Mulebomfya Bwino Baibo

Umusambi Yakobo alingenye Baibo ku cilola pantu ilalenga twaishiba bwino ifyo twaba. (Yako. 1:​22-25) Kuti twacita shani pa kuti tulebomfya bwino Baibo nga filya tubomfya icilola?

Muleteka umutima ilyo mulebelenga. Nga ca kuti twalolesha fye pa cilola lubilo lubilo, te kuti tumone bwino ifyo tulemoneka. Ifi fine e fyo caba na ku kubelenga Baibo. Nga ca kuti tulebelenga lubilo lubilo, te kuti twishibe ifyo tufwile ukwalukamo. Kanshi tulingile ukuteka umutima ilyo tulebelenga Baibo.

Mulebika amano ku fyo mulingile ukwalukamo, te ku fyo abantu bambi balingile ukwalukamo. Inshita shimo, nga ca kuti tulelolesha mu cilola, e lyo umuntu umbi ali mupepi, na o wine kuti twamumona mu cilola kabili kuti twabika amano ku filubene pali ena, ukucila ukubika amano ku filubene pali ifwe bene. Ifi fine e fyo cingaba na lintu tulebelenga Baibo. Kuti twalabika fye amano ku fyo abantu bambi balingile ukwalukamo ukucila ukubika amano ku fyo ifwe bene tulingile ukwalukamo. Nga tulecita ifi, te kuti twaluke umo tulingile ukwaluka.

Mwilaenekela ukucita ifyo mushingakwata amaka ya kucita. Nga ca kuti ilyo twalolesha mu cilola twabika fye amano ku fyo tushilemoneka bwino, kuti twafuupuka. Ilyo tulebelenga Icebo ca kwa Lesa, tatulingile ukulaenekela ukuba ifyo tushingaba. Yehova na o tatwenekela ukucita ifyo tushingakwata amaka ya kucita.—Yako. 3:17.