Icipande Icitwafwa Sana mu Mulimo wa Kushimikila
1. Cinshi balembela icipande citila, “Ukulanshanya Ilyashi lya mu Baibolo”?
1 Mu nshita mu nshita, mu Ulupungu lwa kwa Kalinda ulwa bantu bonse mulaba icipande citila, “Ukulanshanya Ilyashi lya mu Baibolo.” Ico balembela ici cipande kulondolola amasambililo ya mu Baibolo mu nshila iingalenga umuntu ukutemwa icine e lyo no kutulanga ifyo twingapelulushanya mano mano na bantu pa malyashi yamo. (1 Pet. 3:15) Nomba kuti twabomfya bwino shani ici cipande?
2. Kuti twabomfya shani ici cipande mu mulimo?
2 Mulebomfya Ici Cipande mu Mulimo: Kuti cawama nga mulekwatako magazini ya Ulupungu lwa kwa Kalinda iyafulilako iikwata ici cipande. Ilyo umwine wa ng’anda, umuntu umbi uulefwaya ukumfwa icine, nelyo umusambi wa Baibolo aipusha icipusho nelyo aleta ilyashi ilyo balandapo kale muli ici cipande, kuti mwamupeela magazini umuli ilyo line lyashi kabili mwebeni ukutila kuti mwatemwa ukulanshanya nankwe. Nga tamukwete magazini umuli ili lyashi, kuti mwakopolola ico cipande pa Intaneti pa adresi yesu iya jw.org.
3. Kuti twalanshanya shani ici cipande no mwine wa ng’anda?
3 Kuti twalanshanya shani na bantu ukubomfya ici cipande? Bamo baleeba umuntu baleshimikila ukubelenga amashiwi ya mwine wa ng’anda e lyo bena balebelenga amashiwi ya kwa Nte. Balisanga ukuti iyi nshila yaliba bwino pantu ilalenga umuntu baleshimikila ukusambilila ifyo twasuminamo ukwabula ukumfwa kwati tulemusambilisha.—Amala. 32:2.
4. Kuti twabomfya shani ici cipande ku kuisambilisha?
4 Isambilisheni no Kusambilishako Bambi: Ilyo mulebelenga muli ici cipande, moneni amalembo ne filangililo ifilimo, e lyo ne nshila balebomfya pa kupelulula. Bikeni amano ku milandile balebomfya pa kulanshanya. Kabili esheni ukucita cimo cine ilyo muleshimikila. (Amapi. 1:5; 9:9) Nkashi umo atile, “Nga ulebelenga ifi fipande ciba kwati ulebomba na painiya ‘uwafikapo’ uwaishiba ukwasuka ifipusho fyonse kabili ulesambililako ifya kucita!”
5. Kuti twa-afwa shani abasambi besu aba Baibolo ukuipekanya ilyo bashilaya mu mulimo?
5 Kuti mwabomfya ici cipande na ku kwafwa abasambi ba Baibolo ukuipekanya ilyo bashilaya mu mulimo. Belengeni ifi fyebo capamo nabo, kabili lekeni umusambi e o abe kasabankanya. Muli iyi nshila, abasambi ba Baibolo balabeelesha ukulondolola ifyo basuminamo ukwabula ukukalifya abo balelanshanya nabo. (Kol. 4:6) Ala mwandini ici cipande caba pa fintu ifyo Yehova atupeela pa kuti ‘tulebombesha’ mu mulimo wesu.—2 Tim. 4:5.