Umukululo Wa Mepusho

◼ Bushe nkashi alingile ukufwala icitambala nga ali na kasabankanya umwaume pa kutungulula isambililo lya Baibolo ilya pa mwinshi?

Kasabankanya umwanakashi nga aletungulula isambililo lya Baibolo e lyo na kasabankanya umwaume epo ali, ninshi umwanakashi afwile ukufwala icitambala. (1 Kor. 11:3-10) Ulupungu lwa kwa Kalinda ulwa July 15, 2002, pe bula 27, lwalondolwele ukuti: “Iyi ni nshita yatantikilwa libela ku kusambilisha iyo uuletungulula isambililo e utungulula fyonse pe sambililo. Nga cabe fi, isambililo liba lubali lwa cilonganino. Nga umwanakashi Nte uwabatishiwa aletungulula ilyo isambililo e lyo no mwaume Nte uwabatishiwa e po ali, afwile ukufwala icifimbo ku mutwe.” E fyo cifwile ukuba lyonse nampo nga isambililo libela mu ng’anda, pa mwinshi fye nelyo libela ku cifulo cimbi.

Lelo kwena isambililo lya Baibolo ilibela pa mwinshi nga talilapampamikwa, nkashi takabilwa ukufwala icitambala nangu ca kuti ali na kasabankanya umwaume, nampo nga balebwelela mu kulanga umwine wa ng’anda ifyo tusambilila Baibolo nelyo mu kulanshanya fye ifyebo ifyaba mu mpapulo sha kusambililamo. Apo ilingi kulaba ukubwelelako imiku ne miku pa kuti isambililo lya Baibolo ilya pa mwinshi lipampamikwe, bakasabankanya balingile ukumona ilyo cingalinga ukutendeka ukufwala icitambala.