Mulepashanya Bakasesema—Mika
1. Cipusho nshi Mika nalimo aletontonkanyapo, kabili mulandu nshi twingalandila ukuti taicushishe fye ukubila ubukombe Lesa amutumine?
1 ‘Bushe ni lilali cino calo cabipa cikapwa?’ Kasesema Mika na o afwile aletontonkanyapo sana pali ici cipusho ilyo alebila ubupingushi bwa kwa Yehova pa bufumu bwa Israele na Yuda. Mika alicetekele ukuti ubukombe alebila bwali bwa cine kabili alishibe ukuti bwali no kufikilishiwa. Na cine mu 740 B.C.E., ifyo Yehova asobele ukuti e fyali no kucitikila Samaria fyafikilishiwe kabili Mika alimweneko. (Mika 1:6, 7) Pa numa, mu 607 B.C.E., umusumba wa Yerusalemu na o walyonawilwe. (Mika 3:12) Kuti twapashanya shani Mika ilyo tulelolela ukonaulwa kwa cino calo cabipa?
2. Kuti twalanga shani ukutekanya ilyo tulelolela ubushiku bwa kwa Yehova kabili mulandu nshi?
2 Tufwile Ukutekanya: Mika alembele ukuti: “Ine nakulalolela Yehova. Nakulalindilila Lesa we pusukilo lyandi.” (Mika 7:7) Ilyo Mika alelolela impela taikele fye, lelo atwalilile ukubila ubukombe bwa kwa Lesa. Kanshi ilyo tulelolela ubushiku bwa kwa Yehova, tulingile “ukuba ne mibele ya mushilo ne milimo ya bukapepa.” (2 Pet. 3:11, 12) Yehova alitekanya kabili ici cilenga abantu baba ne shuko lya kulapila. (2 Pet. 3:9) Kanshi na ifwe tufwile ukulaumfwila ifyo Baibolo itucincisha ukuti tuleba abatekanya nga bakasesema.—Yako. 5:10.
3. Mulandu nshi tufwile ukulombela Yehova ukuti aletupeela umupashi wa mushilo?
3 Mulecetekela Ukuti Yehova Akamwafwa: Umulimo Mika alebomba tawali uwayanguka, lelo alicetekele ukuti Yehova ali no kumupeela amaka ya kubomba. (Mika 3:8) E mulandu wine Icebo ca kwa Lesa citwebela na ifwe ukuti tufwile ukucetekela ukuti Yehova akatupeela amaka ya kubomba umulimo atupeela. Yehova alapeela amaka ku bantu bakwe abaleumfwa ukunaka pa kuti babombe bwino imilimo abapeela. (Amalu. 84:5, 7; Esa. 40:28-31) Bushe na imwe mulomfwa ukuti Yehova alamukosha ilyo mulemubombela? Bushe lyonse mulapepa kuli Yehova ukuti amupeele umupashi wakwe?—Luka 11:13.
4. Finshi twingasambilila kuli Mika?
4 Ico Mika abikileko sana amano mu bumi bwakwe, kucita ukufwaya kwa kwa Lesa. Apampamine pa kutwalilila uwa bucishinka nangu ca kutila abantu abaliko pali ilya nshita balecita ifyabipa nga nshi. E fyo caba na kuli ifwe, cila bushiku kulaba ifingi ifyesha icitetekelo cesu. Kanshi natupampamine fye pa “kulaendela mwi shina lya kwa Yehova Lesa wesu umuyayaya umuyayaya.”—Mika 4:5.