Ifyo Mwingacita pa Kuti Mulepepa Ukufuma Panshi ya Mutima

1-2. (a) Cinshi cingalenga catukosela ukulondolwela Yehova fyonse ifyo tuleumfwa ilyo tulepepa? (b) Cinshi calenga twishibe ukuti Yehova alakutika nga tulepepa?

BUSHE inshita shimo mulomfwa ukuti mulanda fye fimo fine ilyo mulepepa, kabili tamupepa ukufuma panshi ya mutima? Ifi nga e fyo mupepa, te imwe mweka mupepa ifi. Pa mulandu wa kuti tulakwata ifya kucita ifingi, inshita shimo tulakwankwanya ukupepa. Nelyo kuti catukosela ukulondolwela Yehova fyonse pantu kuti tulemona ukuti tatwalinga ukupepa kuli ena.

² Babo itweba ukuti ico Yehova abikako sana amano te butali bwa mapepo, lelo fintu tulelanda ifilefuma panshi ya mutima ilyo tulepepa. Yehova alomfwa “ukupaapaata kwa bafuuka.” (Amalu. 10:17) Alakutika fyonse ifyo tulelanda ilyo tulepepa pantu alitubikako sana amano.—Amalu. 139:​1-3.

3. Mepusho nshi twala-asuka muli cino cipande?

³ Kanshi kuti twaipusha atuti: Cinshi tushilingile ukulatiinina ukweba Yehova fyonse ifyo tuleumfwa ilyo tulepepa kuli ena? Kuti twacita shani pa kuti tulepepa amapepo ayengalenga twaba sana ifibusa na Yehova? Bushe nga tuletontonkanya pa mapepo ayo ababomfi ba kwa Yehova balepepa ayalembwa mu Baibo, kuti calenga shani twalapepa amapepo ukufuma panshi ya mutima? Kabili kuti twacita shani nga natusakamikwa sana ica kuti tulefilwa no kweba Yehova ifyo tuleumfwa? Twala-asuka aya mepusho muli cino cipande.

TAMUFWILE UKULATIINA UKUPEPA KULI YEHOVA

4. Mulandu nshi tushifwile ukulatiinina ukweba Yehova fyonse ifyo tuleumfwa ilyo tulepepa kuli ena? (Amalumbo 119:145)

⁴ Nga twaishiba ukuti Yehova ni cibusa wesu uwa cishinka, kabili afwaya ifintu filetuwamina, tatwakulatiina ukumweba ifyo tuleumfwa e lyo ne fyo tuletontonkanya. Ifi fine e fyo uwalembele Amalumbo 119 alemona Yehova ilyo alepepa kuli ena. Kwena na o wine alekwata amafya. Ku ca kumwenako, abantu abalecita ifyabipa balemubepesha ubufi. (Amalu. 119:​23, 69, 78) Kabili inshita shimo alefuupuka pantu alelufyanya. (Amalu. 119:5) Na lyo line taletiina ukweba Yehova fyonse ifyo aleumfwa.—Belengeni Amalumbo 119:145.

5. Mulandu nshi tushilingile ukuleka ifyo tuimona fyalenga twalafilwa ukupepa kuli Yehova? Langilileni.

⁵ Yehova afwaya na ba kuti balicita imembu ishikalamba balepepa kuli ena. (Esa. 55:​6, 7) Kanshi tatulingile ukuleka ifyo tuimona fyalenga twalafilwa ukupepa kuli Yehova. Natulangilile, umuntu nga naluba bushe kuti aumfwa insoni sha kwipusha abengamulangilila bwino uko aleya? Awe. Na ifwe inshita shimo nga tatwishibe ifya kucita pa fintu fimo nelyo nga natubembuka, tatufwile ukutiina ukupepa kuli Yehova.—Amalu. 119:​25, 176.

IFYO MWINGALAPEPA PA KUTI MUBE IFIBUSA SANA NA YEHOVA

6-7. Cinshi cingalenga twalaeba Yehova fyonse ifyo tuleumfwa? Landeni pa ca kumwenako. (Moneni na futunoti.)

