ICIPANDE CA KUSAMBILILAMO 31
Muletasha Sana pa Bupe Ubusuma ubo Lesa Amupeela Ubwa Kupepa
“Lekeni amapepo yandi yapekanishiwe nge fyanunkila ku cinso cenu.”—AMALU. 141:2.
ULWIMBO 47 Mulepepa Kuli Yehova Lyonse
IFYO TWALASAMBILILAa
1. Bushe tumfwa shani ifi Yehova atusuminisha ukupepa kuli ena?
YEHOVA uwabumbile umuulu ne sonde alitupeela ubupe ubusuma nga nshi ubwa kuti tulepepa kuli ena. Baleni tontonkanyeni: Kuti twapepa kuli Yehova no kumweba fyonse ifyo tuleumfwa inshita fye iili yonse kabili mu lulimi ululi lonse. Kuti twapepa kuli Yehova ilyo tuli mu cipatala, nelyo ilyo tuli mu cifungo, kabili kuti twacetekela ukuti Shifwe uwatutemwa alatumfwa. Ala tulatasha sana pali ubu bupe Lesa atupeela ubwa kupepa kuli ena.
2. Bushe Imfumu Davidi yalangile shani ukuti yaletasha pa bupe bwa kupepa?
2 Imfumu Davidi yaletasha sana pa bupe bwa kupepa. Yaimbiile Yehova ukuti: “Lekeni amapepo yandi yapekanishiwe nge fyanunkila ku cinso cenu.” (Amalu. 141:1, 2) Mu nshita ya Mfumu Davidi, ifyanunkila ifyo bashimapepo balepekanya, balebikako sana amano pa kufipekanya. (Ukufu. 30:34, 35) Davidi alefwaya ukubika sana amano ku fyo alalanda mwi pepo kuli Yehova, nga filya fine bashimapepo balebika sana amano pa kupekanya ifyanunkila. Ifi fine e fyo na ifwe tufwaisha ukucita. Tufwaya amapepo yesu yalelenga Yehova asekelela.
3. Cinshi tufwile ukucita ilyo tulepepa, kabili mulandu nshi?
3 Ilyo tulepepa kuli Yehova tufwile ukuba sana no mucinshi. Tontonkanyeni pa fimonwa ifyo Esaya, Esekiele, Daniele na Yohane bamwene. Nangu ca kuti ifimonwa ifyo bamwene fyalipusene, kwali icintu cimo ico fyapalenemo. Fyonse fyalelangilila ukuti Yehova ni Mfumu ya bukata. Esaya amwene “Yehova, naikala pa cipuna cakwe ica bufumu icasumbuka kabili icasansulwa.” (Esa. 6:1-3) Esekiele amwene Yehova naikala pe celeta lya ku muulu ilyashingulwike ne ‘fyabeeka ifyalemoneka ngo mukolamfula.’ (Esek. 1:26-28) Daniele amwene “Uwa Nshiku ne Nshiku” nafwala ica kufwala icabuuta tuutu, kabili ku cipuna cakwe ica Bufumu kwalefuma imingu sha mulilo. (Dan. 7:9, 10) Yohane na o amwene Yehova naikala pa cipuna cakwe ica Bufumu icashingulwikwe no mukolamfula uwalemoneka nge libwe lya emarodi. (Ukus. 4:2-4) Nga twatontonkanya pa fyo Yehova aba no bukata nga nshi, tufwile ukulatasha pa bupe atupeela ubwa kupepa kuli ena kabili ilyo tulepepa, tufwile ukuba no mucinshi nga nshi. Nomba finshi twingapepelapo?
“E ICO IMWE MUFWILE UKUPEPA IFI, AMUTI”
4. Finshi twingasambilila pa fya kupepa ku mashiwi yaba pali Mateo 6:9, 10 ayo Yesu alandile ilyo alesambilisha abasambi bakwe ifya kupepa?
