Twalilileni Ukupepa Kuli Lesa pa Kuti Alemupaala

Lesa abumbile abantu mu nshila iisuma iya kuti balemweba ifyo baleumfwa mwi pepo. Kasesema Davidi apepele ukuti: “Mwe bomfwa ipepo, kuli imwe e ko abantunse bakesa.” (Amalumbo 65:2) Nomba mulingile ukulapepa shani nga mulefwaya Lesa alekutika ku mapepo yenu kabili alemupaala?

MULEICEFYA ILYO MULEPEPA KABILI AMAPEPO YENU YALEFUMA PA NSHI YA MUTIMA

Ipepo kuti lyalenga mwapongolwela Lesa ifyaba mu mutima wenu. (Amalumbo 62:8) Lesa wa Maka yonse alatemwa sana nga mulepepa ukufuma pa nshi ya mutima.

MUFWILE UKULABOMFYA ISHINA LYAKWE ILYO MULEPEPA

Nangu ca kuti Lesa alikwata amalumbo ayengi, akwata fye ishina limo. Atile, “Nine Yehova. Ilyo e shina lyandi.” (Esaya 42:8) Mu Malembo ya Mushilo mwaliba ishina lya kuti Yehova imiku 7,000. Bakasesema abengi balebomfya ishina lya kwa Lesa nga balelanda nankwe. Abrahamu atile: “Yehova, lekeni nande.” (Ukutendeka 18:30) Na ifwe bene tufwile ukulabomfya ishina lya kwa Lesa ilya kuti Yehova nga tulepepa.

NGA MULEPEPA MULEBOMFYA ULULIMI MULANDA

Te mulandu no lulimi twabomfya pa kupepa, Lesa alomfwa ifyo tulelandapo ne fyo tuleumfwa. Amalembo ya Mushilo yatweba ukuti: “Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.”—Imilimo 10:34, 35.

Nomba nga tulefwaya Lesa aletupaala tatufwile ukupelela fye pa kupepa kuli ena. Mu fipande fikonkelepo, twalalanda pa fintu fimbi ifyo tufwile ukulacita.