⁶ Nga tule-eba Yehova fyonse ifyo tuletontonkanya ne fyo tuleumfwa kuti twaba sana ifibusa fyakwe. E ico kuti twacita shani pa kuti tule-eba Yehova fyonse ifyo tuletontonkanya e lyo ne fyo tuleumfwa ilyo tulepepa kuli ena?

⁷ Muletontonkanya pa mibele iyo Yehova akwata.a Nga ca kuti tuletontonkanya pa mibele iyo Yehova akwata, cikalatwangukila ukumweba fyonse ifyo tuleumfwa e lyo ne fyo tuletontonkanya. (Amalu. 145:​8, 9, 18) Natulande pali nkashi Kristine uwakwete bawishi abali abankalwe. Uyu nkashi alandile ati: “Calenkosela ukupepa kuli Yehova no kusumina ukuti ni Shifwe uwaba no kutemwa. Nalemona ukuti ifyo nalelufyanya fyali no kulenga aleka ukuntemwa.” Mibele nshi iyo Yehova akwata iyalengele ukuti uyu nkashi aaluke mu fyo aletontonkanya? Alandile ati: “Naletontonkanya sana pa fyo Yehova aba no kutemwa ukushipwa. Ifi fyalengele nshininkishe ukuti alintemwa. Nalishiba ukuti lyonse akulangafwa, nangu nga nalufyanya akatwalilila ukuntemwa kabili akalangafwa. Nga natontonkanya pa fyo Yehova aba no kutemwa, cilanyangukila ukumweba fyonse ifilenga ndeba ne nsansa, e lyo na fyonse ifilenga ndeba no bulanda.”

8-9. Busuma nshi bwaba mu kutontonkanya pa fyo mwalalandapo ilyo mushilapepa? Landeni pa ca kumwenako.

⁸ Muletontonkanya pa fyo mwalalanda ilyo mushilapepa. Ilyo mushilapepa, kuti mwayipusha amepusho pamo nga: ‘Mafya nshi nkwete pali ino nshita? Bushe kuli uo mfwile ukubelela uluse? Bushe kuli ubwafya nkwete ubo mfwile ukwebako Yehova pa kuti angafwe?’ (2 Isha. 19:​15-19) Kuti twacitako ne fyo Yesu atusambilishe pe pepo, nga tuletontonkanyako pa fyo twingeba Yehova pe shina lyakwe, pa Bufumu bwakwe e lyo na pa fyo afwaya.—Mat. 6:​9, 10.

⁹ Ilyo nkashi Aliska aishibe ukuti umwina mwakwe alilwele kansa ya kuli bongobongo, kabili tali no kwikala inshiku ishingi, calemukosela ukupepa. Uyu nkashi alandile ati: “Nali no bulanda sana ica kuti nga natampa ukupepa nshaleishiba ne fya kulanda.” Finshi acitile pa kuti cilemwangukila ukupepa kuli Yehova? Alondolwele ati: “Ilyo nshilapepa ndatontonkanyako pa fyo nalaeba Yehova pa kuti nilanda fye pa fyo ndefwaya na pa bulwele bwa bena mwandi. Nga nacita ifi ndateka umutima, kabili ndeeba Yehova ifintu ifyapusapusana ilyo ndepepa kuli ena.”

10. Mulandu nshi tushilingile ukulakwankwanisha ukupepa? (Moneni ne fikope.)

¹⁰ Mwilakwankwanya ukupepa. Nangu ca kuti amapepo ayepi kuti yalenga twapalama kuli Yehova, nomba nga tatulekwankwanya ukupepa, kuti twaeba Yehova fyonse ifyo tuleumfwa ne fyo tuletontonkanya.b Ba Elijah ba muka ba Aliska balandile abati: “Ndapepa kuli Yehova imiku iingi mu bushiku bumo, kabili ndapalama sana kuli ena nga napepa amapepo ayatali. Yehova alitekanya, alakutika kuli ine ilyo ndepepa mpaka napwisha. E ico ndateka umutima ilyo ndepepa kuli ena.” Mule-eshako ukucita ifi: Mulekwatako inshita kabili mulefwaya icifulo uko mwingapepela amapepo ayatali ukushingaba nangu cimo icingamupumfyanya. Kabili ilyo mulepepa kuti mwaikatishako ishiwi. Ifi fine e fyo mulecita lyonse.