4 Belengeni Mateo 6:9, 10. Ilyo Yesu alelanda Ilyashi lya pa Lupili asambilishe abasambi bakwe ifya kulapepa pa kuti balelenga Lesa ukulasekelela. Pa numa ya kulanda ukuti “e ico imwe mufwile ukupepa ifi, amuti,” Yesu abalilepo ukulanda pa fintu fimo ifyacindama ifyakuma ukufwaya kwa kwa Yehova. E kutila ukulenga ishina lya kwa Lesa ukuba ilya mushilo, ukupepela ukuti Ubufumu bwise, ubukonaula abalwani ba kwa Lesa bonse kabili ubukaleta amapaalo ku bantu abakaba pe sonde. Nga tulelanda pali ifi fintu ilyo tulepepa, ninshi tulelanga ukuti ukufwaya kwa kwa Lesa kwalicindama nga nshi.
5. Bushe Yehova alakutika nga twapepela pa fyo tulekabila?
5 Mu mashiwi ayakonkelepo ayo Yesu alandile mwi pepo lya cilangililo, alilangile ukuti caliba fye bwino ukupepela pa fintu ifyo tulekabila. Kuti twalomba Yehova ukuti atupeele ifya kulya fya bushiku, atwelele imembu, atucingilile ku matunko kabili atupokolole ku mubifi. (Mat. 6:11-13) Nga tulelomba Yehova ifi fintu, ninshi tulelanga ukuti twalishiba ukuti e wingatwafwa no kuti tulefwaya ukucita ifingalenga asekelela.
Finshi abalume bengapepelapo na bena mwabo? (Moneni paragrafu 6)b
6. Bushe ifyo Yesu alandile mwi pepo lya cilangililo e fyo fye tufwile ukulapepela? Londololeni.
6 Yesu tasambilishe abasambi bakwe ukuti bafwile ukulalanda amashiwi yalya yene ayaba mwi pepo lya cilangililo ilyo balepepa. Mu mapepo yambi ayo Yesu apepele, alipepeele pa fintu ifyalekanalekana ifishaba mwi pepo lya cilangililo ifyali ifyacindama pali ilya nshita. (Mat. 26:39, 42; Yoh. 17:1-26) Kanshi na ifwe kuti twapepela pa fili fyonse ifiletusakamika. Nga tulefwaya ukupingula pa fintu, kuti twapepa kuli Yehova ukuti atupeele amano e lyo no kwiluka. (Amalu. 119:33, 34) Nga ca kuti batupeela umulimo uwakosa uo tufwile ukubomba, kuti twapepa ukuti Yehova atwafwe pa kuti twishibe ifya ku-ubomba bwino. (Amapi. 2:6) Abafyashi kuti bapepelako abana babo e lyo na bana nabo kuti bapepelako abafyashi. Kabili ifwe bonse tufwile fye ukupepelako abo tusambilisha Baibolo na bo tubilako imbila nsuma. Nomba tatufwile fye ukulapepa ilyo tulefwaya ukulomba Yehova fimo.
Finshi twingalumbanishishapo no kutashishapo Yehova ilyo tulepepa? (Moneni amaparagrafu 7-9)c
7. Mulandu nshi tulingile ukulumbanishisha Yehova ilyo tulepepa?
7 Ilyo tulepepa kuli Yehova tufwile no kulamulumbanya. Yehova fye e walinga ukulumbanya. Lesa musuma kabili ‘ali-iteyanya ukwelela.’ Na kabili “wa nkumbu kabili uwa mutembo, uukokola ukukalipa kabili uwafulisha icikuuku ne cishinka.” (Amalu. 86:5, 15) Kanshi tufwile ukulalumbanya Yehova pa mulandu ne fyo aba e lyo ne fyo atucitila.
