Amepusho Ukufuma Ku Babelenga

Kuti twacita shani pa kwafwa bamunyinefwe abalwaala nga bapeema icena ca mafuta ya kuisansa?

Abantu bamo nga bapeema icena ca mafuta ya kuisansa balalwala. Te lyonse bengaicingilila ku cena ca mafuta ya kuisansa pantu balakumana na bantu abaisansa amafuta yakwata icena icibalwalika. Lelo bamunyinefwe bamo balepusha nga kuti caba fye bwino ukweba bamunyina na bankashi ukuleka ukuisansa aya mafuta pa kulongana kwa cilonganino, pa kulongana kwa muputule na pa kulongana kukalamba.

Kwena, takwingaba Umwina Kristu uwingatemwa nga ca kuti abantu bafilwa ukulongana bwino pa mulandu wa kuti naisansa amafuta ayakwata icena icibalwalika. Ilyo tuli pa kulongana, ifwe bonse tufwaya ukuti bambi batukoseleshe. (Heb. 10:24, 25) Kanshi nga icena ca mafuta ayo bamo baisansa cilamulwalika ica kuti mulafilwa no kulongana bwino, kuti cawama mwalanshanya na baeluda. Nangu ca kuti Baibolo tayalesha nelyo te kuti cibe bwino ukupanga amafunde pa mafuta ayo abaleisa mu kulongana bafwile ukulaisansa, baeluda bafwile ukweba aba mu cilonganino pa kuti baishiba ukuti bambi mu cilonganino balalwala nga bapeema icena ca mafuta ya kuisansa. Pa kwafwa icilonganino, baeluda kuti babomfya ifyebo ifyaba mu mpapulo shesu mu lyashi lya kukabila kwa pa mwenu mu Kulongana kwa Mulimo, nelyo kuti babilisha ukwabula ukukalifya bambi mu cilonganino pa fyo balingile ukulabomfya amafuta ya kuisansa.a Na lyo line, baeluda tabalingile ukulabilisha pali ili lyashi cila nshita. Pa kulongana kwesu lyonse palaba abapya nelyo abeni abashaishiba ubu bwafya, kabili tufwaya ukuti baleumfwa bwino ukulongana na ifwe. Tatufwile ukulenga bambi balamona ukuti nabalufyanya pa kuisansa amafuta ya cena nga ca kuti nabaisansa mu kulinga.

Nga ca kuti kwaliba abalwala mu cilonganino kabili nga kuti caba fye bwino, baeluda kuti baeba abalwaala nga bapeema icena ca mafuta ya kuisansa ukulaikala beka mu Ng’anda ya Bufumu. Ku ca kumwenako Ing’anda ya Bufumu nga yalikwata umuputule, e mo bengalaikala no kukutika ku kulongana. Nga ca kuti ubwafya te kuti bupwe kabili bamo bacili balalwala nga bapeema icena ca mafuta, icilonganino kuti calakopa ukulongana pa kuti abakwata ubu bwafya baleumfwako nelyo kuti bapekanya ukuti balekutika ku kulongana pa foni pa mayanda yabo, nga filya abashisangwa ku kulongana pa mulandu wa kulwalila bakutika ku kulongana.

Pali ino nshita, mu Ubutumikishi Bwesu Ubwa Bufumu balakoselesha aba bwananyina ukulalangulukila bambi pa kukanalaisansa sana amafuta ayakwata icena icingabalwalika ilyo balesangwa ku kulongana kwa citungu. Apo abantu abengi balongana pamo pa kulongana kwa citungu, abalesangwa kuli uku kulongana bafwile ukuisansa mu kulinga amafuta ayakwata icena icingalwalika bambi. Lelo ukucita ifi, takufwile kwaba lifunde pa kulongana kwa cilonganino kabili aba mu cilonganino tafwile balemona ukuti lifunde.