MULETONTONKANYA PA MAPEPO AYO ABABOMFI BA KWA YEHOVA BALEPEPA AYALEMBWA MU BAIBO

11. Finshi twingasambililako nga tuletontonkanya pa mapepo ayo ababomfi ba kwa Yehova balepepa ukufuma panshi ya mutima ayalembwa mu Baibo? (Moneni na kabokoshi akaleti, “Bushe Mumfwa nge fyo Baleumfwa?”)

¹¹ Kuti mwasambililako fimo nga muletontonkanya pa mapepo ayo ababomfi ba kwa Yehova balepepa ukufuma panshi ya mutima, e lyo na pa nyimbo isho baleimba pa kulumbanya Yehova ishalembwa mu Baibo. Nga mwamona ifyo ababomfi ba kwa Lesa bale-eba Yehova fyonse ifyo baletontonkanya ne fyo baleumfwa, na imwe bene kuti mwalapepa kuli Yehova ukufuma panshi ya mutima wenu. Na kabili kuti mwasambililako amashiwi ayo mwingalalanda pa kulumbanya Yehova ilyo mulepepa. Kabili kuti mwasanga amapepo ayo ababomfi ba kwa Lesa abaleumfwa nge fyo mumfwa bapepele, kabili abapepeele pa mafya nga yo mulefwaya ukupepelapo.

12. Mepusho nshi twingayipusha nga twabelenga ipepo limo ilyalembwa mu Baibo?

¹² Nga mwabelenga ipepo ilyalembwa mu Baibo, muleyipusha amuti: ‘Nani uwapepele ili ipepo, kabili cinshi apepele ifi? Bushe ifyo aleumfwa nafipalana ne fyo na ine ndeumfwa? Finshi ndesambililako kwi pepo apepele?’ Nalimo mufwile ukufwailapo ifyebo na fimbi pa kuti musange amasuko ya aya amepusho. Nga mwacita ifi, mukasambililako ifingi. Natulandeko pa mapepo ayo ababomfi ba kwa Lesa bamo bapepele.

13. Finshi twingasambilila kwi pepo ilyo Hana apepele? (1 Samwele 1:​10, 11) (Moneni ne pa nkupo.)

¹³ Belengeni 1 Samwele 1:​10, 11. Ilyo Hana apepele ili ipepo alikwete amafya yabili ayakalamba. Mafya nshi akwete? Talekwata abana, kabili umukashi munankwe alemucusha sana. (1 Sam. 1:​4-7) Nga ca kuti mwalikwata ubwafya ubumucusha sana, finshi mwingasambilila kwi pepo Hana apepele? Hana alipepele ipepo ilitali, kabili alyebele Yehova fyonse ifyalemusakamika.Ifi acitile fyalengele omfweko bwino. (1 Sam. 1:​12, 18) Na ifwe bene kuti twaumfwako bwino nga ‘twapoosa icisendo cesu pali Yehova,’ e kutila nga twamulondolwela fyonse ifyo tuleumfwa pa mafya ayo tukwete.—Amalu. 55:22.

14. (a) Cinshi cimbi twingasambilila ku fyo Hana acitile? (b) Cinshi twingalandila ukuti nga tulebelenga no kutontonkanya sana pa mapepo ayalembwa mu Baibo kuti twaishibilapo na fimbi ifyo twingalalanda ilyo tulepepa kuli Yehova? (Moneni futunoti.)

¹⁴ Ilyo papitile imyaka iinono ukutula apo Samwele afyalilwe, Hana alimutwele kuli Eli Shimapepo Mukalalmba. (1 Sam. 1:​24-28) Mwi pepo Hana apepele ukufuma panshi ya mutima, alilangile ukuti Yehova alacingilila no kusakamana ababomfi bakwe aba cishinka.c (1 Sam. 2:​1, 8, 9) Amafya Hana akwete pa ng’anda nalimo tayapwile, nomba ifyo abikileko sana amano fintu Yehova amupaalile. Finshi tulesambililako? Kuti twatwalilila ukushipikisha amafya nga ca kuti tulebika amano ku fyo Yehova atwafwa.

