1 | Ipepo “Mulepoosa Amasakamika Yenu Yonse Pali Ena”

IFYO BAIBOLO ILANDA: “Mulepoosa amasakamika yenu yonse pali Lesa, pantu asakamana imwe.”—1 PETRO 5:7.

Umo Aya Mashiwi Yalola

Yehova Lesa alitweba ukuti tulelanda kuli ena pa fili fyonse ifiletusakamika. (Amalumbo 55:22) Takwaba ubwafya ubwakula sana nelyo ubunono sana ubo tushingapepelapo. Apo Yehova alitubikako amano kuti twamweba fyonse ifiletusakamika. Ukupepa kuli Lesa kuti kwalenga twaba no mutende.—Abena Filipi 4:6, 7.

Ifyo Ifi Fingatwafwa

Nga ca kuti twalilwala amalwele ya matontonkanyo kuti tuletalalilwa sana. Abantu bamo te kuti bomfwikishe ifyo tulepitamo. (Amapinda 14:10) Lelo nga twapepa kuli Lesa no kumweba ifyo tuleumfwa ukufuma panshi ya mutima, akulatulangulukilako pantu ena aleshiba ifyo tumfwa. Apo Yehova alatumona, aleshiba amafya tukwata e lyo ne filetusakamika kabili alafwaya tulepepa kuli ena no kumweba fyonse ifiletucusha.—2 Imilandu 6:29, 30.

Nga tulepepa kuli Yehova twakulashininkisha ukuti alatusakamana. Kuti twaumfwa nge fyaumfwile kemba wa malumbo ilyo apepele ukuti: “Pantu namumona ukucula kwandi; namwishiba amacushi ya mweo wandi.” (Amalumbo 31:7) Ukwishiba fye ukuti Yehova alatubikako amano kabili aleshiba ifyo tumfwa kuti kwalenga twalashipikisha. Ena alatumfwikisha ukucila umuntu uuli onse, kabili alatwafwa ukusanga ifingatusansamusha muli Baibolo.

Ifyo Baibolo Ileafwa Ba Julian

Ifyo Ng’umfwa Nga Nasakamikwa

“Ndasakamikwa sana, limo ndasakamikwa fye ukwabula no kwenekela. Inshita shimo ndaba fye bwino, lyena ukwabula no kwenekela ndesa mu kusakamikwa sana. Kabili ndasakamikwa sana nga ca kuti ndi na bantu pantu nshishiba ifyo baletontonkanya pali ine.

“Abaishiba ubwafya nakwata balambikako sana amano. Kwena inshita shimo ifyo balanda tafingafwa nangu panono. Lelo ndatasha pa fyo baibikilishako ukungafwa.

“Inshita shimo amasakamika yalalenga nafilwa ukupepa. Pa kuti fye mpepe kuli Yehova ndakabila ukutontonkanya sana. Amatontonkanyo yandi yalalulumba sana ica kuti inshita shimo nshishiba ne fya kucita. Inshita shimo amatontonkanyo yalalenga nafilwa ukwishiba ifyo ningalanda kuli Yehova pantu ninshi ndetontonkanya pa fintu ifingi pa muku umo.”

Ifyo Baibolo Ingafwa

“Nalisambilila mu Baibolo ukuti nshilingile ukulamona kwati amapepo yandi nga yalepa sana e lyo Lesa engasuka. Inshita shimo nga nshishibe ifyo ningalanda mwi pepo, nanda fye ukuti: ‘Mwe Yehova, napapata ngafweni.’ Nangu napepa fye ifi ndamona ukuti Yehova alakutika kabili alangafwa. Cimbi ico ncita icilenga ndeumfwako bwino kuyamonana na badokota. Ukucita ifi fibili nalandapo kulalenga ndebako bwino. Ndatemwa sana nga napepa kuli Shifwe wa ku muulu pantu ndamona ifyo ansakamana ne fyo alanga ukuti alintemwa.”