Lyonse Muleipekanya Ukutendeka Isambililo lya Baibolo
1. Bushe ukukonka ifunde lya kwa Yesu ilyaba pali Mateo 28:19, 20 kusanshamo no kucita finshi?
1 Yesu atupeele ifunde lya kuti “kalengeni aba nko shonse ukuba abasambi . . . , mulebasambilisha.” (Mat. 28:19, 20) Kanshi lyonse tufwile ukuipekanya ukutendeka amasambililo ya Baibolo, te kulolela fye ubushiku ubo icilonganino casala ubwa kutendeka amasambililo ya Baibolo. Ifi twalalandapo kuti fyamwafwa.
2. Ni bani twingatendeka ukusambilila nabo Baibolo?
2 Balangeni Ifyo Tusambilila Baibolo: Nga tulebombesha ukulanga abantu ifyo tusambilila Baibolo, kuti twasuka twatendeka no kutungulula isambililo lya Baibolo. (Luk. Mil. 11:6) Bushe mwalyeshapo ukwipusha umuntu mu kulungatika nga kuti atemwa ukusambilila Baibolo? Aba mu cilonganino cimo ku United States balibombeshe ukubomfya iyi nshila umweshi umo uutuntulu. Bali ne nsansa nga nshi ilyo batendeke amasambililo ya Baibolo 42! Mwilamona kwati aba mitima isuma bonse abo tusanga baleshiba ukuti tulefwaya ukubasambilisha Baibolo. Kanshi ilyo mwabwelelako umuku uukonkelepo, mufwile ukubepusha nga kuti batemwa ukusambilila Baibolo! Mwiumfwa ububi nga bakaana ukusambilila. Kuti mwatwalilila ukulabatandalila epali bushiku bumo basumina ukusambilila. Bushe mwalipushapo abena mupalamano benu, balupwa, abo mubomba nabo, nangu abo musambilila nabo nga kuti batemwa ukusambilila Baibolo? Kuti mwaipusha na bo musambilila nabo Baibolo nga ca kutila balikwata ifibusa nelyo balupwa abengatemwa ukusambilila Baibolo.
3. Cinshi twakwata icingatwafwa pa kutendeka amasambililo ya Baibolo, kabili ni lilali twingacibomfya?
3 Ifyo Twingabomfya pa Kutendeka Amasambililo ya Baibolo: Icingatwafwa sana mu kutendeka amasambililo ya Baibolo ni trakiti iitila Bushe Kuti Mwatemwa Ukwishiba Icine? Kuti twapeela abo tulelanda nabo nangu ca kuti nabapokako kale impapulo nelyo iyo. Kuti twabomfya iyi trakiti mu fifulo fya makwebo, ilyo tuleshimikila mu misebo, ilyo tulecita ifipempu fya kubwelelamo na lintu tuletuma amakalata kuti twabikamo iyi ine trakiti. Kuti twasha na pa mayanda apashili bantu. Mulesenda iyi trakiti ilyo muleendela muli bamotoka ba cintubwingi, ilyo mwaya mu kushita ifya kushitashita, na lintu muli pa ncito. Ku numa ya aka ka trakiti balilondolola mu kwipifya ifyo tusambilila Baibolo kabili balilangilila ne fyo twingatendeka ukusambilila Baibolo ukubomfya icitabo ca Bushe Cinshi Baibolo Isambilisha?
4. Kuti twabomfya shani trakiti ya Bushe Kuti Mwatemwa Ukwishiba Icine? ku kutendeka amasambililo ya Baibolo?
4 Pa numa ya kupeela umuntu trakiti, nalimo kuti mwamulanga ifipusho ifyaba pe bula lya kubalilapo no kumwipusha ukuti, “Pali ifi fipusho fili apa, ni cili kwi mwingatemwa ukuti tulanshanye?” Lyena mwafweni ukusanga icasuko icili muli trakiti, belengeni nelyo supawileni ifyebo ifili ku numa ya trakiti ifilelanda pa fyo tucita pa kusambilila Baibolo. Pa numa kuti mwamulanga uko engasanga ifyebo na fimbi ifilelanda pa lyashi limo line mu citabo ca Bushe Cinshi Baibolo Isambilisha? mushileni icitabo no kupangana ubushiku mukabwelelako pa kuti mukatwalilile ukulanshanya.
5. Mulandu nshi tufwile ukulaipekanya lyonse ukutendeka amasambililo ya Baibolo?
5 Mu fifulo tushimikila mucili mulasangwa abantu abalefwaya ukwishiba ifyo Baibolo isambilisha. Nga tuleipekanya lyonse ukutendeka amasambililo ya Baibolo, tukaba ne nsansa pa mulandu wa kuti tuleafwa bambi ukuba pa nshila iitwala ku mweo.—Mat. 7:13, 14.