Ifingatwafwa Ukulabila Bwino Imbila Nsuma—Ukwalula Inshila ya Kubililamo Imbila Nsuma

ICO CACINDAMINA: Abasubwa ne mpaanga shimbi baleta abantu aba misango yonse ‘ukunwa amenshi ya mweo aya bupe fye.’ (Ukus. 22:17) Aya menshi ya mampalanya yemininako fyonse ifyo Yehova atupekanishisha ifipususha abantu ababa ne cumfwila ku lubembu ne mfwa. Pa kuti twafwe abantu aba nkulilo ne mipepele yapusanapusana, tulingile ukubeba “mbila nsuma ya muyayaya” mu nshila iingalenga bafwaya ukukutika.—Ukus. 14:6.

IFYO MWINGACITA:

• Saleni ilyashi ne lembo ilingalenga abantu mu ncende mubililamo imbila nsuma batemwa ifyo mulebeba. Kuti mwabomfya ifyo mwingalanda ifiba mu akatabo ka Mikalile nelyo kuti mwabomfya inshila mwabomfyapo iibomba bwino. Malyashi nshi ne lembo abantu batemwa ukumfwa? Bushe kuli ilyashi ilyo abantu abengi balelandapo? Lyashi nshi ilyo umwaume nelyo umwanakashi engatemwa?

• Pekanyeni ifyo mwingaposha abantu ilyo mulebila imbila nsuma ukulingana ne fyo abantu baposha ku ncende mwikala.—2 Kor. 6:3, 4

• Mulingile ukwishiba impapulo na mavidio ifyaba pa Mpapulo Tubomfya Sana pa Kusambilisha Abantu isho mwingabomfya ilyo mulebila ku bantu abalefwaya ukumfwa

• Kopololeni ifyebo pa jw.org mu ndimi isho abantu balanda mu ncende mubilamo imbila nsuma

• Muleyalula amalyashi ukulingana na bantu mulelanda nabo. (1 Kor. 9:19-23) Ku ca kumwenako, finshi mwingalanda nga mwaumfwa ukuti uo mulebilako imbila nsuma aali ne cililo?

TAMBENI VIDIO, KABILI ASUKENI AMEPUSHO YAKONKAPO:

• Lyashi nshi kasabankanya acitendekelapo ukulanshanya na uo acilalanda nao?

• Bushe ifintu fyali shani mu bumi bwa muntu bacilabilako imbila nsuma?

• Lilembo nshi aciba no kubelenga, kabili mulandu nshi?

• Mwalula shani ifya kulanda ilyo mulebila imbila nsuma ukulingana na bantu mwasanga?