Mulepashanya Yehova Uwaicefya

1. Cinshi twingapapila pali ifi Yehova aba uwaicefya?

NGA MWATONTONKANYA pa ntungulushi sha muli cino calo, bushe kuti mwatila shali-icefya? Awe. Nomba Yehova uwa maka yonse ena ali-icefya. (Amalu. 113:​5-8) Takwaba nangu umo uwaicefya nga fintu Yehova aicefya. Yehova taba na cilumba nangu fye panono. Muli cino cipande twalasambilila pa mibele 4 iyo Yehova akwata ne fyo ilangilila ukuti ali-icefya. Twalasambilila na pa fyo Yesu alelanga ukuti ali uwaicefya nga fintu Wishi aba. Ifi twalasambililapo, fyalalenga tube ifibusa sana na Yehova, kabili fyalalenga twishibe ifya kucita pa kuti tube abaicefya nga fintu Yehova aba.

YEHOVA TAIFINYA

2. Finshi Baibo itweba pali Yehova pa Amalumbo 62:8? (Moneni ne cikope icili pa nkupo.)

² Ilingi line abantu aba cilumba balaifinya. Ifyo abantu aba cilumba bacita pa mulandu wa kuti bamona ukuti balicila abantu bambi, filenga abantu balabataluka. Lelo Yehova ena te fyo aba. Apo Shifwe wa ku muulu ali-icefya, alitweba ukuti tulemulondolwela fyonse ifitusakamika. (Belengeni Amalumbo 62:8.) Nga filya fine umufyashi umwaume akutikisha ilyo abana balemulondolwela ifibasakamike, e fyo na Yehova afwaya ukukutika amapepo yesu. Na kuba, alilenga amapepo ayengi yalembwa mu Baibo. Ifi acita filangilila fye ukuti taifinya. (Yosh. 10:​12-14; 1 Sam. 1:​10-18) Nomba kuti twacita shani nga ca kuti inshita shimo tumona ukuti tatulingile no kupepa kuli Yehova pa mulandu ne filubo ifyo tucita?

3. Cinshi cingalenga twashininkisha ukuti Yehova afwaya tulepepa kuli ena inshita yonse?

³ Kuti twapepa kuli Yehova na lintu tulemona ukuti talinga no kututemwa. Cinshi twalandila ifi? Mu cilangililo ca mwana uwalubile ico Yesu alandilepo, alingenye Yehova ku mufyashi uwali ne cikuuku ku mwana umwaume uwalapiile, lelo uwaleumfwa ukuti wishi talingile no kumusuminisha ukubwelela mu lupwa lwakwe. Nomba bushe wishi acitile shani ilyo umwana abwelele? Yesu alandile ukuti ilyo wishi amwene fye umwana abwela, “alimubutukiile amukumbatila no kumukumbatila e lyo amutomona.” (Luka 15:​17-20) Yehova aba nga ulya wishi. Nga aumfwa fye tulepepa kuli ena, ninshi tuli no bulanda pa mulandu wa filubo ifyo twacita, nelyo pa mulandu wa kuti natusakamikwa, alakutikisha pantu ali-icefya. (Inyimbo 3:​19, 20) Pa mulandu wa kuti Yehova alatulangulukilako, ciba kwati alatubutukila pa kuti atusansamushe na pa kuti atulange ukuti alitutemwa. (Esa. 57:15) Bushe Yehova ‘atubutukila’ shani muno nshiku? Ilingi line atubutukila ukupitila muli baeluda, balupwa lwesu abamubombela e lyo na Bena Kristu banensu. (Yako. 5:​14, 15) Ico Yehova atwafwila muli ishi nshila shonse, ni co afwaya twaba ifibusa fyakwe.

4. Bushe Yesu alangile shani ukuti tali uwaifinya?

⁴ Yesu alapashanya Wishi. Yesu ali-icefya nga filya fine Wishi aba. Kanshi ilyo Yesu ali pano isonde, abantu tabaletiina ukulanda nankwe. Tabaletiina no kumwipusha amepusho. (Marko 4:​10, 11) E ico nga abeba ukuti bamwebe ifyo baletontonkanya pa fintu fimo, balemweba. (Mat. 16:​13-16) Kabili nga balufyanya, tabaletiina ukuti Yesu alabakalipila pantu ali ne cikuuku, ali no luse kabili ali uwatekanya. (Mat. 17:​24-27) Pa mulandu wa kuti Yesu alepashanya sana Wishi, abasambi bakwe balishibe bwino ifyo Yehova aba. (Yoh. 14:9) Balishibe ukuti Yehova te munkalwe, taba na cilumba kabili alefwaya baba ifibusa fyakwe. Ali-icefya kabili taifinya. Nomba intungulushi shabo isha mapepo shena te fyo shali.

