Natukwata Icibombelo Cipya ica Kutendekelako Amasambililo!
1 Umwanakashi umwina Amerika ali ni Roma Katolika uwaipeeleshe sana ku mapepo. Lyonse alesosela bwino ifisambilisho fye calici alepepako. Asukile ayako na ku Vatican. Lelo, ilyo Inte ya kwa Yehova yamutandalile, uyu mwanakashi alisumine ilyo bamwipwishe nga kuti atemwa ukusambilila Baibolo mu mwakwe. Mulandu nshi asuminine? Pantu alefwaya ukusambilila ifyo Baibolo ilanda kabili ku calici alepepa tabalesambilisha Baibolo mu mayanda. Bushe ici ciletusambilisha cinshi? Ukutila tatwingeshiba uwingasumina ukusambilila Baibolo na ifwe.—Luk. Mil. 11:6.
2 Bushe mwalibala amushimunukapo ukweba abantu ukutila twaliitemenwa ukusambilila Baibolo na onse uulefwaya? Bushe uko mwikala bonse balishiba ukutila tulasambilila na bantu ukwabula ukubalipilisha? Bushe kuti twashininkisha shani ukuti balishiba? Pa kubomfya bwino icibombelo cipya! Ici cibombelo ni trakti musuma, uwa mabula 6 uuleti Bushe Kuti Mwatemwa Ukwishiba na Fimbi Pali Baibolo? Natubebete uyu trakti, ukulanda pa kamutwe kamo kamo akabamo.
3 “Mulandu Nshi uwa Kubelengela Baibolo?” Uyu trakti alilondolola imilandu iisuma nga nshi. Alondolola ukutila muli Baibolo mwaba “ukufunda kusuma ukwafuma kuli Lesa,” ukulanga ifyo twingalanda na o mwi pepo ukulomba ukwafwa ne fyo twingacita pa kupokelela ubupe bwakwe ubwa mweo wa muyayaya. (1 Tes. 2:13) Uyu trakti alanda pa “cine icishilimuna” icaba mu Baibolo, pamo nga icicitika nga twafwa no mulandu kwabela amafya yafule fi pe sonde. Alondolola “ifishinte fya bukapepa ifyaba muli Baibolo” ifya kuti nga twafikonka kuti fyatunonsha no kutulenga ukuba ne nsansa, isubilo, ne mibele imbi isuma. Trakti alanda na pa mulandu umbi uwa kubelengela Baibolo—ukusesema pa fya ku ntanshi ukulanga ifili no kucitika nomba line fye.—Ukus. 21:3, 4.
4 “Ukwafwa ku Kumfwikisha Baibolo”: Trakti asosa ati: “Bonse tulakabila ukwafwa ku kumfwikisha Icebo ca kwa Lesa.” Lyene alondolola ifyo tusambilila Baibolo ati: “Ilingi line cilawamisha ukusambilila Baibolo panono panono, ukubalilapo ne fisambilisho fya kutendekelako.” Nangu ca kuti alalondolola bwino ukutila “muli Baibolo e mufuma ifyebo fya cine,” uyu trakti alalanda na pali broshuwa wa Cintu Lesa Afwaya ngo wingafwa umusambi “ukumfwikisha Amalembo yalanda pa fyalekanalekana.” Akamutwe kakonkapo kepusha icipusho calinga ukutontonkanyapo.
5 “Bushe Kuti Mwatemwa Ukulubulako Inshita Cila Mulungu Ukumfwikisha Baibolo?” Trakti alondolola ukutila isambililo lya Baibolo kuti lyateyanishiwa pa nshita ne cifulo ifingawamina umusambi, nampo nga ni mu mwabo nelyo fye pali lamya. Ni bani bengasangwako ilyo mulesambilila? Trakti asuka ati: “Aba mu ng’anda yenu bonse. Abanenu bonse abo mulefwaya ukuti basangweko na bo kuti basangwako. Nelyo nga mulefwaya, kuti mwasambilila fye mweka.” Bushe umuntu alingile ukusambilila inshita yalepa shani? Alondolola ati: “Abantu abengi balapaatulako iawala limo cila mulungu ukusambilila Baibolo. Nga kuti mwapaatulako inshita yakulako nelyo inono cila mulungu, Inte bakaitemenwa ukumwafwa.” Ici e cishinka cacindama! Tulaitemenwa ukwaluka ukulingana ne fyo umusambi alefwaya.
6 “Tulemulaalika Ukusambilila”: Pali akapepala apo uwapokako trakti engalombela broshuwa wa Cintu Lesa Afwaya nelyo ukwipusha ukuti bakamutandalile no kumulondolwela pa kusambilila Baibolo ukwabulo kulipilishiwa. Inkupo yabalabata iya broshuwa wa Cintu Lesa Afwaya yalilangwa pali trakti. Bushe mwamona umulandu uyu trakti akakoselesesha abantu na bambi aba bufumacumi ukusumina ukuti tubafwe? Lelo, kuti twabomfya shani bwino ici cibombelo cipya?