8. Fintu nshi fimo ifyo tufwile ukutashishapo Yehova? (Amalumbo 104:12-15, 24)
8 Tatufwile ukupelela fye pa kulalumbanya Yehova ilyo tulepepa, tufwile no kulamutasha pa fisuma ifingi ifyo atupeela. Ku ca kumwenako, kuti twamutasha pa malangi ayalekanalekana ayo tumona mu maluba, pa misango iingi iya fya kulya ifisuma, e lyo na pa nsansa isho tukwata pa kuba ne fibusa. Shifwe wesu uwatutemwa alitupeela ifi fintu e lyo ne fintu fimbi ifisuma pa kuti tuleba ne nsansa. (Belengeni Amalumbo 104:12-15, 24.) E lyo ne cacilapo ukucindama, tulatasha Yehova pa fya kulya fya ku mupashi ifyo atupeela ifilenga tulekosha icitetekelo cesu e lyo ne subilo ilyo twakwata.
9. Finshi twingacita pa kuti tuleibukisha ukutasha Yehova ilyo tulepepa? (1 Abena Tesalonika 5:17, 18)
9 Limo ilyo tulepepa kuti twalaba ukutasha Yehova pa fisuma fyonse ifyo atupeela. Nomba finshi mwingacita pa kuti mwilalaba ukutasha Yehova? Kuti mwalemba ifintu ifyo mwapepelepo kuli Yehova lyena pa numa kuti mwamona ifyo aasukapo pa fyo mwalembele. Nga mwamona ifyo aasukapo kuti mwapepa ipepo lya kumutasha. (Belengeni 1 Abena Tesalonika 5:17, 18.) Tontonkanyeni pali ici: Nga ca kuti abantu baletutasha, tulaba ne nsansa kabili tulomfwa ukuti balitutemwa. Ifi fine e fyo na Yehova omfwa nga tuletasha pa mapepo ayo aasuka, cilalenga alesekelela. (Kol. 3:15) Nomba kwaliba umulandu na umbi uwacindama sana uo tufwile ukutashishapo Lesa.
MULETASHA YEHOVA PA KUTUPEELA UMWANA WAKWE UO ATEMWA
10. Ukulingana na mashiwi ayaba pali 1 Petro 2:21, mulandu nshi tufwile ukutashisha Yehova pa kutuma Umwana wakwe Yesu pe sonde?
10 Belengeni 1 Petro 2:21. Tufwile ukutasha Yehova pa kutuma Umwana wakwe uo atemwa ukwisa mu kutusambilisha. Nga tulesambilila pali Yesu tuleshiba ifintu ifingi pali Yehova ne fyo twingacita pa kuti alesekelela. Nga tuli ne citetekelo mwi lambo lya kwa Kristu, tukaba ifibusa sana na Yehova Lesa kabili tukaba no mutende nankwe.—Rom. 5:1.
11. Mulandu nshi tupepela mwi shina lya kwa Yesu?
11 Tulatasha Yehova pantu tulapepa ukupitila mu Mwana wakwe. Yehova abomfya Yesu ukutupeela ifyo twamulomba. Yehova alakutika no kwasuka amapepo ayo tupepa ukupitila mwi shina lya kwa Yesu. Yesu atile: “Conse ico mwalombela mwi shina lyandi, nkacicita, pa kuti Tata acindamikilwe mu Mwana.”—Yoh. 14:13, 14.
12. Mulandu nshi na umbi uo tufwile ukutashisha Yehova pa Mwana wakwe?
12 Yehova alatwelela imembu pa mulandu we lambo lya cilubula ilya kwa Yesu. Amalembo yalondolola Yesu ukuti ni “shimapepo mukalamba uwaikala ku kuboko kwa ku kulyo ukwa cipuna ca bufumu ica Bucindami mu muulu.” (Heb. 8:1) Yesu ni “kaafwa . . . uwaba na Shifwe.” (1 Yoh. 2:1) Ala tulatasha sana Yehova pa kutupeela Shimapepo Mukalamba uwaishiba ukuti tatwapwililika kabili “uutupapaatilako.” (Rom. 8:34; Heb. 4:15) Nga takwali ilambo lya cilubula ilya kwa Yesu, te kuti tulepepa kuli Yehova pantu tatwapwililika. Ukwabula no kutwishika tufwile ukutasha sana Yehova pali ubu bupe ubwacindama ubo atupeele, e kutila Umwana wakwe uo atemwa!
