Finshi Fingalenga Mwaisaba ne Nsansa ku Ntanshi?
Abantu abengi basumina ukuti kwaliba ifintu fimo ifishimoneka ifingalenga baisaba ne nsansa ku ntanshi nelyo iyo. Ici e cilenga balacita ifintu fimo ifyo bamona ukuti e fingalenga baisashuka ku ntanshi.
IFYO ABENGI BASUMINAMO
UKUPENDULA INTANDA: Abantu bamo basumina ukuti ifyo intanda shaikele mu muulu pa bushiku bafyelwe e fingalenga baisaikala bwino ku ntanshi nelyo iyo. Balaya na mu kwipusha abantu abapendula intanda pa kuti beshibe ifikabacitikila ku ntanshi e lyo no kumona nga pali ifyo bengacitapo pa kutila ifyabipa fikabacitikila nelyo pa kuti bakabe ne nsansa.
FENG SHUI: Abakonka ici icisambilisho basumina ukuti umuntu nga akuula ing’anda yakwe mu musango umo ninshi akulaba ne nsansa. Ba Lo Wing,a abekala ku Hong Kong balandile ukuti: “Uwaishibe sana ici icisambilisho abebele ukuti nga basungila ka crystal ball kamo akaibela pa ncende imo mu ng’anda ninshi bakulakwata indalama.”
UKUPEPA IFIKOLWE: Abengi bacili basumina ukuti, nga balecindika ifikolwe fyabo abafwa ifintu fyakulabendela bwino kabili ifikolwe fyabo fyakulabacingilila. Ba Van abekala ku Vietnam batile, “Nasumine mu kutila nga ndecindika ifikolwe fyandi abafwa kuti ndeikala bwino kabili ine na bana bandi kuti twaisaba ne nsansa ku ntanshi.”
UKUFYALILWA MU CINTU CIMBI: Abengi basumina ukuti umuntu nga afyalwa e lyo afwa ninshi akesafyalilwa mu cintu cimbi, kabili basumina ukuti ifyo acitile kale ilyo ashilafyalwa e fingalenga alacula nelyo ukulaikala bwino.
Nangu ca kuti abengi bamona ukuti ukusumina muli ifi kupupa imipashi balaya mu kubukisha. Bamona ukutila nalimo ukuya mu kubukisha kuti kwalenga baishiba ifikabacitikila ku ntanshi.
NOMBA BUSHE IFI BACITA FILALENGA BAISHIBA IFIKABACITIKILA KU NTANSHI?
Bushe abasumina muli ifi ifisambilisho balekala bwino nelyo bakesaba ne nsansa ku ntanshi?
Natulande pa ca kumwenako ca ba Hào abaleikala ku Vietnam. Ba Hào balisumiine mu cisambililo ca feng shui kabili balecindikisha ne fikolwe fyabo. Nomba bushe ifi balecita fyalilengele baba ne nsansa? Ba Hào balandile ukuti: “Nalikwete sana amasakamika pantu ubukwebo bwandi bwalipwile, nalikwete sana amafya mu lupwa kabili nalikwete sana ne nkongole.”
Ba Qiuming aba ku Taiwan nabo balisumine mu kupendula intanda, ukufyalilwa mu cintu cimbi, mu cisambilisho ca feng shui, ukupepa ifikolwe e lyo na mu mashuko. Pa numa ya kutontonkanya pali ifi ifisambilisho batile: “Nalimwene ukuti ifi ifisambilisho ne ntambi filaipilika ifiine. Nasangile ukuti ilingi ifyo balependula intanda tafyaleba fya cine no kuti icisambilisho ca kufyalilwa mu cintu cimbi ca bufi, pantu nga tauleibukisha ifyo wali ilyo ushilafyalwa kuti wayaluka shani no kutendeka ukucita ifisuma pa kuti uleikala bwino.”
“Nasangile ukuti ifisambilisho fya musango uyu e lyo ne ntambi, filaipilika.”—E FYALANDILE BA QIUMING, ABA KU TAIWAN
Nga filya cali kuli ba Hào na ba Qiuming, abantu bambi nabo basanga ukuti ifilenga tuleikala bwino no kwisaba ne nsansa ku ntanshi, te kupendula intanda, ukucindikisha ifikolwe, ukufyalilwa mu cintu cimbi, nelyo ishuko. Bushe ici cilolele mu kuti tapali ifyo twingacitapo pa kuti tukeseba ne nsansa ku ntanshi?
Abengi bamona ukuti, pa kuti bakaleikala bwino balingile ukusambilila sana nelyo ukukwata indalama ishingi. Nomba finshi fyacitikila aba bantu abasalapo ukucita ifi?
a Amashina yamo ayali muli cino cipande ne cikonkelepo nayalulwa.
b Aya amashiwi yasangwa muli Baibolo ya mushilo pa Abena Galatia 6:7. Abanensu abekala ku Asia balanda ukutila nga wabyala ifitanga menshi ukasombola ifitanga menshi, nga wabyala cilemba ukasombola cilemba.