Ifyo Twingafika abo Tulesambilisha pa Mutima
1. Bushe abantu abo Yesu alesambilisha baumfwile shani ilyo abafikile pa mutima?
1 Yesu Kristu alefika abo alesambilisha pa mutima. Bushiku bumo imitima ya batumwa bakwe ‘yalibilime’ ilyo abalondolwelele bwino Amalembo. (Luka 24:32) Apo tulingile ukulaumfwila Lesa ukufuma pa nshi ya mutima, kuti twacita shani pa kuti twingasambilisha abantu ica kuti no kwaluka bayaluka?—Rom. 6:17.
2. Bushe ukwiluka kutwafwa shani ukufika abo tulesambilisha pa mutima?
2 Muleiluka pa Kuti Mwilabakalifya: Abantu abengi tabaaluka nga ca kuti mulebeba fye ukuti tamufwile ukulacita ifi, mufwile ukulacita ifi. Na kuba, nga mulebeba amalembo ayengi lintu mulesuusha ifyo basuminamo, nalimo te kuti bafwaye no kulanshanya na imwe. Pa kuti umuntu afwaishe ukusambilila, tufwile ukwiluka ifyalenga ukuti asumine mu fintu fimo ne fyalenga ukuti alecita ifintu fimo. Nga twamwipusha amepusho ayasuma kabili ayashili ya kumukalifya, kuti alanda ifyaba ku mutima. (Amapi. 20:5) Lyena kuti twasala bwino ifyebo ifyaba mu Cebo ca kwa Lesa ifingamufika pa mutima. Kanshi tulingile ukulabika amano ku bantu no kulabatekanishisha. (Amapi. 25:15) Muleibukisha ukuti abantu bamo balalunduluka bwangu lelo bambi bena palapita inshita pa kuti balunduluke. Batekanishisheni pa kuti umupashi wa kwa Yehova ubafwilishe ukwaluka mu fyo batontonkanya na mu fyo bacita.—Marko 4:26-29.
3. Kuti twayafwa shani abo tulesambilisha pa kuti beshibe ifya kucita pa kuba ne mibele iisuma?
3 Mulebafwa Ukwishiba Ifyo Bengaba Imibele Iisuma: Amalembo ayalanda pa busuma bwa kwa Yehova na yalanda pa fyo aba no kutemwa kuti yaafwa abo tulesambilisha ukuba ne mibele iisuma. Kuti twalanshanya nabo amalembo pamo nga Amalumbo 139:1-4 nelyo Luka 12:6, 7 pa kubalanga ifyo Lesa abika sana amano ku muntu umo na umo. Nga ca kuti abantu batendeka ukulatasha Yehova pa cikuuku cakwe, balamutemenwako kabili balafwaya sana no kulamupepa. (Rom. 5:6-8; 1 Yoh. 4:19) Na kabili, nga baishiba ukuti ifyo bacita filakalifya Yehova, nalimo kuti bayaluka batampa no kulacita ifintu ifingalenga atemwa.—Amalu. 78:40, 41; Amapi. 23:15.
4. Ilyo tulesambilisha abantu Baibolo, kuti twalanga shani ukuti natucindika insambu shabo isha kuisalila ifyo balefwaya?
4 Yehova tapatikisha umuntu nangu umo ukulakonka amafunde yakwe. Lelo alangilila fye ubusuma bwaba mu kulakonka amafunde yakwe. (Esa. 48:17, 18) Tulapashanya Yehova nga tulesambilisha abantu mu nshila ya kuti abene beka baimwena ubusuma bwaba mu kulakonka amafunde yakwe. Nga ca kuti abantu baimwena abene ukuti balingile ukwaluka, balabombela sana Yehova. (Rom. 12:2) Na kabili, balapalama sana kuli Yehova, “uubebeta imitima.”—Amapi. 17:3.