ICIPANDE CA KUSAMBILILAMO 43
ULWIMBO 41 Umfweni Ipepo Lyandi
Mwilalaba Ukupepelako Aba Bwananyina
“ Mulepepelana . . . Uwalungama nga apepa ipepo lya kupaapaata, ipepo lyakwe lilakwata amaka sana.”—YAKO. 5:16.
IFYO TWALASAMBILILAPO
Twalasambilila pa co cacindamina ukulapepelako aba bwananyina, na pa fyo twingalacita pa kuti tulebapepelako.
1. Twaishiba shani ukuti Yehova amona amapepo yesu ukuti yalicindama?
IPEPO bupe ubusuma nga nshi ubo Yehova atupeela. Tontonkanyeni pali ici: Yehova alipeela bamalaika imilimo iyalekanalekana. (Amalu. 91:11) Alipeela no Mwana wakwe imilimo iyalekanalekana. (Mat. 28:18) Nomba bushe kwaliba umbi uo aeba ukuti e o alekutika amapepo yesu? Awe, takwaba. Yehova ‘uumfwa amapepo,’ e ukutika amapepo tupepa.—Amalu. 65:2.
2. Finshi filanga ukuti Paulo alepepelako aba bwananyina?
2 Nangu ca kutila kuti twalondolwela Yehova fyonse ifiletusakamika, tatufwile ukulaba ukulapepelako aba bwananyina. Umutumwa Paulo alepepelako aba bwananyina. Ku ca kumwenako, alembeele abali mu cilonganino ca ku Efese ukuti: “Nalitwalilila ukumupepelako.” (Efes. 1:16) Paulo alepepelako no muntu umo umo. Ku ca kumwenako, aebele Timote ati: “Ndetootela Lesa, . . . ndakwibukisha lyonse nga ndepepa amapepo ya kupaapaata ubushiku na kasuba.” (2 Tim. 1:3) Paulo alekwata amafya ayo alingile ukulapepelapo. (2 Kor. 11:23; 12:7, 8) Lelo alepepelako na ba bwananyina.
3. Cinshi cingalenga twalaba ukupepelako aba bwananyina?
3 Inshita shimo kuti twalaba ukupepelako aba bwananyina. Cinshi cingalenga? Nkashi Sabrinaa alilandile pali cimo icingalenga. Alandile ati: “Fwe bantu twalikwata amafya ayengi. Kuti twalabika sana amano ku mafya tukwete ica kuti e yo twalapepelapo fye.” Bushe inshita shimo, na imwe ifi e fyo ciba? Ifi nga e fyo ciba, ninshi ifili muli cino cipande fyalalenga mwishibe ifyo mulingile ukulacita. Muli cino cipande twalasambilila (1) pa co cacindamina ukulapepelako aba bwananyina na (2) pa fyo tufwile ukulacita pa kuti tulebapepelako.
MULANDU NSHI CACINDAMINA UKULAPEPELAKO ABA BWANANYINA?
4-5. Cinshi twingalandila ukuti amapepo ayo tupepelako aba bwananyina ‘yalakwata amaka sana’? (Yakobo 5:16)
4 Amapepo tupepelako aba bwananyina ‘yalakwata amaka sana.’ (Belengeni Yakobo 5:16.) Bushe nga tulepepelako aba bwananyina kuti twalenga ifintu fyabako bwino? Ee. Pa mulandu wa kutila Yesu alishibe ukuti tapali no kupita inshita Petro ali no kumukaana, amwebele ati: “Ninkupepelako pa kuti icitetekelo cobe cinenuka.” (Luka 22:32) Paulo na o alishibe ukuti nga tulepepelako aba bwananyina ifintu kuti fyabawaminako. Ilyo bamukakile mu Roma apabula no mulandu, alembeele Filemone ati: “Ndesubila ukuti amapepo mupepa yakalenga nkese kuli imwe na kabili.” (File. 22) Ifi fine e fyacitike. Paulo balimufumishe mu cifungo, kabili alitendeke ukubila imbila nsuma na kabili.
5 Kwena ici tacipilibula ukuti nga tulepepa ninshi tulepatikisha Yehova ukuti acitepo cimo pa co tulepepelapo. Alabika amano ku fyo ababomfi bakwe bapepelapo, kabili inshita shimo kuti asalapo ukubacitila ico bamulomba. Nga twaishiba ifi, kuti twalapepela sana pa bwafya tukwete, kabili kuti twacetekela ukuti Yehova akacita ico umwine alemona ukuti naciwama.—Amalu. 37:5; 2 Kor. 1:11.
