Umukululo wa Mepusho

◼ Finshi abana bafwile ukusambilila pa kuti baba bakapepa abakosa?

Abafyashi Abena Kristu baleesha sana ukukusha abana “ukulingana no kusalapula kwa kwa Yehova no kukonkomesha kwakwe.” (Efes. 6:4) Ku ca kumwenako, abafyashi balisanga ukuti cilawama sana ukubebeta ilembo na bana babo cila lucelo. Pa mapepo ya lupwa na pa nshita shimbi, abafyashi na bana kuti batamba vidio no kulanshanyapo, kuti balanshanya na pa fyebo fimo mu citabo ca Abacaice Bepusha nangu ukucita icilangililo ca lyashi lya mu Baibolo, nelyo ukupituluka mu fyo bengalondolola ifyo basumina. Lelo, pa kuti abana ‘balole ku bukalamba,’ abafyashi tabafwile ukubasambilisha fye ifya mu Baibolo ifyayanguka.—Heb. 6:1.

Tontonkanyeni pa fyo tusambilisha abantu Baibolo. Ilyo twalanda nabo pa muku wa kubalilapo nelyo ilyo twabwelelako, ilingi line tufwaya ukutendeka isambililo lya Baibolo mu citabo ca Bushe Cinshi Baibolo Isambilisha? Nga twapwa ukubasambilisha muli ici icitabo, tubomfya icitabo ca “Ikalilileni mu Kutemwa kwa kwa Lesa.” Mulandu nshi? Icitabo ca Baibolo Isambilisha cilaafwa abasambi ukwishiba amasambililo ya kutendekelako aya mu Baibolo. Icitabo ca “Ikalilileni” cilabasambilisha ukukonka ifishinte fya mu Baibolo. Abasambi nga basambilila muli ifi ifitabo fibili ‘balalimbwa’ muli Kristu kabili balaba ne “citetekelo icakosa.” (Kol. 2:6, 7) Ifi ifitabo kuti fya-afwa na bana benu. Nabo balingile ukwishiba icilubula, Ubufumu ne fyo abafwa baba. Abana balingile no kwishiba ico Lesa asuminishisha ifyabipa ukucitika e lyo ne filanga kuti tuli mu nshiku sha kulekelesha. Bafwile ukushininkisha ukuti ba Nte e baishiba icine. Abacaice balingile no kwishiba ifishinte fya mu Baibolo e lyo no ‘kukwata amano’ aya kulekanya icisuma ne cibi. (Heb. 5:14) Na lyo line, abafyashi balingile ukutontonkanya pa mushinku wa bana pa kuti babasambilisha ifyebo ifyo bengomfwa. Abana abengi kuti basambilila no kumfwa amasambililo ayakosa aya mu Baibolo na lintu bali abaice sana.—Luka 2:42, 46, 47.