Bushe Inte sha kwa Yehova Bamona Shani Abantu abo Bafumya mu Cilonganino?

Tulesha na maka yesu yonse ukucita ifilanga ukuti twalitemwa abantu bonse, twalibacindika, kabili twaliba ne cikuuku. Nga ca kuti Inte ya kwa Yehova umo aleka ukubombela Yehova nge fyo alemubombela kale nelyo aleka ukupepa Yehova, tulafwaisha ukumwafwa, no kumulanga ukuti twalimutemwa, kabili tulesha ukumwafwa ukupalama kuli Yehova na kabili.—Luka 15:4-7.

Inshita shimo, ifyo umuntu alecita nelyo ifyo acitile kuti fyalenga bamufumya mu cilonganino. (1 Abena Korinti 5:13) Na lyo line, apo twalitemwa sana Abena Kristu banensu, tulabafwa ukuleka ukucita ifyabipa pa kuti bebafumya mu cilonganino. Na kabili, nangu ca kuti umo bamufumya mu cilonganino, tulatwalilila ukucita ifilanga ukuti twalimutemwa kabili twalimucindika, nga fintu Baibo itukoselesha ukulacita.—Marko 12:31; 1 Petro 2:17.

Finshi fingalenga ukuti bafumye umuntu mu cilonganino?

Baibo ilondolola ukuti Umwina Kristu nga acita ulubembu ulukalamba kabili akana ukulapila, bafwile ukumufumya mu cilonganino.a(1 Abena Korinti 5:11-13) Baibo ilatweba imembu ishikalamba ishingalenga umo bamufumya mu cilonganino. Ku ca kumwenako, imembu shimo ishikalamba isho yalandapo bucende, bu cakolwa, ukwipaya, ukucusha aba mu ng’anda, no bupuupu.—1 Abena Korinti 6:9, 10; Abena Galatia 5:19-21; 1 Timote 1:9, 10.

Na lyo line, tatwangufyanya ukufumya umuntu uucitile ulubembu ulukalamba mu cilonganino. Baeludab balabalilapo ukwafwa uucitile ulubembu ulukalamba pa kuti aleke ukucita ifyabipa. (Abena Roma 2:4) Balesha ukulungika umuntu uucitile ulubembu no mutima uwafuuka, balanakilila, kabili balaba ne cikuuku. (Abena Galatia 6:1) Ukucita ifi kulalenga uucitile ulubembu ailuka icilubo acitile kabili ici cilalenga alapila. (2 Timote 2:24-26) Lelo nga ca kuti atwalilila fye ukucita ifyabipa na pa numa ya kumwafwa kuli baeluda, ninshi bafwile ukumufumya mu cilonganino. Baeluda babilisha fye ku cilonganino ukuti uyo muntu nomba te Nte ya kwa Yehova.

Baeluda babili bali ne cikuku ilyo balelanshanya amalembo na munyinefwe umwaice. Eluda umo namwikata pa mabeya ilyo alelanda nankwe. — Baeluda balabombesha ukwafwa umuntu uulecita ifyabipa pa kuti aleke ukucita ifyabipa, balaba abafuuka, abanakilila kabili balaba ne cikuku ilyo balecita ifi

Busuma nshi bwaba mu kufumya umuntu mu cilonganino, uwasalapo ukutwalilila ukucita ifyabipa? Ubusuma bumo ubwabamo bwa kuti, icilonganino cilatwalilila ukuba ica busaka ukulingana na mafunde ya kwa Yehova, kabili cilacingililwa na ku fyabipa ifyo uyo muntu alecita. (1 Abena Korinti 5:6; 15:33; 1 Petro 1:16) Ubusuma bumbi bwa kuti, ukufumya umuntu uushilapila mu cilonganino kuti kwalenga aleka ukucita ifyabipa kabili atendeka no kucita ifisuma.—AbaHebere 12:11.

Bushe Inte sha kwa Yehova bamona shani abantu abo bafumya mu cilonganino?

Baibo ilanda ukuti Abena Kristu bafwile ‘ukuleka ukwampana’ no muntu uo bafumya mu cilonganino, kabili tabafwile fye “no kulya nankwe.” (1 Abena Korinti 5:11) Kanshi ta tubishanya no muntu bafumya mu cilonganino. Na lyo line, tatuleka ukumubikako amano. Tulatwalilila ukumucindika. Alikwata insambu isha kwisa mu kulongana, kabili nga ca kuti aisa, Inte sha kwa Yehova bamo kuti basalapo ukumuposha.c Nga alefwaya kuti alomba na baeluda ukuti bamwafwe ukutendeka ukubombela Yehova na kabili.

Abaupana bali pa Ng’anda ya bufumu, bali ne nsansa ilyo baleposha umuntu uo bafumishe mu cilonganino. — Bonse abo bafumya mu cilonganino kuti baisa mu kulongana pamo naifwe

Finshi ficitika ku muntu uwa kuti bamufumya mu cilonganino lelo umwina mwakwe na bana bakwe abanono ni Nte sha kwa Yehova? Balaleka ukucitila pamo ifya kwa Lesa, lelo balatwalilila ukuba ulupwa. Apo bekala mu ng’anda imo ine, icupo cilatwalilila kabili balatwalilila no kucita ifilanga ukuti balitemwana mu lupwa.