Apo twikala mu nshita iyayafya, ifwe bonse tulacula pa mulandu wa lubembu ulo twapyana. Kanshi tulatasha ukubombesha kwa bamunyinefwe abatwafwa ilyo tulecula! Bamunyinefwe bamo bakaitemenwa ukuleka ukuisansa amafuta ayalwalika bambi pa kuti fye bamunyinefwe abalwaala nga bapeema icena ca mafuta ya kuisansa balesangwa ku kulongana. Lelo ukutemwa aba bwananyina e kukalenga ukuti tucite ifi.

Bushe kwaliba ifyalembwa fimbi ifilanga ukuti Ponti Pilato e ko aali?

Ababelenga Baibolo balishiba Ponti Pilato pa mulandu ne fyo acitile ilyo balelubulwisha Yesu no kumwipaya. (Mat. 27:1, 2, 24-26) Lelo ishina lyakwe lilasangwa imiku iingi na mu fyalembwa fimbi ifya kale. Icitabo cimo (The Anchor Bible Dictionary) citila ifyalembwa fyonse ifya kale ifyalanda pali Ponti Pilato “fingi kabili fyalimulondolola bwino sana ukucila ifyo fyalondolola bakateka bambi aba bena Roma abaleteka mu Yudea.”

Ishina lya kwa Pilato lilasangwa imiku iingi mu fyalembwa fya kwa Josephus umuYuda uwalelemba ilyashi lya kale, uwalembele na pa fintu fitatu ifyacitike ifyalengele Pilato akwate amafya ilyo aleteka Yudea. Philo umuYuda uwalelemba ilyashi lya kale na o alandile pa cacitike icalenga bune. Kalemba umwina Roma, Tacitus uwalembele pali bakateka abena Roma, alembele ukuti Ponti Pilato e wapeele icipope ca kuti bepaye Yesu ilyo Tiberi aleteka.

Mu 1961, abashula ifya kushulashula, abalebombela mu cikuulwa ca fyangalo icali mu Roma mu Kaisarea, ku Israel, basangile ilibwe ilyapaapaatala apalembwa ishina lya kwa Pilato mu ciLatin. Ifilembo ifyo balemba pali ili ilibwe fyalifutikako lelo cimoneka kwati fyalembelwe ukuti: “Cino cikuulwa ca kwa Tiberi capeelwa kuli balesa abo Ponti Pilato, umulashi wa mu Yudea acindika.” Ici cikuulwa balelandapo nalimo cali litempele ilyo balecindikilako Kateka wa bena Roma Tiberi

Bushe nkashi afwile ukufwalako icitambala nga aletungulula isambililo lya Baibolo apali na munyina uwabatishiwa?

Icipande ca “Amepusho Ukufuma ku Babelenga” icali mu Ulupungu lwa kwa Kalinda ulwa July 15, 2002, calandile ukuti nkashi afwile ukufwalako icitambala ku mutwe nga aletungulula isambililo lya Baibolo apali na munyina nampo nga ni kasabankanya uwabatishiwa nelyo iyo. Pa numa ya kulanshanyapo na kabili pali ili lyashi twamwene ukuti tufwile ukwalulako panono ifyo twalandile muli ici cipande.

Nga ca kuti nkashi ali na munyina uwabatishiwa ilyo aletungulula isambililo lya Baibolo, afwile ukufwalako icitambala. Nga afwalako icitambala ku mutwe ninshi alecindika bumutwe ubo Yehova abikako mu cilonganino ca Bena Kristu, pantu alebomba umulimo uo munyina afwile ukubomba. (1 Kor. 11:5, 6, 10) Nga ca kuti takwete icitambala, nkashi kuti aeba munyina ukutungulula isambililo nga ca kuti nafikapo kabili nga naipekanya.

Lelo nga ca kuti nkashi ali na munyinefwe uushabatishiwa uushili mulume wakwe ilyo aletungulula isambililo lya Baibolo ilyo atungulula lyonse, ukulingana na Malembo ninshi tafwile ukufwala icitambala ku mutwe. Lelo nangu cibe ifyo, bankashi bamo kampingu yabo kuti yabeba ukufwalako cimo ku mutwe ilyo baletungulula isambililo lya Baibolo na munyinefwe uushabatishiwa.