6. Bushe nga tulepepelako aba bwananyina, tumfwa shani pali bena? (1 Petro 3:8)
6 Nga tulepepelako aba bwananyina, kuti ‘twalabalangulukilako.’ (Belengeni 1 Petro 3:8.) Umuntu uulangulukilako abantu, alamona ifyo balecula kabili alafwaya no kubafwa. (Marko 1:40, 41) Ba Michael baeluda balandile abati: “Nga napepelako aba bwananyina pa mafya bakwete, ndeshiba bwino ifyo balecula kabili ifi filenga ndebatemenwako. Ng’umfwa ukuti nimpalama sana kuli bena nangu ca kuti abene tabeshiba.” Ba Richard baeluda, nabo balilandile pa busuma na bumbi ubwaba mu kupepelako aba bwananyina. Batile: “Nga twapepelako umuntu, tulafwaisha no kucitapo cimo pa kuti tumwafwe.” Balandile no kuti “Nga twa-afwa umuntu ciba kwati twa-asuka ipepo ilyo tulemupepelako.”
7. Cinshi twingalandila ukuti nga tulepepelako aba bwananyina, te kuti tulebika fye amano ku mafya ayo tukwata? (Abena Filipi 2:3, 4) (Moneni ne fikope.)
7 Nga tulepepelako aba bwananyina, te kuti tulebika fye amano ku mafya tukwete. (Belengeni Abena Filipi 2:3, 4.) Bonse tulakwata amafya pa mulandu wa kuti twikala mu calo ico Satana Kaseebanya atungulula. (1 Yoh. 5:19; Ukus. 12:12) Nga tulepepelako aba bwananyina lyonse, tulebukisha ukuti ‘bamunyinefwe bonse pano calo balakwata amacushi nga ayo na ifwe bene tukwata.’ (1 Pet. 5:9) Ba Katherine bapainiya balandile abati: “Nga ndepepelako aba bwananyina, ndebukisha ukuti nabo bena balakwata amafya. Ici cilenga nilabika fye amano ku mafya ayo nkwata.”
Nga tulepepelako aba bwananyina, tatubika fye amano ku mafya ayo tukwata (Moneni paragrafu 7)d
ABA BWANANYINA ABO TWINGALAPEPELAKO
8. Ni bani twingalapepelako?
8 Ni bani twingalapepelako? Kuti twalapepelako aba bwananyina abalekanalekana. Ku ca kumwenako, kuti twapepelako aba bwananyina abalwalilila, abaice abo bapumya ku sukulu kabili abo bapatikisha ukucita ifyabipa, nelyo aba bwananyina abacula pa mulandu wa kuti balikota. Aba bwananyina abengi balakwata amafya pa mulandu wa kuti balupwa lwabo na ba mu buteko balabacusha. (Mat. 10:18, 36; Imil. 12:5) Aba bwananyina bamo balifulumuka uko baleikala pa mulandu wa kuti aba mu fikansa fya calo balacita ifimfulunganya. Bambi balacula pa mulandu wa masanso ayakalamba ayacitika uko bekala. Nalimo te kuti twishibe aba aba bwananyina. Nomba nga tulebapepelako, ninshi tulelanga ukuti tulakonka ifunde ilyo Yesu atupeele ilya kuti “muletemwana.”—Yoh. 13:34.
9. Mulandu nshi tulingile ukulapepelako bamunyinefwe abatungulula mu cilonganino ca kwa Yehova na bena mwabo?
9 Kuti twalapepelako na bamunyinefwe abatungulula mu cilonganino ca kwa Yehova. Kuti twalapepelako ababa mwi Bumba Litungulula na baba mu makomiti ayabafwilisha, ababa mu makomiti ya misambo, abangalila amadipartimenti pa misambo, bakangalila ba miputule, baeluda na babomfi batumikila. Aba bamunyinefwe, nabo bene balakwata amafya, lelo balabombesha pa kuti baletwafwa. (2 Kor. 12:15) Ku ca kumwenako, ba Mark bakangalila wa muputule balandile abati: “Ubwafya bumo ubukalamba nakwata bwa kuti naba ukutali na uko abafyashi bandi bekala. Bonse babili nabakota kabili balalwalilila. Nangu ca kuti nkashi yandi no mwina mwakwe balabafwa mu fyo bakabila, ndomfwa ububi pantu nshibafwa nge fyo ningabafwa nga ca kuti naleikala mupepi nabo.” Nampo nga twalishiba amafya ayo aba bamunyinefwe bakwata nelyo iyo, tufwile fye ukulabapepelako. (1 Tes. 5:12, 13) Tulingile no kulapepelako abena mwabo, pantu ifyo babafwa e filenga batwalilile ukubomba imilimo iyo icilonganino ca kwa Yehova cibapeela.
