Ifyo Baeluda Bengafwa abo Bafumya mu Cilonganino

1-2. (a) Bushe Yehova amona shani abacita imembu abashifwaya ukulapila? (b) Bushe Yehova afwaya abacita imembu bacita finshi?

YEHOVA tafwaya abantu balecita ifyabipa; alipata ulubembu. (Amalu. 5:​4-6) Afwaya ukuti tulekonka amafunde yakwe ayalungama ayaba mu Cebo cakwe. Kwena Yehova tenekela abantu abashapwililika ukulamumfwila nge fyo bengamumfwila nga bali abapwililika. (Amalu. 130:​3, 4) Na lyo line, tatekelesha ‘abantu abashimutiina, abasangula icikuuku cakwe ukuba akabepekesho ka kucitilamo ifya nsoni.’ (Yuda 4) Na kuba Baibo itila Lesa “akonaula abantu abashipepa” mu nkondo yakwe iya armagedone.—2 Pet. 3:7; Ukus. 16:16.

² Na lyo line, Yehova tafwaya umuntu nangu umo akonaike. Nga fintu tulandilepo mu fipande fili muli luno Ulupungu lwa kwa Kalinda, Baibo ilanda ukwabula ukupita na mu mbali ukuti Lesa “afwaya ukuti bonse bakalapile.” (2 Pet. 3:9) Baeluda balaba abatekanya nga filya Yehova aba ilyo baleafwa uwacitile ulubembu pa kuti aaluke, abwelele na kuli Yehova. Na lyo line, te bonse abacita imembu abalapila. (Esa. 6:9) Bamo balatwalilila ukucita ifyabipa nangu baeluda babafwe pa miku iingi. Finshi baeluda balingile ukucita nga ca kuti umuntu akaana ukulapila?

“FUMYENI UYO UUCITA IFYABIPA” MU CILONGANINO

3. (a) Finshi Baibo ilanda ukuti e fyo baeluda bafwile ukucita nga ca kuti uucitile ulubembu talefwaya ukulapila? (b) Cinshi twingalandila ukuti uucita imembu e usalapo fye umwine ukuti bamufumye mu cilonganino?

³ Uucita ifyabipa nga talefwaya ukulapila, baeluda tabakwata mwakulosha, bakonka ifyaba pali 1 Abena Korinti 5:13 apatila: “Fumyeni uyo uucita ifyabipa mwi bumba lyenu.” Kuti twatila uucita ifyabipa e usalapo umwine ukumufumya mu cilonganino; alasombola ifyo abyala. (Gal. 6:7) Cinshi twalandila ifi? Ni co alakaana ukulapila, nangu ca kuti baeluda balimwafwa pa miku iingi. (2 Isha. 17:​12-15) Ifyo acita filanga ukuti tafwaya ukukonka amafunde ya kwa Yehova.—Amala. 30:​19, 20.

4. Cinshi babilishisha nga ca kuti umuntu uucita ifyabipa uushilapila bamufumya mu cilonganino?

⁴ Nga ca kuti uucitile ulubembu talapiile, bamufumya na mu cilonganino, baeluda balabilisha ku cilonganino ukuti uyo muntu te Nte ya kwa Yehova.a Ico babilishisha ku cilonganino te kuseebanya uucitile ulubembu, lelo ni co bafwaya aba mu cilonganino balakonka ifyo Baibo ilanda ukuti “mufwile ukuleka ukwampana” nankwe “no kulya nankwe.” (1 Kor. 5:​9-11) Kwaliba umulandu uusuma uo Yehova atwebela ukulakonka ifi. Umutumwa Paulo alembele ati: “Icitutumushi icinono citutumusha umufuba onse.” (1 Kor. 5:6) Abacita ifyabipa abashilapila kuti balenga aba mu cilonganino baleka ukufwaisha ukukonka amafunde ya kwa Yehova ayalungama.—Amapi. 13:20; 1 Kor. 15:33.

