Natushimikila pa Bufumu pa Myaka 100!

1. Cinshi abantu ba kwa Yehova babakoseleshe ukucita mupepi ne myaka 100 iyapita?

¹ “Moneni, Imfumu ileteka! Imwe ni mwe babomfi ba Mfumu. E ico sabankanyeni, sabankanyeni, sabankanyeni, Imfumu no bufumu bwa iko.” Uwalandile aya amashiwi ni munyinefwe Rutherford kabili apo ayalandile napapita ne myaka mupepi na 100. Aya amashiwi yalikoseleshe abantu ba kwa Yehova ica kuti batendeke ukushimikila sana imbila nsuma. Ukutula apo alandiile aya mashiwi ukufika na ino nshita, twalishimikila imbila nsuma iya Bufumu “ku cibumbwa conse ica mwi samba lya muulu” nga filya fine Abena Kristu ba kubalilapo bacitile. (Kol. 1:23) Bushe pa myaka 100, finshi twacita pa kusabankanya Ubufumu bwa kwa Lesa? Kabili finshi tulingile ukucita pa kuti tutwalilile ukulasabankanya Ubufumu ilyo tulepalamina ku myaka 100 ukutula apo bwatendekela ukuteka?

2. Bushe impapulo shesu shalenga shani Ubufumu bwa kwa Lesa ukwishibikwa?

² Ifyo Twacita Kale: Pa myaka iingi, impapulo shesu shalilanda sana pa Bufumu bwa kwa Lesa. Ukutula mu mwaka wa 1939, magazini iyo tubomfya sana yatendeke ukuba no mutwe wa kuti: Ulupungu lwa kwa Kalinda Ulusabankanya Ubufumu bwa kwa Yehova. Iyi magazini ilingi line ilanda pa Bufumu ne fyo bukacita. Loleni! na yo ilanda pa Bufumu bwa kwa Lesa ukuti e bukapwisha fye amafya ya bantunse. Na kuba, iyi magazini yesu ibili e yo bapilibula no kusabankanya sana mwi sonde lyonse!—Ukus. 14:6.

3. Ni nshila nshi shimo isho twabomfya pa kusabankanya Ubufumu?

³ Abantu ba kwa Yehova balabomfya inshila shalekanalekana pa kusabankanya Ubufumu. Mu myaka ya kale, pa kushimikila twalebomfya ne myotoka isho twalekulikako ifisoselo, ifilimba fya maseleti, e lyo kabili twaleshimikila na pa milabasa. Ishi nshila shonse shalitwafwile ukusabankanya imbila nsuma ku bantu abengi nangu ca kutila kwali fye bakasabankanya ba Bufumu abanono. (Amalu. 19:4) Mu myaka ya nomba line, twalisabankanya imbila ya Bufumu pali Webu saiti yesu iya jw.org. Ici calilenga abantu abengi sana ukulakutika ku mbila ya Bufumu ukusanshako na baba mu fyalo umo babinda umulimo wa kushimikila.

4. Ni nshila nshi ishaibela isho tushimikililamo?

⁴ Abantu ba kwa Yehova balabomfya ne nshila shaibela ku kusabankanya imbila ya Ubufumu. Ku ca kumwenako, ukulunda pa kushimikila ku ng’anda ne ng’anda, muli ba 1990 twatendeke ukushimikila na mu maparka, umo bemika imyotoka, e lyo na mu fifulo fya makwebo. Kabili nomba kuli ne nshila yaibela iya kushimikililamo ku cintubwingi mu misumba iikalamba mwi sonde lyonse. E lyo kabili ifilonganino ifingi fyalitendeka ukushimikila mu ncende umupita sana abantu ukubomfya inshila iipya iya kubika impapulo pa tu mastandi twa mawilo, e lyo na matebulo. Lelo ukushimikila ku ng’anda ne ng’anda e nshila iikalamba iyo tushimikililamo imbila ya Bufumu.—Imil. 20:20.

5. Milimo nshi iyacindama iyo twingabombako muli uyu mwaka wa mulimo uuleisa?

⁵ Ifili ku Ntanshi: Ilyo umwaka wa mulimo umbi walatendeka mu September, abengi bakatampa bupainiya bwa nshita yonse. Bushe na imwe te kuti mubombeko? Nga ca kuti camukosela, bushe kuti mulebombako ubwa kwafwilisha mu nshita mu nshita? Nampo nga kuti mwabombako bupainiya nelyo iyo, Yehova akamupaala icine cine nga muleshimikila sana imbila ya Bufumu.—Mal. 3:10.

6. Mulandu nshi umweshi wa October ukabeela uwaibela?

⁶ Nga twafika mu mweshi wa October, 2014, ninshi imyaka 100 yakumana ukutula apo Ubufumu bwatendekela ukuteka. E mulandu wine Ulupungu lwa kwa Kalinda ulwa bantu bonse ulwa October lukalalandila sana pa Bufumu bwa kwa Lesa. Tulemukoselesha ukuti mukabombeshe pa kuti mukapeele abantu abengi sana iyi magazini! Ilyo tulelolela ifikacitika ku ntanshi, natutwalilile ‘ukulabila imbila nsuma ya bufumu bwa kwa Lesa’ kuli bonse abengakutika.—Imil. 8:12.