10-11. Bushe Yehova alatemwa nga tulepepelako bamunyinefwe na bankashi mu cinkumbawile? Londololeni.
10 Nga fintu twasambilila, ilingi line tulapepelako bamunyinefwe na bankashi abalekanalekana. Ku ca kumwenako, nangu ca kuti tapali uwa bwananyina uo tulepepelako mu kulungatika, kuti twalomba Yehova ukuti afwilishe aba bwananyina abo bakaka nelyo asansamushe abafwililwe. Ba Donald baeluda batile: “Bamunyinefwe na bankashi abengi balakwata amafya ayengi ica kuti inshita shimo tubapepelako fye mu cinkumbawile.”
11 Bushe Yehova alatemwa nga twapepa amapepo ya musango uyu? Ee, alatemwa! Na kuba, tatwishiba amafya ayo bamunyinefwe na bankashi bonse bakwata. Kanshi caliba fye bwino ukulapepelako bamunyinefwe na bankashi mu cinkumbawile. (Yoh. 17:20; Efes. 6:18) Amapepo ya musango uyu yalangilila ukuti ‘twalitemwa aba bwananyina bonse.’—1 Pet. 2:17.
IFYO TWINGACITA PA KUPEPELAKO UWA BWANANYINA MU KULUNGATIKA
12. Nga tulebika amano ku ba bwananyina, kuti tulebapepelako shani mu kulungatika?
12 Mulebika amano ku ba bwananyina. Ukulunda pa kupepelako aba bwananyina mu cinkumbawile, caliba fye bwino no kulumbula aba bwananyina ilyo tulebapepelako. Bushe mu cilonganino mwaba, mwaliba uwa bwananyina uwalwala ubulwele ubushipola? Bushe mwaliba umwana we sukulu uwafuupuka nalimo pa mulandu wa kuti abana be sukulu banankwe balamupatikisha ukucita ifyabipa? Bushe mwaliba umufyashi uo cikosela ‘ukusalapula umwana no kumukonkomesha ukulingana ne fyo Yehova afwaya’? (Efes. 6:4) Nga mulebika sana amano ku ba bwananyina, mukalabalangulukilako sana, kabili ici cikalenga mukalefwaisha ukulabapepelako.b—Rom. 12:15.
13. Kuti twacita shani pa kuti tulepepelako na ba bwananyina abo tushaishiba?
13 Mulelumbula amashina ya ba bwananyina abo mulepepelako. Kuti twalalumbula na mashina ya ba bwananyina abo tushaishiba. Ku ca kumwenako, kuti mwalapepelako bamunyinefwe na bankashi abo bakaka mu fyalo pamo nga Crimea, Eritrea, Russia, na Singapore. Nga mwaya pa webusaiti ya jw.org, kuti mwasanga amashina ya ba bwananyina abo bakaka.c Ba Brian bakangalila wa muputule balandile abati: “Nasanga ukuti nga nalemba ishina lya wa bwananyina uo bakaka, e lyo nalalishimbula ninshi ninjikatishako ne shiwi, ndalibukisha kabili cilanyangukila ukulibukisha ilyo ndemupepelako.”
14-15. Finshi tufwile ukucita pa kuti tulepepelako aba bwananyina mu kulungatika?
14 Mulepepa mu kulungatika. Ba Michael abo tulandilepo kale batile: “Nga ndebelenga amalyashi ya ba bwananyina abo bakaka ayaba pa jw.org, ndesha ukwelenganya ifyo ningalaumfwa nga ca kuti nine nali mu cifungo. Nalishiba ukuti nga nine nali mu cifungo, kuti nalasakamana sana pa mwina mwandi, kabili kuti nalafwaya ukuti alekwata ifyo alekabila. Ici cilenga ndepepa mu kulungatika ilyo ndepepelako bamunyinefwe abaupa ababa mu cifungo.”—Heb. 13:3, futunoti.
