Impapulo Tubomfya pa Kusambilisha Abantu Baibolo
1. Bushe Abena Kristu baba shani nga bapanga ifya kupangapanga?
1 Abapanga ifya kupangapanga balakwata ifya kubomfya ifyalekanalekana. Ifya kubomfya fimo bafibomfya fye ku milimo imo imo, fimbi balafibomfya lyonse. Abacenjela sana mu fya kupangapanga balakwata ifya kubomfya ifyo babomfya lyonse, kabili ifi e fyo baishibisha ukubomfya. Baibolo ikoselesha Abena Kristu bonse ukulabombesha mu butumikishi no kuba ‘ababomfi abashingaba ne nsoni pa mulimo wabo.’ (2 Tim. 2:15) Lupapulo nshi ulwacindamisha pa mpapulo tubomfya mu butumikishi? Cebo ca kwa Lesa, ulupapulo ulo tubomfya sana mu kulenga abantu ukuba “abasambi.” (Mat. 28:19, 20) Kanshi, tufwile ukubombesha ukwishiba bwino ifya ‘kulungika pa kusambilisha icebo ca cine.’ Na lyo line, kwaliba impapulo na shimbi isho tubomfya lyonse mu butumikishi isho Abena Kristu bonse bafwile ukwishiba ifya kushibomfya bwino pa kusambilisha abantu icine.—Amapi. 22:29.
2. Ni mpapulo nshi tubomfya pa kusambilisha abantu Baibolo?
2 Impapulo Isho Tubomfya Lyonse: Ukulunda pali Baibolo, ni mpapulo nshi shimbi isho tufwile ukulabomfya? Ulupapulo lwa kubalilapo ulo tubomfya mu kusambilisha abantu icine ca mu Baibolo citabo icitila Bushe Cinshi Baibolo Isambilisha? Nga twapwisha ukusambilila no musambi muli ili buuku, tutendeka ukusambilila mu citabo ca “Ikalilileni mu Kutemwa kwa kwa Lesa” pa kuti asambilile ifya kulakonka amashiwi ya kwa Lesa ayatutungulula. Kanshi tufwile ukwishiba bwino ifya kubomfya ishi mpapulo shibili. Tufwile no kulabomfya na mabroshuwa yamo yamo. Broshuwa ya Imbila Nsuma Ukufuma Kuli Lesa! lupapulo na lumbi ulo tubomfya pa kutendeka ukusambilila na bantu Baibolo. Nga ca kuti mu cifulo tushimikila mwaba abantu abengi abashaishibisha ukubelenga nelyo abalanda ululimi ulo twakwata fye impapulo ishinono sana nelyo nga tatwakwata nangu lumo, lyena kuti twabomfya broshuwa ya Mulekutika Kuli Lesa nelyo Mulekutika Kuli Lesa pa Kuti Mukekale Umuyayaya. Ulupapulo tubomfya pa kwafwa amasambililo yesu aya Baibolo ukwisa mu cilonganino ca kwa Yehova ni broshuwa ya Ni Bani Bacita Ifyo Yehova Afwaya Muno Nshiku? Pa mavidio tubomfya pa kulenga abantu ukuba abasambi, paba Mulandu Nshi Mulingile Ukusambilila Baibolo?, Finshi Ficitika pa Ng’anda ya Bufumu?, ne ya Bushe Lesa Alikwata Ishina? Tufwile ukwishiba bwino ifya kubomfya aya mavidio.
3. Bushe ifipande ifya kulaba mu Ubutumikishi Bwesu Ubwa Bufumu fikalatwafwa ukucita finshi?
3 Ifipande ifya kulaba mu Ubutumikishi Bwesu Ubwa Bufumu fyakulatwafwa ukwishiba ifya kubomfya bwino impapulo ishalekanalekana isho tubomfya pa kusambilisha abantu Baibolo. Nga twabika amano ku kwishiba ifya kubomfya ishi impapulo, ninshi tulekonka ukufunda kwa mu malembo ukwa kuti: “Lyonse uleisakamana we mwine, ulesakamana ne fyo ulesambilisha. Ikalilila muli ifi fintu, pantu nga wacita ifyo ukaipususha we mwine na balekumfwa.”—1 Tim. 4:16.