Umuntu uo bafumya mu cilonganino kuti alomba baeluda ukumutandalila, kabili nga bamutandalila kuti bamwafwa ukubomfya amalembo no kumupaapaata ukuti alapile no kubwelela kuli Yehova na kabili. (Sekaria 1:3) Nga ca kuti aleka ukucita ifyabipa kabili alacita ne filelanga ukuti alefwaisha ukulakonka amafunde ya mu Baibo, kuti bamubwesha mu cilonganino na kabili. Aba mu cilonganino ‘balingile fye ukumubelela uluse no kumusansamusha’ nga fintu Abena Kristu ba mu Korinti bacitile ku muntu uwalekele ukucita imembu.—2 Abena Korinti 2:6-8.

Bushe abo bafumishe mu cilonganino kale bomfwa shani?

Moneni ifyalandile Inte sha kwa Yehova bamo abo bafumishe mu cilonganino lelo abasalilepo ukubwelela kuli Lesa.

“Ilyo nasalilepo ukubwela mu cilonganino, naletontonkanya ukuti nalimo baeluda bakafwaya ukwishiba fyonse ifyo nalecita pa myaka yonse iyo nafumine mu cilonganino. Lelo banjebele fye ukuti, ‘Tulefwaya fye utendeke ukubombela Yehova na kabili.’ Ifi banjebele fyalilengele naumfwa bwino.”—E fyalandile ba Maria, aba ku United States.

“Aba mu cilonganino balitemenwe sana ukuti nalibwelele mu cilonganino. Nalimwene ukuti balimbikileko amano. Bamunyinefwe na bankashi mu cilonganino balecita ifyalelanga ukuti bena na Yehova balimbelele uluse, ne ci calengele mbike sana amano ku fyo nali no kulabombela Yehova. Baeluda lyonse balengafwa ukuba sana cibusa wa kwa Yehova. Balenkoselesha sana kabili balilengele namona ukuti Yehova acili alimbikako amano kabili alintemwa.”—E fyalandile ba Malcom, aba ku Sierra Leone.

“Naliba ne nsansa pantu nalishiba ukuti Yehova alitemwa sana abantu bakwe ica kuti alafwaya icilonganino cakwe catwalilila ukuba ica busaka. Nangu ca kuti abantu bamo bamona kwati ukufumya umuntu mu cilonganino kwalibipa, calicindama ukucita ifyo kabili cilanga fye ukuti twalitemwa uo bafumishe mu cilonganino. Ndatasha sana ifi Shifwe wa ku muulu aba sana no kutemwa e lyo ne fi atubelela uluse.”—E fyalandile ba Sandi, aba ku United States.

Ifyalandile abaishiba sana amafunde ya buteko abashili Inte sha kwa Yehova

Finshi amafunde ya buteko e lyo na basambilila sana aya amafunde balandapo pali ifi Inte sha kwa Yehova bafumya abantu abacita ifyabipa kabili abashilapila mu cilonganino? Moneni ifyo bamo balandapo.

“Kuti twaenekela ukuti icilonganino ca mapepo icikonka sana amashinte ya mafunde ya mu Baibo calikwata insambu na maka ya kufumya umubembu mu cilonganino apo calinga ukucita ifyo. Calicindama ukucita ifi, pantu umuntu nga talekonka amashinte ya mafunde ya mu Baibo, te kuti afikepo ukuba muli ico icilonganino ca mapepo, kabili nga tabamufumishe mu cilonganino kuti alenga na bambi aba mu cilonganino baleka ukukonka amashinte ya mafunde ya mu Baibo.”—E fyalandile icilye ca The High Court of Justice, England and Wales, pa 7 June , mu 2019.
“Ifilye fya mu Europe e lyo na mu fyalo fimbi fyalipingulapo ukuti filya Inte sha kwa Yehova bafumya umuntu mu cilonganino fyaliba fye bwino. Tafilenga batoba insambu bakwata nge cilonganino ca mapepo, kabili ifilye fya buteko tafyakwata insambu sha kupingula imilandu iya kuma uo bafumya mu cilonganino.”—E fyalandile ba Professor Paulo Pinto de Albuquerque, abali kale bakapingula mu cilye cikalamba ica European Court of Human Rights.

a Akale twalelanda ukuti umuntu uushifwaya ukulapila nabamutamfya mu cilonganino. Lelo pali ino nshita tubomfya amashiwi ayo babomfya mu Baibo, tulanda fye ukuti nabamufumya mu cilonganino.

b Baeluda Bena Kristu abaume abakalamba mu fya kwa Lesa abasambilisha ukubomfya amalembo kabili abasakamana abantu ba kwa Yehova ilyo balebafwa no kubakoselesha. Tabafola ilyo balebomba uyu milimo.—1 Petro 5:1-3.

c Inshita shimo, umuntu kuti afuma mu cilonganino lyena pa numa atendeka ukulanda ifyabipa nelyo ukusuusha icilonganino pa kuti fye onaule ishina lya cilonganino nelyo ukufuupula aba mu cilonganino pa kuti nabo batendeke ukulacita ifyabipa. Ifi nga fyacitika, tulakonka ifunde lya mu Baibo ilitila tatufwile ukuposha uyu muntu.—2 Yohane 9-11.