Bushe Muleibukisha?

Bushe mwalibelenga bwino bwino magazini ya Ulupungu lwa kwa Kalinda iya uno mwaka? Moneni nga kuti mwa-asuka aya mepusho:

Bushe tukanonkelamo shani nga tulesangako inshita ya kulanda na Yehova, ukukutika kuli ena e lyo no kutontonkanya pali ena?

Tukalapingula bwino pa fintu, tukalasambilisha bwino, kabili tukatemenwako Yehova.—w22.01, amabu. 30-31.

Mulandu nshi tulingile ukucetekela Yehova na baume abo asonta ukulatutungulula?

Ino e nshita tufwile ukucetekela sana ifyo Yehova acita ifintu, kabili tatufwile ukulatwishika ifyo baeluda baletweba ukucita. Ilyo kukaba ubucushi bukalamba cikanguka ukumfwila ifyo bakatweba ukucita ifikafya ukumfwikisha nelyo ifikamoneka kwati te kuti fibombe.—w22.02, amabu. 4-6.

Ni mwi malaika aloseshe ilyo alandile ukuti abaYuda ‘bali no kusekelela no kumona intambo ya kupiminako icibumba, iili mu minwe [ya muYuda umulashi] Serubabele?’ (Seka. 4:8-10)

Nangu ca kuti abantu bamo balemona kwati itempele talyakwete ubukata nga filya fyali itempele lya ntanshi, amashiwi malaika alandile yalangilile ukuti bali no kupwisha ukukuula kabili itempele lyali no kuba nga filya fine Yehova alefwaya ukuti libe.—w22.03, amabu. 16-17.

Bushe kuti twaba shani “ica kumwenako . . .  mu milandile”? (1 Tim. 4:12)

Tukalabomfya bwino ubupe bwesu ubwa kulanda ilyo tulebila imbila nsuma, kabili tukalaimba no mweo onse pa kulongana. Na kabili tukalalanda icine lyonse, tukalakuula aba bwananyina, kabili tatwakalelanda amashiwi ayabipa.—w22.04, amabu. 6-9.

Mulandu nshi ifinama 4 ifyo Daniele amwene ifyaba mwi buuku lya kwa Daniele icipandwa 7, fyapangila iciswango cimo mwi buuku lya Ukusokolola 13:1, 2?

Iciswango ico balandapo mu Ukusokolola icipandwa 13 tacimininako imfumu imo nelyo ubuteko bumo pamo ngo buteko bwa bena Roma. Lelo ici ciswango cifwile ukwimininako amabuteko yonse aya maka ayatekapo abantu ukufika pali lelo.—w22.05, ibu. 9.

Finshi tufwile ukucita pa kulanga ukuti Yehova alapingula no mulinganya?

Nga ca kuti umo atutuka, atukalifya nelyo atubembukila, tulesha na maka ukwelela uyo muntu kabili no kuleka Yehova e watulandula. Akafumyapo amafya yonse ayaisako pa mulandu wa lubembu.—w22.06, amabu. 10-11.

Finshi munyinefwe uo bebele ukupepa pa kulongana afwile ukwibukisha?

Tafwile ukubomfya ipepo ku kulungika nelyo ukubilishishamo fimo ku cilonganino. Tafwile ukulanda “amashiwi ayengi” ilyo tulepepa, maka maka ilyo tulepepa amapepo ya kubalilapo. (Mat. 6:7)—w22.07, amabu. 24-25.

Bushe “abalecita ifibi” bakabuukila shani “ku bupingushi”? (Yoh. 5:29)

Tabakabapingwile pa fyo balecita kale. Lelo bakabapingula ukulingana ne fyo bakalacita pa numa ya kubushiwa.—w22.09, ibu. 18.

Finshi munyinefwe J. F. Rutherford alandile pa kulongana kukalamba mu September 1922?

Pa kulongana kukalamba ukwabelele pa Cedar Point mu Ohio, ba Rutherford balilandile pa kuteka kwa Bufumu! Batile: “Imfumu ileteka! Imwe ni mwe babomfi ba Mfumu. E ico sabankanyeni, sabankanyeni, sabankanyeni, Imfumu no Bufumu bwa iko!”—w22.10, amabu. 3-5.

Ni nshila nshi shitatu ishaba muli Esaya icipandwa 30 isho Yehova abomfya pa kuti tushipikishe amafya?

Ici cipandwa cilanga ukuti Yehova (1) alakutika kuli ifwe no kwasuka amapepo yesu, (2) alatutungulula na (3) alatupaala pali ino nshita kabili akatupaala na ku ntanshi.—w22.11, ibu. 9.

Mulandu nshi twingalandila ukuti amashiwi ayaba pa Amalumbo 37:10, 11, 29 yalifikilishiwe ku kale kabili yali no kufikilishiwa ku ntanshi?

Amashiwi ayo Davidi alandile yalangilila ukuti abantu baleikala bwino sana ilyo imfumu Solomone yaleteka. Yesu alandile amashiwi yaba mu cikomo 11 ilyo alelanda pali paradaise iili ku ntanshi. (Mat. 5:5; Luka 23:43)—w22.12, amabu. 8-10, 14.