Ico fwe Bantu Twafililwa Ukupwisha Inkondo

ULUBEMBU

Lesa abumbile abafyashi besu aba kubalilapo e kutila Adamu na Efa mu cipasho cakwe. (Ukutendeka 1:27) Ici cilepilibula ukuti Lesa ababumbile mu nshila ya kuti, baleba ne mibele iyo na o akwatako pamo nga ukutemwa e lyo no mutende. (1 Abena Korinti 14:33; 1 Yohane 4:8) Nangu cibe ifyo, Adamu na Efa balibembukile Lesa, ne ci calilenga ifwe bonse tupyane ulubembu kabili tulefwa. (Abena Roma 5:12) Ulubembu twapyana lulalenga tuletontonkanya pa kucita ifyabipa kabili lulenga tulecita ubunkalwe.—Ukutendeka 6:5; Marko 7:​21, 22.

AMABUTEKO YA BANTUNSE

Lesa tatupangile mu nshila ya kuti tuleiteka. Baibo itila: “Umuntu takwata amaka ya kuitungulula. Te kuti atungulule nangu fye ni ntampulo shakwe.” (Yeremia 10:23) Uyu e mulandu amabuteko ya bantunse yafililwa ukupwisha inkondo.

SATANA NE FIBANDA FYAKWE

Baibo itila: “Icalo conse caba mu maka ya mubifi.” (1 Yohane 5:19) Uyu “umubifi” ni Satana Kasebanya kabili alitemwa sana ukwipaya. (Yohane 8:44) Satana e lyo ne fibanda fyakwe ifishimoneka e balenga ukuti mu calo muleba sana inkondo e lyo no bunkalwe.—Ukusokolola 12:​9, 12.