishiba ifya kubomfya bwino indalama no kukanasakama.”

Ulupungu lwa kwa Kalinda November 1

“Bonse tulafwaya ukuteeka imitima mu mikalile yesu. Bushe mulemona ukuti pa kuti tuteeke imitima kano fye natukwata indalama? [Lekeni basuke.] Umuntu umo uwalembeleko Baibolo alisambilile ifya kuteeka umutima lintu akwete fye utuntu utunono. [Belengeni Abena Filipi 4:11, 12.] Iyi magazini ilelanda pa fintu fisano ifyaba muli Baibolo ifingalenga umuntu ukuteeka umutima.”

Loleni! October–December

“Bushe abanakashi balingile ukulasambilisha mu cilonganino? [Lekeni basuke.] Umfweni ifyo Baibolo yalandapo pa mwanakashi umo. [Belengeni Abena Roma 16:1.] Lelo, ilembo limbi litila abanakashi bafwile ukwikala tondolo mu cilonganino. Nomba, ninshi cinshi Baibolo isambilisha mu cine cine? Ici cipande icilelondolola bwino imilimo abanakashi bengabombako.” Balangeni icipande icitendekele pe bula 14.