Mulesambililako ku Malembo Ayaba pa Kati ke Bula Limo na Limo Ilya mu Baibo

Amalembo ayaba pa kati ke bula limo na limo muli Baibo—Amalembo ya Calo Cipya, yalangilila ukuti ifyo Baibo ilandapo tafipilikana. Yalalenga umuntu asanga amalembo na yambi ayengalenga aishibilapo na fimbi pa lyashi ilyo alebelengapo. Pa kusanga aya malembo, mufwile ukumona icilembo icinono iciba pa mpela ye shiwi. Nga mulebomfya Baibo iyo bapulinta, mufwile ukufwaya ici cine icilembo pa kati ke bula pa kuti musange amalembo na yambi ayalanda pa lyashi ilyo mulebelengapo. Nga mulebomfya Baibo ya pa jw.org nelyo iya pa JW Library, mulingile ukutinika pali ico cine cilembo pa kuti mumone amalembo na yambi.

Amalembo ayaba pa kati ke bula limo na limo, kuti yalenga mwasanga ifintu pamo nga:

Amalembo ayalanda pa lyashi limo line: Aya malembo kuti yalenga mwasanga ilyashi limo line mu mabuuku yambi aya mu Baibo. Ku ca kumwenako, moneni 2 Samwele 24:1 na 1 Imilandu 21:1.

Amashiwi ayo ba-ambula: Aya malembo kuti yalanga ilembo ilyo ba-ambulapo amashiwi yamo. Ku ca kumwenako, moneni Mateo 4:4 na Amalango 8:3.

Ifyo ubusesemo bwafikilishiwe: Aya malembo kuti yalangilila ifyo ubusesemo bumo bwafikilishiwe. Ku ca kumwenako, moneni Mateo 21:5 na Sekaria 9:9.