7 Ni Bani Mwingapeelako uyu Trakti? Uyu trakti kuti apeelwa ku bantu abo mwalanda na bo nelyo ukusha pa mayanda mushisangile abantu. Kuti apeelwa ku ng’anda ne ng’anda, mu musebo, nelyo mu cifulo ca makwebo. Tambikeni ku bantu nampo nga bapokako impapulo shesu nelyo bakaana ukupokako. Mubikeni pa kati ka bamagazini nelyo impapulo shimbi isho mwatambika. Mubikenimo ilyo muletuma bakalata. Ebeni abo mulelanda na bo pa lamya ukutila kuti mwabatuminako uyu trakti. Mulesendako yamo lyonse pa kuti mwingatambika ilyo mwaya mu kushita fimo, ilyo muli muli basi nelyo ishitima, kabili lyonse ilyo muleshimikila mu lyashi. Peeleniko onse uwaisa ku mwenu. Tambikeni kuli balupwa lwenu, abena mupalamano, abo mubomba na bo, abo musambilila na bo, na bambi abo mwaishiba. Bombesheni ukupeela uyu trakti kuli bonse mwasanga! Lyene cinshi mukacita pa numa?
8 Nga Bayankulako Apo Pene: Abantu bamo bakankulako apo pene fye pa kulanda ukutila kuti batemwa ukusambilila Baibolo. E co, lyonse ilyo mulebombako umulimo wa kushimikila, shininkisheni ukuti namukwata amabroshuwa ya Cintu Lesa Afwaya yabili—umo uwa musambi e lyo umbi uwenu. Nga umuntu alefwaisha, tendekeni ukusambilila apo pene fye. Kupukuleni no kubelenga akamutwe katila “Ifya Kubomfya uno Broshuwa” pe bula lya bubili. Lyene kabiyeni kwi sambililo 1, no kulanga ifyo tusambilila. Bushe iyi nshila tayaanguka nga nshi?
9 Nga uo Mwashimikila Alekabila Ukutontonkanyapo: Ilyo pashilapita sana inshita, tukuteni ukumonana na o na kabili. Ilyo mwamutandalila, shininkisheni ukuti mwasenda broshuwa wa Cintu Lesa Afwaya. Mulangeni umutande wa fyabamo pe bula lyalenga bubili. Mulekeni asale umutwe uo engatemwa sana. Kabiyeni kuli ilyo isambililo, no kutendeka ukulanshanya.
10 Ukubwelela ku bo Mwashalikile Magazini: Nga mwashalike trakti pamo na bamagazini, nalimo ilyo mwabwelelako kuti mwatila: “Ilyo namutandalile, nalimushilileko magazini wa Ulupungu lwa kwa Kalinda. Nalimo mwalimwene ukuti umutwe wakumanina uwa uyu magazini utila Ulupungu lwa kwa Kalinda Ulusabankanya Ubufumu bwa kwa Yehova. Buno bushiku ndefwaya ukumulondolwela pali ubu Bufumu ne co bukacitila imwe no lupwa lwenu.” Lyene kupukuleni broshuwa wa Cintu Lesa Afwaya pe sambililo 6. Ukutendekela na paragrafu 1, belengeni no kulanshanya na mwine ng’anda ukulingana ne nshita akwete. Lyene teyanyeni ukubwelelako ubushiku bumbi no kupwisha ili sambililo.
11 Mwileka Amatrakti Yonse Yapwe: Kangalila wa mulimo na bamunyinefwe babombela ku mpapulo bakafwaisha ukuti icilonganino lyonse cilekwata amatrakti ya Ishibeni Baibolo ayengi. Sungeniko yamo mwi tumba nelyo mu cikwama, muli motoka, ku ncito, ku sukulu, mupepi no mwinshi wa ng’anda yenu—konse fye uko mwingaisanga bwangu. Kabili sendeniko yamo mu cola mubomfya pa kushimikila ayo mwingabomfya nga mwasanga umuntu uo mwingalanda nankwe pali Baibolo.
12 Yehova Napaale Ukubombesha Kwesu: Icintu icisuma Abena Kristu bonse bafwaisha, kusambilishako bambi icine. (Mat. 28:19, 20) Bushe pali abo mulesambilisha Baibolo pali ino nshita? Nga e ko bali, bushe kuti mwasangako inshita ya kusambilishako umuntu na umbi cila mulungu? Nga tapali uo mulesambilisha, kwena kuti mwafwaisha ukucite fyo. Pepeni kuli Yehova ukuti amupaale ilyo mulebombesha ukusanga umuntu uo mwingasambilisha. Lyene bombeni ukulingana na yo mapepo.—1 Yoh. 5:14, 15.
13 Natukwata icibombelo cipya ica kutendekelako amasambililo! Cishibeni bwino. Cisabankanyeni konse konse. Bombesheni “ukucite cisuma, ukuba abacindama ku milimo isuma, ukuba abape, aba nkumbu,” ukwebako bambi ifyo mwasambilila pa Cebo ca kwa Lesa.—1 Tim. 6:18.
[Akabokoshi pe bula 4]
UKO TWINGASHALIKA TRAKTI
◼ Ilyo mulelanshanya na bantu cila bushiku
◼ Ilyo umuntu apokako impapulo shesu
◼ Ilyo tushisangilepo muntu pa ng’anda
◼ Ilyo twaya ku fipempu fya kubwelelamo
◼ Ilyo twakumanya umuntu mu bunte bwa mu musebo
◼ Ilyo tuleshimikila mu cifulo ca makwebo
◼ Ilyo tuleshimikila ubunte bwa mu lyashi
◼ Ilyo tulelemba bakalata
◼ Ilyo tuli muli basi nelyo mwi shitima
◼ Ilyo umuntu atutandalila
◼ Ilyo tulelanshanya na balupwa, abena mupalamano, abo tubomba na bo, abo tusambilila na bo, na bambi abo twaishiba