Bushe Yehova Amumona Shani?
1. Bushe Baibolo yaba shani kwati cilola?
1 Bushe miku inga mulolesha mu cilola? Fwe bengi tulaloleshamo cila bushiku pantu tufwaya ukwishiba ifyo tulemoneka, kabili nga twamona pamo tapali bwino, tulaiwamya. Baibolo nayo yaba kwati cilola. Nga tuleibelenga kuti yatwafwa ukwishiba bwino ifyo twaba ne fyo Yehova atumona. (1 Sam. 16:7; Yako. 1:22-24) Icebo ca kwa Lesa “cileshiba amatontonkanyo na mapange ya mutima.” (Heb. 4:12) Bushe ukubelenga Baibolo cila bushiku no kulatontonkanya sana pa fyo twabelenga, kuti kwatwafwa shani ukwishiba umo tulingile ukuwamya pa kuti tube Abena Kristu abasanguluka?—Amalu. 1:1-3.
2. Bushe Baibolo kuti yatwafwa shani ukuiceeceeta?
2 Mulebomfya Baibolo Kwati Cilola: Amalyashi ya babomfi ba cishinka aba kwa Yehova ayalembwa mu Baibolo yalatusambilisha imibele iisuma iyo Yehova afwaya ukuti tube nayo. Ku ca kumwenako, Davidi ali uwacincila mu kulenga ishina lya kwa Lesa ukube lya mushilo. (1 Sam. 17:45, 46) Esaya alishipile no kuipeelesha ukushimikila ku bantu abali abayafya. (Esa. 6:8, 9) Ifyo Yesu atemenwe Wishi wa ku muulu fyalengele ukuti aletemwa ukushimikila, talemona uyu mulimo ukuti cisendo. (Yoh. 4:34) Abena Kristu abaliko mu nshiku sha batumwa bali abacincila mu kushimikila, baleshintilila pali Yehova ilyo baleshimikila, kabili tabalefwaya ukuleka uyu mulimo. (Imil. 5:41, 42; 2 Kor. 4:1; 2 Tim. 4:17) Ukutontonkanya sana pali aba twalandapo, kuti kwalenga twamona umo tulingile ukuwamyako pa kuti tulebomba bwino umulimo wa kwa Lesa.
3. Mulandu nshi tushilingile ukulashingashingila ukuwamyako umo tulepelebela?
3 Mulewamya umo Mulepelebela: Kwena icilola te kuti cibombe nangu cimo nga ca kuti ilyo twaloleshamo, twakaana ukuwamya ifishili bwino. Tufwile ukupepa kuli Yehova ukuti aletwafwa pa kuti tuleiceeceeta bwino, no kumulomba ukuti aletwafwa ukuwamya umo tulepelebela. (Amalu. 139:23, 24; Luka 11:13) Apo inshita isheleko naicepa, tatufwile ukulashingashinga ukuwamyako umo twapelebela pantu kuti twaisafwa.—1 Kor. 7:29; 1 Tim. 4:16.
4. Bushe muntu uulolesha mu Cebo ca kwa Lesa no kukonka ifyo cilanda aba shani?
4 Ifyo Yehova amona mu kati ka mutima wa muntu, e fyacindama sana ukucila ifyo amoneka kunse. (1 Pet. 3:3, 4) Bushe umuntu uulolesha mu Cebo ca kwa Lesa no kukonka ifyo abelengamo aba shani? “Uyu muntu, apo tomfwa fye no kulabako, lelo alacita ifyo icebo cisosa, akaba uwa nsansa ilyo alecita ifyo fine.” (Yako. 1:25) Kanshi nga ca kuti “ubukata bwa kwa Yehova bulemonekela pa mpumi shesu,” tukaba ne nsansa kabili tukalabomba bwino sana umulimo wa kushimikila.—2 Kor. 3:18.