5. Bushe nga tuli abaicefya, kuti cala-angukila shani abantu ukulalanda na ifwe?

⁵ Kuti twacita shani pa kuti tulepashanya Yehova? Nga tuli abaicefya, abantu kuti cilebangukila ukulanda na ifwe. Nga tatuli abaicefya, kuti twalafimbila abanensu, kuti twaba ne cilumba kabili te kuti tulebabelela uluse nga batulufyanya. Iyi mibele kuti yalenga calakosela abantu ukulanda na ifwe. Nomba nga tuli abaicefya, tukalaba ne cikuuku ku bantu, tukaba abatekanya kabili tukalababelela uluse nga batulufyanya. Iyi mibele kuti yalenga cala-angukila abantu ukulanda na ifwe. (Kol. 3:​12-14) Baeluda maka maka, tabalingile ukuba abaifinya pa kuti cileangukila aba bwananyina ukulalanda nabo. Kwena pa kuti cileangukila aba bwananyina ukulalanda nabo, baeluda bafwile ukulaba pamo na ba bwananyina. Ici cilepilibula ukuti baeluda balingile ukulaya mu kulongana, ukucila ukulalonganina fye pa Intaneti na pashilingile. Na kabili, ifintu nga fili fye bwino, baeluda bafwile ukulaesha na maka yabo yonse pa kuti balebila imbila nsuma na bamunyinefwe na bankashi ku ng’anda ne ng’anda. Nga ca kuti aba bwananyina baishiba bwino baeluda, cikalabangukila ukubeba amafya bakwete.

YEHOVA TAUMINA KUMO

6-7. Landeniko pa fya kumwenako ifilanga ukuti Yehova taumina kumo.

⁶ Abantu abengi ababa ne cilumba, ilingi line balomina kumo. Nomba pa mulandu wa kuti Yehova ali-icefya, tomina kumo kabili tapampamina fye pa cintu cimo, nangu ca kuti e wapulamo muli fyonse. Natulandeko pa fyo acitile ilyo Miriamu na Aarone ndume yakwe bailishenye pali Mose. Yehova tatemenwe pa fyo bailishenye, pantu e o Mose aleimininako. Kanshi filya Miriamu acitile fyalangile ukuti tacindike Yehova. Ici calengele Yehova amufulilwe sana kabili amulwalike ifibashi. Ilyo Aarone apaapaatileko Miriamu kuli Mose, na lintu Mose na o amupaapaatileko kuli Yehova ukuti amuposhe, Yehova taumine kumo. Kabili apo ali-icefya, alyundepe Miriamu.—Impe. 12:​1-15.

⁷ Na kabili Yehova alilangile ukuti ali-icefya ilyo akutike ku Mfumu Hisekia. Yehova atumine kasesema Esaya ukuyaeba Imfumu Hisekia ukuti yali no kufwa. Imfumu Hisekia yapaapeete Yehova ukuti ayundape ninshi ilelila no kulila. Bushe Yehova acitile shani? Alyundepe iyi mfumu kabili ali-ilundileko imyaka 15. (2 Isha. 20:​1, 5, 6) Cine cine apo Yehova ali-icefya, alalangulukilako abantu kabili tomina kumo.

8. Finshi filanga ukuti Yesu na o taumina kumo? (Marko 3:​1-6)

⁸ Yesu alapashanya Wishi. Ilyo Yesu ali pano isonde, alecitila abantu ifisuma nga amona ukuti nacilinga. Ku ca kumwenako, aleundapa abantu pe Sabata nangu ca kuti intungulushi sha mapepo shalemona ukuti talingile ukulacita ifi. (Belengeni Marko 3:​1-6.) Na muno nshiku mwine, Yesu tomina kumo ilyo atungulula icilonganino. Ku ca kumwenako, nga ca kuti umuntu mu cilonganino acita ulubembu ulukalamba, alamutekanishisha pa kuti aluke.—Ukus. 2:​2-5.