15. Finshi twingasambilila kwi pepo Yeremia apepele nga ca kuti abantu balecita ifyabipa? (Yeremia 12:1)

¹⁵ Belengeni Yeremia 12:1. Pa nshita imo kasesema Yeremia alifuupwike ilyo alemona ifintu file-endela bwino abalecita ifyabipa. Na kabili alefuupuka pa mulandu wa kuti abena Israele banankwe balemupumya. (Yer. 20:​7, 8) Na ifwe bene kuti twaumfwa nge fyo aleumfwa nga ca kuti twamona ifintu file-endela bwino abacita ifyabipa nelyo nga baletupumya. Nangu ca kuti Yeremia alyebele Yehova ukuti tatemenwe pa fyalecitika, tamwebele ukuti walufyengo. Ilyo Yeremia amwene ifyo Yehova akandile abantu bakwe abamupondokeele, afwile alishininkishe sana ukuti Yehova aliba no mulinganya. (Yer. 32:19) Na ifwe bene kuti twaeba Yehova ifyo tuleumfwa pa fyabipa ifilecitika, kabili tufwile ukucetekela ukuti pa nshita yakwe umwine ali no kupwisha ulufyengo ulo tumona.

16. Nga ca kuti tatufuma pa ng’anda pa mulandu wa kuti twalilwala nelyo nga balitukaka pa mulandu wa kuti tuli Nte ya kwa Yehova, finshi twingasambilila kwi pepo umwina Lebi apepele? (Amalumbo 42:​1-4) (Moneni ne fikope.)

¹⁶ Belengeni Amalumbo 42:​1-4. Uwalembele ulu ulwimbo ulwaba muli ifi ifikomo ali mwina Lebi uushaleba pamo na bena Israele banankwe pa mulandu wa kuti ali muli bunkole. Amashiwi yaba muli ulu ulwimbo yalanga ifyo aleumfwa. Na ifwe kuti twalaumfwa nge fyo aleumfwa nga ca kuti tatufuma pa ng’anda pa mulandu wa kuti twalilwala, nelyo nga ca kuti balitukaka pa mulandu wa kuti tuli Nte ya kwa Yehova. Inshita shimo kuti tuleumfwa bwino, lelo inshita shimbi kuti tulefuupuka, nomba tufwile ukulaeba Yehova ifyo tuleumfwa. Nga tulecita ifi, tukalaishiba bwino icilengele tuleumfwa ifyo tuleumfwa, kabili tukalaishiba bwino ifintu ifyacindama sana ifyo tulingile ukubikako amano. Ku ca kumwenako, umwina Lebi alilwike ukuti ku ntanshi ali no kukwata ishuko lya kulumbanya Yehova. (Amalu. 42:5) Na kabili aletontonkanya pa fyo Yehova alemusakamana. (Amalu. 42:8) Nga tulepepa kuli Yehova ukufuma panshi ya mutima, kuti twaishiba icilelenga tuleumfwa ifyo tuleumfwa, kuti twaba no mutende, kabili kuti twakwata amaka ya kushipikisha.

17. (a) Finshi twingasambilila kwi pepo ilyo kasesema Yona apepele? (Yona 2:​1, 2) (b) Nga natukwata amafya, cinshi cawamina ukulaibukisha amashiwi yamo ayaba mu Amalumbo? (Moneni futunoti.)

¹⁷ Belengeni Yona 2:​1, 2. Kasesema Yona apepele ili ipepo ninshi ali munda ya cisabi. Nangu ca kuti Yona taumfwilile Yehova, alicetekele ukuti Yehova ali no kumfwa nga apepa kuli ena. Ilyo Yona alepaapaata Yehova, amashiwi ayengi ayo alandile mwi pepo, na mwi buuku lya Amalumbo e mo yaba.d Yona afwile alishibe sana amashiwi ayalembwa mu Amalumbo. Pa mulandu wa kuti Yona aleibukisha amashiwi yaba mu Amalumbo kabili aleyatontonkanyapo, calengele ashininkishe ukuti Yehova ali no kumwafwa. Na ifwe nga twaswatilako amalembo yamo, kuti twalayebukisha kabili kuti yalenga tulesansamuka ilyo tulepepa kuli Yehova lintu tuli na mafya.