5. Bushe tufwile ukulamona shani uo bafumya mu cilonganino, kabili mulandu nshi tufwile ukulamumwena ifyo?

⁵ Nomba tufwile ukulamona shani uwa bwananyina uo bafumya mu cilonganino? Nangu ca kuti tulaleka ukwampana nankwe, tufwile ukumumona nge mpaanga iyaluba, tatufwile ukumumona nge mpaanga iishingabwela mu cilonganino. Impaanga iyafuma pa mukuni kuti yabwela. Tufwile ukulaibukisha ukuti umuntu uo bafumya mu cilonganino ali-ipeele kuli Yehova. Ku ca bulanda, alileka ukucita ifyo alaile Yehova, kabili nga talapiile kuti aisafwa. (Esek. 18:31) Na lyo line, apo Yehova wa luse, uyu muntu kuti ayaluka kabili kuti abwelela na mu cilonganino. Nomba finshi baeluda bacita pa kuti bafwe umuntu uwacitile ulubembu uo bafumya mu cilonganino?

IFYO BAELUDA BAFWA ABO BAFUMYA MU CILONGANINO

6. Finshi baeluda bacita pa kuti bafwe uo bafumya mu cilonganino?

⁶ Bushe baeluda nga bafumya umuntu mu cilonganino balaleka ukumwafwa, no kuleka ukuti umwine akaibwelele kuli Yehova? Awe! Ilyo baeluda abali muli komiti bale-eba uwacitile ulubembu uushilapiile ukuti balamufumya mu cilonganino, balamweba ne fyo afwile ukucita pa kuti akabwelele mu cilonganino. Nomba kwaliba na fimbi ifyo aba baeluda bamweba. Ilingi baeluda baleba uo balefumya mu cilonganino ukutila kuti batemwa ukukumana nankwe na kabili pa numa ya myeshi iinono, pa kuti bakamone nga ca kuti na-aluka. Nga ca kuti asumina ukuti bakamukumanye na kabili, ilyo aba baeluda bakamukumanya, bakamukoselesha ukuti alapile no kubwelela mu cilonganino. Nangu ca kuti talapiile ilyo bamukumanya pa numa ya myeshi iinono, baeluda bakatantika ukumukumanya na kabili pa kuti bakamukoseleshe ukulapila.

7. Bushe baeluda bapashanya shani Yehova uwaba sana no luse ilyo baleafwa umuntu uo bafumya mu cilonganino? (Yeremia 3:12)

⁷ Baeluda balesha na maka ukupashanya ifyo Yehova aba no luse ilyo baleafwa uo bafumya mu cilonganino. Ku ca kumwenako, Yehova talolelele ukuti abena Israele bakalapile e lyo akatendeke ukubafwa. Lelo alebatumina bakasesema ninshi tabalati balapile no kulapila. Nga fintu twasambilile mu cipande calenga bubili, pa kulangilila ifyo aba sana no luse, Yehova aebele kasesema Hosea ukuti abweshe umukashi wakwe, ninshi umukashi wakwe acili alacita imembu. (Hos. 3:1; Mal. 3:7) Apo baeluda balapashanya Yehova, balafwaya sana ukuti uwacitile ulubembu alapile no kubwelela mu cilonganino, kabili tabacita ifingalenga ca mukosela ukulapila.—Belengeni Yeremia 3:12.

8. Bushe icilangililo Yesu alandile ica mwana walubile, cilenga shani twaishiba bwino ifyo Yehova aba no luse? (Luka 15:7)

⁸ Tontonkanyeni pa cilangililo Yesu alandile ica mwana walubile, ico twalandilepo mu cipande calenga bubili. Ilyo wishi amwene umwana wakwe abwela, “alimubutukiile amukumbatila no kumukumbatila e lyo amutomona.” (Luka 15:20) Nga namumona, wishi talolelele ukuti umwana wakwe alombe ubwelelo. Lelo wishi alibutukiile umwana wakwe pantu alimutemenwe. Ifi fine e fyo na baeluda bacita. Balalanga ukuti balitemwa uucitile ulubembu. Bafwaya ukuti abataluka kuli Yehova babwelele kuli ena. (Luka 15:​22-24, 32) Uwacitile ulubembu nga alapila, ku muulu balasekelela, kabili na pe sonde na po balasekelela!—Belengeni Luka 15:7.

