Ifyo Mwingalacita pa Mapepo ya Lupwa
1. Cinshi balembela ifipande fimo mu mpapulo shesu?
1 Mu mpapulo shesu ishingi, mulaba ifipande fimo ifingafwa abana na bafyashi ukulalanshanya sana no kupalama kuli Yehova. (Amala. 6:6, 7) Bushe kuti mwabomfya shani ifi fipande ku kusambilisha abana benu?
2. Kuti mwasala shani ifyebo ifingalinga ukusambilila na bana benu ukulingana ne myaka bakwete?
2 Mulesala Bwino Ifya Kubasambilisha: Bushe kuti mwasala shani ifyebo ifingalinga ukusambilila na bana benu ukulingana ne myaka bakwete? Muleibukisha ukuti abana balipusanapusana. (1 Kor. 13:11) Kanshi ilyo mulesala ifya kusambilisha abana kuti cawama mwayipusha amuti: ‘Finshi abana bandi bengatemwa ukusambililapo? Bushe ifi fyebo kuti bafyumfwa? Bushe kuti bakutika pa mamineti yanga?’ Nga mulelanshanya no mwana uushilafisha imyaka ine, kuti mwabomfya amalyashi yaba palya balemba ati “Amasambililo ya mu Baibolo” pa jw.org. Indupwa shimbi balatemwa ukusambilila amalyashi ya mu Baibolo ayaba palya balemba ati “Fundeni Abana Benu.” Na kabili kuti mwaesha ukucita ifyakonkapo.
3. Finshi fimbi ifyo mwingacita pa mapepo ya lupwa?
3 Indupwa shimo babomfya inshita ya mapepo ya lupwa ku kupekanya ukulongana. Kwena tacabipa ukupekanya ukulongana pa mapepo ya lupwa, lelo kwaliba na fimbi ifyo mwingacita. Ilyo muli pa mapepo ya lupwa, tamufwile ukulacita kwati muli pa kulongana pa Ng’anda ya Bufumu. Lelo inshita ya mapepo ya lupwa ifwile ukuba ni nshita ya kuti uuli onse mu lupwa aleyumfwa fye umuntungwa ukulanda fyonse ifyo aletontonkanya. Kabili ifwile ukuba ni nshita iyo mwingabomfya ku kwelenganya ifyalecitika ku bantu abalembwa mu Baibolo no kulanshanyapo. Nga filya fine ukupanda ubuci kwayafya, ukwishiba ifyo umwana aletontonkanya nako takwayanguka, lelo tukabila ukubombesha. Tufwile ukulatungulula bwino amapepo ya lupwa ica kuti onse mu lupwa aleumfwa bwino.
4. Fintu nshi fimo ifyo abafyashi bengacita pa mapepo ya lupwa?
4 Mwe Bafyashi—Mulebomfya Inshila Shalekanalekana: Nga mulesambilisha abana abanono kuti mwabomfyako ifi:
• Kuti mwapekanya ukwangalako icangalo ca mu Baibolo. Ku ca kumwenako, kuti mwaeba umwana ukufwala nga umo uwalembwa mu Baibolo, no kutendeka ukumupashanya, lyena kuti mwaipusha abana bambi ukutunganya uo alepashanya.
• Ifikope fya kulenga ifiba mu mpapulo shesu. Muli Loleni! ya ciNgeleshi mulaba ifikope ifyo abana benu bengapenta. Pali ifi fikope tapaba amashiwi. Nga bafipenta, kuti mwafikakatika na mu ng’anda nga mulefwaya.
• Mulecita ifingalenga abana ukulaelenganya amalyashi ya mu Baibolo. Ku ca kumwenako, kuti mwaeba abana ukushimika ifyo baletontonkanya ukuti e fyo Noa, Mose, Yosefe, Maria, Petro e lyo na bantu bambi abalembwa mu Baibolo baleikala ne fyo baleyumfwa.
• Kuti mwapekanya ukubelengela pamo ifipande fimo ifyo musalile.
• Limo kuti mwapekanya ukwimba fye Inyimbo sha Bufumu. Kuti mwafwayako ne fya kulishishako inyimbo ifyo mwingakumanisha ukushita nelyo ukupanga.
5. Mulandu nshi abafyashi balingile ukupepela kuli Yehova ukuti abafwe ukusambilisha abana babo icine?
5 Mwe bafyashi, Yehova afwaya ukuti mwakusha bwino abana benu. E ico, mulepepa ukuti alemwafwa ukusambilisha abana benu icine. (Abapi. 13:8) Yehova nga alemutungilila, kuti mwasambilisha abana benu ‘ukuba aba mano, kabili aya mano, kuti yalenga bapusuka mu kutetekela Kristu Yesu.’—2 Tim. 3:15; Amapi. 4:1-4.