MULEPEPELAKO BAMUNYINENWE NA BANKASHI
13. Ubushiku ilyo Yesu ashilafwa, bushe alangile shani ukuti alitemenwe abasambi bakwe?
13 Ubushiku ilyo Yesu ashilafwa alipepeleko abasambi bakwe pa nshita iitali, kabili alelomba Wishi ukuti ‘alebacingilila ku mubifi.’ (Yoh. 17:15) Ici calangilile fye ifyo Yesu atemenwe abasambi bakwe! Alisakamene sana pa batumwa bakwe nangu ca kuti alishibe ukuti abalwani bakwe bali no kwamba ukumucusha.
Finshi twingapepelako bamunyinefwe na bankashi? (Moneni amaparagrafu 14-16)d
14. Bushe kuti twalanga shani ukuti twalitemwa bamunyinefwe na bankashi?
14 Nga filya fine Yesu alecita, na ifwe tatubika fye amano ku fyo tulekabila. Lelo lyonse tulapepelako bamunyinefwe na bankashi. Nga tulepepelako aba bwananyina, ninshi tuleumfwila ifunde ilyo Yesu atushilile ilya kuti tuletemwana kabili ninshi tulelanga Yehova ifyo twatemwa aba bwananyina. (Yoh. 13:34) Nga tulepepelako aba bwananyina, Yehova kuti abafwilisha ilyo bali na mafya. Icebo ca kwa Lesa citila: “Ilyo umulungami apepa ipepo lya kupapaata, ipepo lyakwe lilaba na maka ayengi pantu lilasukwa.”—Yako. 5:16.
15. Mulandu nshi tulingile ukupepelako aba bwananyina?
15 Aba bwananyina balakabila ukubapepelako pantu balakwata amafya ayengi. Kuti twalomba Yehova ukuti abafwe ukushipikisha ilyo balelwala, ilyo kwacitika amasanso ayakalamba, inkondo, ukubacusha e lyo na mafya yambi. Na kabili kuti twapepelako bamunyinefwe na bankashi abaipeelesha ukwafwilisha aba bwananyina. Nalimo namwishibako bamo abakwete amafya ayo twalandapo. Kuti mwabapepelako, kabili ilyo mulepepa kuti mwabalumbula na mashina. Tulanga ukuti twalibatemwa nga tulelomba Yehova ukuti abafwe ukushipikisha.
16. Mulandu nshi tulingile ukulapepelako abatutungulula?
16 Abatungulula mu cilonganino balatasha sana nga tulebapepelako. Kabili amapepo tubapepelako, yalalenga balebomba bwino umulimo. Umutumwa Paulo na o alefwaya ukuti aba bwananyina balemupepelako. Alembele ukuti: ‘Mulepapaatilako aba mushilo bonse pamo pene na ine, ukuti mpeelwe amaka ya kusosa no kulanda ukwabula umwenso ku kulenga inkama ya kwa Lesa iya mbila nsuma ishibikwe.’ (Efes. 6:18, 19) Muno nshiku na mo twalikwata bamunyinefwe abengi ababombesha abatutungulula. Tulanga ukuti twalibatemwa nga tulelomba Yehova ukuti alebatungilila ilyo balebomba.
NGA BATWEBA UKUPEPELAKO BAMBI
17-18. Ni lilali bengatweba ukupepelako bambi, kabili finshi tufwile ukulaibukisha?
