Ifingatwafwa Ukulashimikila Bwino—Landeni ico Mukalanshanyapo Ilyo Mukabwelelako

Ico Cacindamina: Nga tuleshimikila umuntu uulefwaya sana ukusambilila icine, tulingile ukubwelelako ilyo akakwata inshita pa kuti tukatapilile ulubuto twabyele. (1 Kor. 3:6) llingi line cilaba bwino nga ca kuti ilyo tatulalekana nankwe, twalanshanya ilyo tukabwelelako. E lyo kabili tulingile no kumwipusha icipusho ico twingesatendekelapo ukulanshanyapo ilyo tukabwelelako. Ici cikalenga umuntu akafwaye tukabweleleko, kabili nga ca kuti icasuko ku cipusho mwamwipusha cili mu lupapulo mwamushila, kuti afwaisha ukulubelenga. Na kabili ukupekanya apa kuyatendekela ukulanshanya ilyo twabwelelako kulanguka pantu ninshi twalisalila kabela ilyashi lya kulandapo ilyo no muntu tuleyako eshibe. Nga twabwelelako, pa kutendeka ukulanshanya kuti twatila twalayasuka icipusho twamwipwishe umuku wafumineko.

Ifyo Mwingacita:

Nga mulepekanya ifya kushimikila ku ng’anda ne ng’anda, mulepekanya ne cipusho ica kulanshanyapo ilyo mukabwelelako. Kuti mwaipusha icipusho icikumine ilyashi lili mu lupapulo mulepeela abantu, nelyo ico bayasuka mu lupapulo tubomfya pa kusambilisha abantu Baibolo, ulo mwingabomfya ilyo mwabwelelako.
Ilyo tamulapwa ukulanshanya nankwe, kuti mwamweba amuti kuti mwatemwa ukulanshanya nankwe na kabili. Pa numa, mwipusheni icipusho mupekenye ico mwingesalanshanyapo umuku ukakonkapo. Mu ncende shimo isho tushimikilamo abantu baliba ne fya kucita ifingi, kanshi bamo nalimo te kuti basumine ukuti tukabweleleko. Ifi nga e fyo caba uko mushimikila, nalimo kuti mwatila: “Bushe ilingi mulaba pa ng’anda pali iyi yine nshita? [Lekeni basuke] Kanshi umulungu uleisa tukesayasuka ici cipusho . . . Nga mukaba ne fya kucita ifingi ilyo nkesa, kuti twaisalanshanya inshita imbi.”
Nga mwalaya umuntu ukuti mukabwelelako e lyo mwapangana ne nshita, mufwile ukufikilisha. (Mat. 5:37) Nga mwashimikila umuntu, mufwile no kumweba ico mukesalandapo ilyo mukabwelelako.

Esheniko Ukucita ifi uno Mweshi:

Ilyo mwakulapekanya ifya kushimikila, mulepekanya ne cipusho ico mwingalanshanyapo nga mwabwelelako. Kuti mwaebako kasabankanya mulebomba nankwe ifyo mupekenye.