Mulepashanya Bakasesema—Yoele
1. Kuti twaba shani abaiceefya nga Yoele ilyo tuleshimikila?
1 Bushe kasesema Yoele ali ni nani? Ico Yoele alandapo fye mwi buuku lyakwe ca kuti ali ni “mwana Petuele.” (Yoele 1:1) Uyu kasesema uwaiceefya alelanda sana pa bukombe bwa kwa Yehova, talelanda pa mulimo alebomba uwa kusesema. Ifi fine e fyo na ifwe tucita ilyo tuleshimikila. Mu nshita ya kulafwaya ukuti abantu baletutasha, tufwaya abantu baishiba Yehova no kubasambilisha Icebo cakwe. (1 Kor. 9:16; 2 Kor. 3:5) E lyo kabili imbila nsuma tubila ilalenga tukose. Finshi fimo fimo ifyaba mu busesemo bwa kwa Yoele ifingatulenga twacincila no kuba ne subilo muno nshiku?
2. Bushe ukwishiba ukuti ubushiku bwa kwa Yehova nabupalama nga nshi kufwile ukutucincisha ukucita cinshi?
2 “Ubushiku bwa kwa Yehova Buli Mupepi.” (Yoele 1:15): Nangula apo balembeele aya mashiwi napapita imyaka iingi nga nshi, ukufikilishiwa kwa kulekeleshako kulecitika muno nshiku. Ifi ifintu mu calo fileya filebipilako, ne fi abantu batupumya no kukaana ukumfwa ku mbila nsuma mu ncende tushimikila, filangilila fye ukuti cine cine tuleikala mu nshiku sha kulekelesha isha cino calo cabipa. (2 Tim. 3:1-5; 2 Pet. 3:3, 4) Nga twatontonkanya pa fyo impela ya calo ipaleme nga nshi, ukwabula no kutwishika tulafwaisha ukubika umulimo wa kushimikila intanshi mu bumi bwesu.—2 Pet. 3:11, 12.
3. Mulandu nshi ukushimikila kucindamine maka maka ilyo tulepalamina ku bucushi bukalamba?
3 “Yehova Akaba Ubucingo ku Bantu Bakwe.” (Yoele 3:16): Ukutenkana balandapo pali ili lembo kulosha fye ku nshita ilyo Yehova akaleta ubupingushi mu nshita ya bucushi bukalamba. Tulakoseleshiwa ukwishiba ukuti ilyo ifi fikalacitika Yehova akapususha ababomfi bakwe abacishinka. (Ukus. 7:9, 14) Ilyo tulebomba umulimo wa kushimikila tulamona ifyo Yehova atusakamana no kutukosha, ici cilenga icitetekelo cesu ukukoselako no kulenga tuleshipikisha, kabili ifi fine e fikatwafwa ilyo kukaba ubucushi bukalamba.
4. Mulandu nshi tulingile ukusekelela no kucetekela Yehova ilyo tulelolela ifikacitika?
4 Nangu ca kuti imbila Yoele alebila yumfwika kwati ya bulanda ku bantu bamo, ku bantu ba kwa Lesa bena yalilenga bakwata isubilo lya kuti bakalubuka. (Yoele 2:32) E ico, natulecetekela ukuti Yehova akulatwafwa mu nshiku ishileisa, kabili natulecincila ukushimikila imbila nsuma iya Bufumu bwa kwa Lesa ilyo tulekonka amashiwi yaba pali Yoele 2:23 ayatila: “Samweni no kusekelela muli Yehova Lesa wenu.”