17 Limo kuti batweba ukupepelako bambi. Ku ca kumwenako, nkashi uletungulula isambililo lya Baibolo kuti aeba nkashi uo babombele nankwe ukuti apepe. Nkashi uo baeba ukupepa nalimo te kuti eshibe umusambi bwino. Kanshi nalimo kuti asalapo ukupepa ipepo pa numa ya kusambilila. Ukucita ifi kuti kwalenga aishiba bwino amashiwi ya kubomfya ilyo alepepelako umusambi.
18 Munyinefwe kuti bamweba ukupepa ilyo kuli ukukumana kwa kuya mu mulimo wa kubila imbila nsuma nelyo pa kulongana. Bamunyinefwe abo baeba ukupepa bafwile ukulaibukisha umulandu balepepela. Tatufwile ukulabomfya ipepo ku kulungika nelyo ukubilishishamo fimo ku cilonganino. Ilingi line ukulongana kwa pa cilonganino kulakwata amamineti 5 umo tufwile ukwimba no kupepa. Kanshi munyinefwe uulepepa tafwile ukulanda “amashiwi ayengi” maka maka nga lipepo lya kwiswila ukulongana.—Mat. 6:7.
MULEBIKA SANA AMANO KU KUPEPA
19. Cinshi tufwile ukucita pa kuti tuiteyanye ku bushiku bwa kwa Yehova ubwa bupingushi?
19 Tufwile ukubika sana amano ku kupepa pantu ubushiku bwa bupingushi ubwa kwa Yehova nabupalama. Ici e calengele Yesu alande ukuti: “Mulelola inshita yonse no kulapepa amapepo ya kupapaata pa kuti mukapusuke kuli fyonse ifikacitika.” (Luka 21:36) Ca cine nga tulepepa lyonse, tukakosha icitetekelo cesu kabili tukatwalilila ukuba abalola ilyo ubushiku bwa kwa Yehova bukesa.
20. Bushe amapepo yesu kuti yaba shani nge fyanunkila?
20 Finshi twasambilila? Tulatasha sana pa bupe twakwata ubwa kupepa. Ifintu ifyacindama ifyo tulingile ukupepelapo fintu ifikumine ukufwaya kwa kwa Yehova. Na kabili tulatasha Yehova pa kutupeela Umwana wakwe na pa Bufumu bwakwe kabili tulapepelako na ba bwananyina. Yehova na kabili alafwaya tulepepa pa fyo tukabila cila bushiku na pa kuti aletwafwa ukuba ne citetekelo cakosa. Nga tulebika sana amano ku mashiwi ayo twalalanda ilyo tulepepa, ninshi tulelanga ukuti tulatasha sana pali ubu bupe ubusuma nga nshi ubwa kupepa. Amashiwi yesu yakaba nge fyanunkila ifyo tulepeela kuli Yehova ‘ifikalamusekesha.’—Amapi. 15:8.
ULWIMBO 45 Ifyo Umutima Wandi Utontonkanyapo
a Tulatasha sana Yehova ifi atusuminisha ukulapepa kuli ena. Tufwaya amapepo yesu yaleba nge fyanunkila ku cinso cakwe, ayengalenga asekelela. Muli cino cipande twalasambilila ifyo twingapepelapo ne fyo tulekabila ukutontonkanyapo nga ca kuti batweba ukupepelako aba bwananyina.
b UBULONDOLOSHI BWA CIKOPE: Abalume balepepa na bena mwabo kabili balepepa ukuti umwana wabo ilyo ali ku sukulu acingililwe, balepepela abafyashi babo abakalamba abalwele, e lyo na pa muntu basambilisha Baibolo ukuti alelunduluka.
c UBULONDOLOSHI BWA CIKOPE: Munyinefwe umulumendo aletasha Yehova pe lambo lya cilubula ilya kwa Yesu, pe sonde ubusuma ilyo Lesa apanga e lyo na pa fya kulya ifisuma ifyo tukwata.
d UBULONDOLOSHI BWA CIKOPE: Nkashi alepepa ukuti Yehova alepaala Ibumba Litungulula kabili afwilishe bonse abalecula pa mulandu na masanso, e lyo na bo balecusha.