9. Bushe Yehova akoselesha abacita imembu ukuti bacite cinshi?

⁹ Ifyo twalandapo ukufika pano, fyalanga fye apabuuta tuutu ukuti Yehova tatekelesha abacita imembu abashilapila. Na lyo line, alatwalilila ukwafwa abacita imembu. Afwaya babwelela kuli ena. Moneni ifyo Yehova omfwa abacitile imembu nga balapila. Pali Hosea 14:4 patila: “Nkabondapa pa kuti bakaleke ukukanaba ne cishinka. Nkaitemenwa fye ukubatemwa, pantu ubukali bwandi nabufuma pali bena.” Aya amashiwi yalalenga baeluda balabika sana amano ku filanga ukuti umuntu nalapila, kabili yalalenga abafuma kuli Yehova balafwaisha ukubwelela kuli ena.

10-11. Bushe baeluda kuti ba-afwa shani aba kuti kale babafumya mu cilonganino?

¹⁰ Bushe baeluda kuti ba-afwa shani aba kuti babafumishe mu cilonganino kale, nalimo palipita ne myaka iingi? Aba bantu nalimo balileka no kucita imembu ishalengele babafumye mu cilonganino. Bamo nalimo balilaba no kulaba icalengele babafumye mu cilonganino. Nangu ca kuti kale babafumishe mu cilonganino, baeluda bakesha na maka ukufwaya abantu ba musango yu no kubatandalila. Nga babatandalila, baeluda kuti bapepela pamo nabo no kubakoselesha ukuti babwelele ku cilonganino. Nga ca kuti palipita imyaka iingi ukutula apo umuntu bamufumiishe mu cilonganino, ukwabula no kutwishika alabwelela sana panshi mu fya kwa Lesa. Kanshi nga alanga ukuti alefwaisha ukubwelela ku cilonganino, baeluda bakasala kasabankanya uukatendeka ukumusambilisha Baibo, nangu ca kuti tabalamubwesha mu cilonganino. Lyonse baeluda e bafwile ukutantika uwa kusambilisha Baibo umuntu uo bafumya mu cilonganino.

¹¹ Apo baeluda balafwaya ukupashanya ifyo Yehova aba no luse, balafwaisha ukwafwa bonse abafuma kuli Yehova no kubakoselesha ukuti babwelele kuli ena. Uwacitile ulubembu nga alanga ukuti nalapila kabili aleka no kucita ifyabipa ifyo alecita, kuti bamubwesesha mu cilonganino ukwabula ukupoosa ne nshita.—2 Kor. 2:​6-8.

12. (a) Bantu ba musango nshi abo baeluda balingile ukucenjela nabo ilyo bashilababwesha mu cilonganino? (b) Mulandu nshi tushilingile ukulamwena ukuti abacita imembu bamo Yehova te kuti ababelele uluse? (Moneni na futunoti.)

¹² Limo baeluda bafwile ukucenjela ilyo bashilabwesha umuntu mu cilonganino. Ku ca kumwenako, nga ca kuti umuntu alecusha abana nelyo ali musangu nangu alicitile ulubembu pa kuti apwishe icupo, baeluda bafwile ukushininkisha ukuti alilapila icine cine. (Mal. 2:14; 2 Tim. 3:6) Bafwile ukucingilila impaanga. Na lyo line, tufwile ukwishiba ukuti Yehova akapokelela uwacitile ulubembu nga alapila icine cine kabili aleka no kucita ifyabipa. Kanshi nangu ca kuti baeluda bafwile ukucenjela ilyo bashilabwesha abafyengele abantu bambi, tabafwile ukulamona kwati abantu ba musango yu Yehova te kuti ababelele uluse.b—1 Pet. 2:10.

IFYO ABA MU CILONGANINO BENGACITA

13. Bupusano nshi bwabapo pa fyo tumona umuntu uo baeluda balungika e lyo ne fyo tumona uo bafumya mu cilonganino?

¹³ Nga fintu twalandile mu cipande cafumineko, inshita shimo baeluda kuti babilisha ukuti umuntu nabamulungika. Nga cabe ifi, kuti twatwalilila ukwampana na uyo muntu. Pantu ninshi natwishiba ukuti alilapila kabili alileka no kucita ifyabipa. (1 Tim. 5:20) Apo tabamufumishe mu cilonganino, alakabila ukuti bamunyinefwe na bankashi balemukoselesha pa kuti engatwalilila ukucita ifyalungama. (Heb. 10:​24, 25) Nomba ifi te fyo tucita ku muntu uo bafumya mu cilonganino. ‘Tulaleka ukwampana’ nankwe “no kulya nankwe.”—1 Kor. 5:11.