MULEPEPA LYONSE PA KUTI MWINGATWALILILA UKUBA IFIBUSA NA YEHOVA

18-19. Nga ca kuti inshita shimo tulafilwa ukweba Yehova ifyo tuleumfwa ilyo tulepepa, bushe amashiwi yaba pa Abena Roma 8:​26, 27 kuti yatusansamusha shani? Landeni pa ca kumwenako.

¹⁸ Belengeni Abena Roma 8:​26, 27. Inshita shimo kuti twasakamikwa sana ica kuti twafilwa no kulondolwela Yehova ifyo tuleumfwa. Nomba umupashi wa mushilo ulatwafwa. Pa nshita sha musango uyo, umupashi wa mushilo uwa kwa Lesa “ulatupaapaatilako.” Utupaapaatilako shani? Yehova alipeele abalelemba Baibo umupashi wakwe pa kuti balembe amapepo ayengi mu Cebo cakwe. Nga ca kuti twafilwa ukulondolwela Yehova ifyo tuleumfwa, Yehova alamona amashiwi yamo ayaba mu mapepo ayalembwa mu Cebo cakwe ukuti nifwe tuyalandile, kabili kuti ayasuka amapepo yesu nangu ca kuti natufilwa ukumulondolwela bwino ifyo tuleumfwa.

¹⁹ Ukwishiba ukuti umupashi wa mushilo ulatupaapaatilako, kwalyafwile nkashi Yelena uwa ku Russia. Ba Yelena balibekete pa mulandu wa kuti balepepa kabili balebelenga Baibo. Ba Yelena balisakamikwe sana ica kuti balefilwa no kupepa. Balandile abati: “Lyena naibukishe ukuti nga nasakamikwa sana ica kuti nafilwa no kwishiba ifya kweba Yehova ilyo ndepepa, Yehova ali no kumona amapepo ayo ababomfi bakwe bapepele ayalembwa mu Cebo cakwe ukuti nine ndepepa ayo amapepo. Ifi naleibukisha fyalelenga ndesansamuka sana ilyo ifintu fyakosele icine cine.”

20. Nga natusakamikwa sana, finshi tufwile ukucita ilyo tushilatampa ukupepa pa kuti twilatontonkanya pa fintu fimbi?

²⁰ Nga ca kuti natusakamikwa sana, kuti twatendeka ukutontonkanya pa fintu fimbi ilyo tulepepa. Kuti twacita shani pa kuti twilatontonkanya pa fintu fimbi ilyo tulepepa? Kuti twabelengako amalembo yamo mu Amalumbo ninshi natwikatishako ishiwi. Na kabili kuti twalemba ifyo tuleumfwa nga filya Imfumu Davidi yacitile. (Amalu. 18, 34, 142; utulembo twa pa muulu.) Kwena twakwaba amafunde ayo tulingile ukulakonka pa fyo tufwile ukucita ilyo tushilatampa ukupepa. (Amalu. 141:2) Kuti mwacita ifingamwangukila.

21. Mulandu nshi tulingile ukulapepela ukufuma panshi ya mutima?

²¹ Tulatemwa sana nga twaishiba ukuti Yehova aleshiba ifyo tuleumfwa na lintu tatulamweba nangu cimo. (Amalu. 139:4) Na lyo line alatemwa nga twamulondolwelako ifyo tuleumfwa e lyo ne fyo twamucetekela. Kanshi mwilatiina ukupepa kuli shinwe wa ku muulu. Mulesambililako ku mapepo ayalembwa mu Cebo cakwe. Mulepepa ukufuma panshi ya mutima. Mulemwebako ifilenga muleba ne nsansa e lyo ne filenga muleba no bulanda. Apo Yehova ni cibusa wenu uwa cishinka lyonse akulamwafwa!