15 Nga tuletontonkanya pa fyo aba bwananyina bekala mu cifungo, kuti twaishibako na fimbi ifyo twingalumbula mu kulungatika ilyo tulebapepelako. Ku ca kumwenako, kuti twalomba Yehova ukuti alelenga abalinda abafungwa baleba ne cikuuku ku ba bwananyina ababa mu fifungo, no kuti abalashi ba buteko balesuminisha aba bwananyina ukulamupepa. (1 Tim. 2:1, 2) Kuti twalapepa kuli Yehova ukuti aleafwa aba bwananyina ababa mu cilonganino umwali uwa bwananyina uo bakaka, pa kuti nga bamona ifyo atwalilila ukuba ne cishinka, nabo batwalilile ukuba aba cishinka. Kuti twapepa no kuti abashili Nte balemona imibele iisuma iyo uwa bwananyina uo bakaka akwata pa kuti bengalakutika imbila nsuma. (1 Pet. 2:12) Ifi fine e fyo twingalacita na lintu tulepepelako bamunyinefwe na bankashi abaleshipikisha amafya yambi. Nga tulebika amano ku ba bwananyina, nga tulebalumbula amashina ilyo tulebapepelako, kabili nga tulebapepelako mu kulungatika, ninshi tulelanga ukuti ‘twalitemwana nga nshi.’—1 Tes. 3:12.
TULEBA ABAICEFYA ILYO TULEPEPA KULI YEHOVA
16. Tufwile ukulapepa shani pa kuti tulelanga ukuti twali-icefya? (Mateo 6:8)
16 Nga fintu tusambilile, nga tulepepelako aba bwananyina, ifintu kuti fyabawaminako. Nomba tufwile ukuba abaicefya ilyo tulebapepelako kuli Yehova. Ilyo tulepepa, tuleibukisha ukuti tatule-eba Yehova ifintu ifyo ashishibe. Na kabili tatulingile ukulamweba ifyo afwile ukucita pa bwafya ubo aba bwananyina bakwete. Yehova aleshiba ifyo ababomfi bakwe bakabila, ilyo bena bashilaishiba no kwishiba na lintu na ifwe bene tushilaishiba no kwishiba. (Belengeni Mateo 6:8.) Nomba mulandu nshi tulingile ukulapepelako aba bwananyina? Ukulunda pa fyo tusambilile muli cino cipande, nga tulepepelako aba bwananyina, ninshi tulelanga ukuti twalibabikako amano. Icilenga tulebapepelako ni co twalibatemwa. Kabili Yehova alatemwa nga amona ababomfi bakwe balemupashanya mu fyo aba no kutemwa.
17-18. Langilileni ico cacindamina ukulapepelako aba bwananyina.
17 Nangu ca kuti amapepo ayo twapepelako aba bwananyina tayalengele ifintu fyabawaminako, yalalangilila ukuti twalibatemwa, kabili Yehova alatemwa nga tulebapepelako. Natulangilile: Tutile mu lupwa lumo mwaba abana abanono babili, akalumendo na kakashana. Akalumendo nakalwala, kabili kaleele fye. Lyena akakashana kalapaapaata bawishi akati: “Afweni ndume yandi. Nalwala sana!” Bawishi nabeshiba ukuti ndume ya kako nalwala, kabili nabacitapo na cimo pa kuti bamwafwe. Balitemwa umwana wabo kabili balemusakamana. Na lyo line, bawishi batemwa sana pa fyo akakashana kalanga ukuti kalasakamana sana ndume ya kako ica kuti kalebapaapaata ukuti bamwafwe.
18 Ifi fine e fyo Yehova afwaya tulecita. Afwaya tulesakamana aba bwananyina kabili tulebapepelako. Nga tulebapepelako, ninshi tulelanga ukuti tatwabika fye amano kuli fwe bene, lelo twalibika amano na ku ba bwananyina, kabili Yehova alamona ifyo tucita. (2 Tes. 1:3; Heb. 6:10) Na kabili, nga fintu twasambilila, nga tulepepelako aba bwananyina, inshita shimo ifintu kuti fyabawaminako. E ico natule-esha na maka yesu yonse pa kuti tuleibukisha ukulapepelako aba bwananyina.
ULWIMBO 101 Ukubombela Pamo mu Kwikatana
a Amashina yamo nabayalula.
b Tambeni vidio pa jw.org iya ba Takeshi Shimizu iitila: Yehova “Alomfwa Amapepo.”
c Nga mulefwaya ukwishiba amashina ya ba bwananyina abo bakaka, kabiyeni pa webusaiti ya jw.org pa cipande icitila “Inte sha kwa Yehova abo Bakaka pa Mulandu wa Citetekelo Cabo—Ukulingana ne Ncende.”
d UBULONDOLOSHI BWA CIKOPE: Bamunyinefwe na bankashi abakwata amafya balepepelako aba bwananyina.