Ifingatwafwa Ukulatungulula Bwino Amasambililo ya Baibolo
1. Mulimo nshi uo bakasabankanya abatungulula amasambililo ya Baibolo bakwata?
1 Takuli uwingabombela Lesa kano Yehova umwine “amukula.” (Yoh. 6:44) Na lyo line, bakasabankanya abatungulula amasambililo ya Baibolo bafwile ukwafwa abantu ukupalama kuli Shibo uwa mu muulu. (Yako. 4:8) Pa kuti bacite fyo, balingile ukupekanya. Ukubelenga fye paragrafu imo na imo no kwipusha amepusho yapulintwa te kuti kwafwe umusambi ukumfwikisha icine no kulunduluka.
2. Finshi fingafumamo nga ca kuti tulesambilisha bwino umusambi Baibolo?
2 Bakasabanya abatungulula bwino amasambililo ya Baibolo bafwile ukwafwa abasambi babo (1) ukumfwikisha ifyo Baibolo isambilisha, (2) ukusumina ifyo Baibolo isambilisha, na (3) ukulabomfya ifyo balesambilila mu Baibolo. (Yoh. 3:16; 17:3; Yako. 2:26) Limo kuti papita ne myeshi iingi pa kuti fye mwafwe umuntu ukucita ifi twalandapo. Lelo umusambi nga atendeka ukucita cimo na cimo pali ifi, ninshi bucibusa bwakwe na Yehova bwakulaya bulekoseleko, ne ci kuti calenga aipeela kuli ena.
3. Mulandu nshi bakasabankanya abasambilisha bwino bepushisha amepusho ayalenga umusambi alanda ifyo aletontonkanya?
3 Finshi umusambi aletontonkanya?: Pa kuti twishibe nga ca kuti umusambi wesu aleumfwikisha no kusumina ifyo alesambilila, tatufwile ukulalandapo sana lelo tufwile ukukoselesha umusambi ukulalanda ifyo aleyumfwa. (Yako. 1:19) Bushe umusambi naumfwa ifyo Baibolo ilanda pali ili lyashi tulesambililapo? Bushe kuti alondolola ifyo asambilila mu mashiwi yakwe? Bushe ifi asambilila alefyumfwa shani? Bushe nasumina ukuti ifyo Baibolo isambilisha fya cine? (1 Tes. 2:13) Bushe naumfwikisha ukuti afwile ukubomfya ifyo alesambilila mu bumi bwakwe? (Kol. 3:10) Pa kuti twishibe amasuko kuli aya mepusho, tulingilie ukwipusha umusambi amepusho ayengalenga alanda ifyo aletontonkanya, kabili tulingile ukukutikisha.—Mat. 16:13-16.
4. Finshi tufwile ukucita nga ca kuti umusambi afilwa ukumfwikisha nelyo ukukonka ifyo alesambilila muli Baibolo?
4 Palapita inshita pa kuti muntu aleke imisango yapipa no kuleka ukutontonkanya pa fintu fyalubana. (2 Kor. 10:5) Kuti twacita shani nga ca kuti umusambi talesumina ifyo alesambilila nelyo talefibomfya? Mufwile ukumutekanishisha pa kuti Icebo ca kwa Lesa no mupashi wa mushilo fyalule umutima wakwe. (1 Kor. 3:6, 7; Heb. 4:12) Nga ca kuti umusambi afilwa ukumfwikisha ifyo Baibolo isambilisha nelyo afilwa ukubomfya ifyo alesambilila, tamufwile ukumupatikisha, lelo ilingi cilawama nga mwatendeka ukusambilila pali fimbi. Nga twatwalilila ukuba abatekanya kabili aba cikuuku ilyo tulemusambilisha Baibolo, kuti atendeka ukwaluka.