Mulepituluka mu Fishinka Ifikalamba

Bushe calimukoselapo ukwibukisha ifyo mwacilaisambilisha? Bonse fye ici cilatucitikila inshita shimo. Cinshi mwingacita? Kupituluka mu fishinka ifikalamba.

Ilyo muleisambilisha, mulebala mwaleka ukuisambilisha pa kuti mutontonkanye pa fishinka ifikalamba ifyo mwasambilila. Ifi fine e fyo umutumwa Paulo akoseleshe abalebelenga kalata iyo abalembeele ukucita. Alembele ati: “Nomba icishinka cikalamba pa fyo tulelandapo, ni ci.” (Heb. 8:1) Ifi abebele fyalengele bomfwe ifyo alelandapo, kabili bamone ifyo ifishinka fyaikatene.

Pa numa ya kuisambilisha, kuti mwashako inshita, nalimo amamineti 10 aya kupituluka mu fishinka ifikalamba ifili mu fyo mwacilaisambilisha. Nga tamuleibukisha sana ifishinka ifikalamba, kuti mwabelenga utumitwe utunono na kabili, nelyo kuti mwabelenga sentensi ya kubalilapo muli cila paragrafu pa kuti mwibukishe. Nga kuli ifipya ifyo mwasambililako, mule-esha ukufilondolola mu mashiwi yenu. Nga mulepituluka mu fishinka ifikalamba, mukalaibukisha ifyo muleisambilisha kabili mukalaishiba bwino ifyo mwingalakonka ifyo muleisambilisha.