Twalilileni Ukubika Amano ku Kulenga Abantu Ukuba Abasambi
1. Cinshi tufwile ukucita pa kwafwa abantu ukuti bakapusuke?
1 Lipoti ya mwaka wa 2014, yalangile ifyo abantu ba kwa Lesa baali abacincila ne fyo balebombesha mu kubila imbila nsuma iya Bufumu. (Mat. 24:14) Twalishimikile ku bantu abengi sana ku ng’anda ne ng’anda, ilyo twalecita amakampeni ya kupeela abantu amatrakiti no tupepala twakwitilapo abantu ku kulongana ukwalekanalekana uko tukwata, e lyo na lintu twaleshimikila ku bantu ukubomfya inshila shimbi. Na lyo line, pa kuti abantu bakapusuke, tufwile ukusambilila nabo Baibolo no kubafwa ukuba abasambi ba kwa Yesu.—1 Tim. 2:4.
2. Mepusho nshi tufwile ukuyipusha pa kuti tuleipekanya ukutendeka amasambililo ya Baibolo?
2 Lyonse Muleipekanya Ukutendeka Isambililo lya Baibolo: Ilyo umuntu alanga ukuti alefwaya ukwishibilapo na fimbi, bushe mulamwipusha fyonse pa fyo mwingamusanga kabili no kubwelelako bwangu bwangu pa kuti mutendeke ukusambilila nankwe Baibolo? Ni lilali mwalangilepo umuntu uo mwakumene nankwe pa muku wa kubalilapo ifyo tusambilila Baibolo? Ni lilali mwaebelepo abo mupeela magazini cila mweshi ukuti kuti mwatemwa ukulasambilila nabo Baibolo? Bushe mwalitambishapo vidio ya Mulandu Nshi Mulingile Ukusambilila Baibolo? ne ya Bushe Isambililo lya Baibolo Liba Shani? kubo mubomba nabo, abo musambilila nabo ku sukulu, abena mupalamano, balupwa, e lyo nabo mwaishiba fye? Ilyo muleshimikila ukubomfya amatebulo no tumastandi twa mawilo, bushe muleba abasendapo impapulo ukutila kuti batendeka ukusambilila Baibolo ukwabula ukubalipilisha?
3. Finshi fifwaikwa pa kuti tulesambilisha bwino abantu icine?
3 Yehova na Yesu Balatwafwa: Ilyo Yesu alandile ukuti “kalengeni abasambi” abomfeshe ishiwi lya kuti “kabiyeni,” ukulangilila ukuti tufwile ukulaitendekelako no kulabombesha muli uyu mulimo. Na lyo line, tatwali no kulaba fweka lelo atulaile ukuti akulaba na ifwe. (Mat. 28:19, 20) Na kabili, Yehova alatupeela umupashi wakwe uwa mushilo ne fya kubomfya, kabili alatusambilisha ifya kusambilisha abantu icine. (Seka. 4:6; 2 Kor. 4:7) Kuti twapepa kuli Yehova ukuti atwafwe pa kuti tulefwaisha e lyo no kubombako uyu mulimo wacindama.—Fil. 2:13.
4. Cinshi tufwile ukubikila amano ku mulimo wa kulenga abantu ukuba abasambi?
4 Nga tulebila imbila nsuma tulaba ne nsansa. Lelo, tulaba ne nsansa nga nshi nga twasambilisha umuntu icine no kumwafwa ukwisa pa “musebo uwaya ku bumi.” (Mat. 7:14; 1 Tes. 2:19, 20) Ne cacilapo ukucindama ca kuti nga twabika amano ku mulimo wa kulenga abantu ukuba abasambi, tulalenga Yehova ukusekelela pantu “tafwaya umuntu nangu umo ukonaika lelo afwaya ukuti bonse bakalapile.”—2 Pet. 3:9.