14. Bushe Abena Kristu kuti babomfya shani kampingu yabo iyo basambilisha Baibo pa kusalapo ifya kucita ku muntu uo bafumya mu cilonganino? (Moneni ne cikope)

¹⁴ Bushe ifi twalanda pa o bafumya mu cilonganino, filolele mu kuti te kuti tumwite ukwisa mu kulongana nangu ukumuposha nga aisa mu kulongana? Awe nakalya. Nomba tatufwile ukwampana nankwe. Lelo Umwina Kristu kuti abomfya kampingu yakwe iyo asambilisha Baibo pa kusalapo ukwita uo bafumya mu cilonganino ukwisa mu kulongana. Nalimo uo bafumya mu cilonganino kuti aba ni lupwa wakwe nelyo uwali cibusa wakwe. Finshi twingacita nga aisa mu kulongana? Kale, tatwaleposha uo bafumya mu cilonganino. Apa napo Umwina Kristu onse kuti abomfya kampingu yakwe iyo asambilisha Baibo pa kusalapo ifya kucita. Bamo kuti basalapo ukumuposha nelyo ukumupokelela nga aisa mu kulongana. Na lyo line, tatufwile ukulanshanya nankwe pa nshita iitali nelyo ukupoosa inshita iikalamba nankwe.

15. Ni bani abo ilembo lya kwa 2 Yohane 9-11 lilandapo? (Moneni na kabokoshi akaleti “Bushe Ulubembu ulo Yohane Alandilepo Lumo Lwine na ulo Paulo Alandilepo?”)

¹⁵ Bamo nalimo kuti balatontonkanya abati, ‘Bushe Baibo tailanda ukuti Umwina Kristu uwaposha uo bafumya mu cilonganino ninshi akumako ku milimo yakwe iyabipa?’ (Belengeni 2 Yohane 9-11.) Ili ilembo lilanda pa basangu na bakoselesha abantu ukucita ifyabipa. (Ukus. 2:20) Kanshi umuntu nga aletungilila ifisambilisho fya basangu nelyo nga alekoselesha abantu ukulacita ifyabipa, baeluda te kuti bamutandalile. Na lyo line tulatwalilila ukucetekela ukuti umuntu wa musango yu kuti ayaluka. Umuntu wa musango yu nga tala-aluka, tatufwile ukumuposha nelyo ukumwita ukwisa mu kulongana.

MULEPASHANYA YEHOVA UWABA NO LUSE KABILI UULANGULUKILAKO ABACITA IMEMBU

16-17. (a) Bushe Yehova afwaya abacita imembu bacita cinshi? (Esekiele 18:32) (b) Bushe baeluda balanga shani ukuti babombela pamo na Yehova ilyo baleafwa abacita imembu?

¹⁶ Finshi twasambilila mu fipande 5 ifili muli luno Ulupungu lwa kwa Kalinda? Yehova tafwaya umuntu nangu umo akonaike! (Balengeni Esekiele 18:32.) Afwaya abacita imembu babwelela kuli ena. (2 Kor. 5:20) E mulandu wine ukutula fye na kale, Yehova ebela ababomfi bakwe pa miku iingi abaleka ukumumfwila ukuti balapile kabili babwelele kuli ena. Baeluda mu cilonganino balabombela pamo na Yehova ilyo baleafwa uwacitile ulubembu pa kuti alapile.—Rom. 2:4; 1 Kor. 3:9.

¹⁷ Elenganyeni ifyo aba ku muulu basekelela umubembu nga alapila! Lyonse umuntu uwacitile ulubembu nga abwelela ku cilonganino, Shifwe wa ku muulu Yehova alasekelela. Nga twatontonkanya sana pa fyo Yehova alangulukilako abacita imembu, pa fyo ababelela uluse na pa fyo abalanga icikuuku cakwe icaibela, tulamutemenwako.—Luka 1:78.