9. Kuti twacita shani pa kuti tulelanga ukuti tatupampamina fye pa cintu cimo? (Moneni ne fikope.)

⁹ Kuti twacita shani pa kuti tulepashanya Yehova? Pa kuti twilaumina kumo mu fyo tutontonkanya na mu fyo tucita, tufwile ukusambililako kuli Yehova. (Yako. 3:17) Ku ca kumwenako, abafyashi abashumina kumo tabatekelesha abana babo, lelo tababenekela ukucita ifyo bashingakumanisha ukucita. Ifi fine e fyo Yakobo acitile pantu alilangulukileko abana bakwe, nga fintu tubelenga pa Ukutendeka 33:​12-14. Na kabili abafyashi abaicefya kabili abashaumina kumo tabalinganya abana babo ku bana banabo na pashilingile. Baeluda nabo, tabafwile ukulapampamina fye pa cintu cimo. Inshila imo iyo bengalangilamo ukuti tabapampamina fye pa cintu cimo, kukonka ifyo baeluda abengi balanda, kulila fye ifyo baeluda abengi balanda tafipusene na mashinte ya mafunde ya mu Baibo. (1 Tim. 3:​2, 3) Kabili bonse fye tulingile ukulaesha na maka yesu yonse, pa kuti tuleishiba icilengele aba bwananyina balemona ifintu mu nshila balefimwenamo, nangu ca kuti ifyo balefimona nafipusana ne fyo tulefimona. (Rom. 14:1) Kanshi bonse mu cilonganino tule-esha na maka yesu yonse pa kuti tuleleka abantu balemona ukuti ‘tatupampamina fye pa cintu cimo.’—Fil. 4:5.

YEHOVA ALITEKANYA

10. Bushe Yehova alangile shani ukuti alitekanya?

¹⁰ Mufwile mwalimona ukuti abantu aba cilumba tabafwaya ukulolela. Icilumba calilenga beba abatekanya. Ifi te fyo Yehova ena aba. Alitekanya sana, kabili takwaba nangu umo uwatekanya nga ena! Ku ca kumwenako, mu nshiku sha kwa Noa, Yehova alandile ukuti ali no kulolela pa myaka 120 ilyo ashilalofya abantu abalecita ifyabipa. (Ukute. 6:3) Ici calengele Noa akwate inshita ya kukwata abana ne ya kupanga icibwato, kabili ulupwa lwakwe lwalimwafwile ukubomba ulya mulimo. Inshita imbi Yehova alitekenye ilyo alekutika kuli Abrahamu ilyo alemwipusha pa fyo ali no konaula umusumba wa Sodomu na Gomora. Nga muntu uwa cilumba e o Abrahamu aleipusha ifi, nga amwebele fye ati, ‘Tawakwata insambu sha kunjipusha aya mepusho!’ Nomba pa mulandu wa kuti Yehova ali-icefya, alitekanishishe Abrahamu.—Ukute. 18:​20-33.

11. Ukulingana na mashiwi yaba pali 2 Petro 3:​9, mulandu nshi Yehova atekanishisha na muno nshiku mwine?

¹¹ Na muno nshiku mwine Yehova acili alitekanya. Alalolela ukuti inshita iyo abika iya konawilapo cino calo ikafike. Mulandu nshi atekanishisha? Ni co “tafwaya umuntu nangu umo akonaike, lelo afwaya ukuti bonse bakalapile.” (Belengeni 2 Petro 3:9.) Bushe caliba fye bwino ifi Yehova atekanya? Ee. Ici calilenga abantu abengi abakwata imitima iisuma bakwata inshita ya kuba ifibusa fyakwe. Na kabili tulasubila ukuti abantu abengi na bambi bali no kuba ifibusa fyakwe. Na lyo line, Yehova takatwalilile fye ukutekanishisha abantu. Yehova alitemwa abantu, lelo tatekelesha abacita ifyabipa. Takaleke abantu bakatwalilile ukucita ifyabipa.—Haba. 2:3.

12. Bushe Yesu alanga shani ukuti alitekanya nga fintu Yehova aba?

¹² Yesu alapashanya Wishi. Pa myaka iingi sana, Yesu alitekanya nga fintu Yehova aba. Yesu alimona ifyo Satana abepesha Yehova na bantu bakwe aba cishinka. (Ukute. 3:​4, 5; Yobo 1:11; Ukus. 12:10) Na kabili Yesu alimona ifyo abantu bacula nga nshi. Elenganyeni ifyo afwaisha ‘ukonaula imilimo ya kwa Satana Kaseebanya’! (1 Yoh. 3:8) Cinshi calenga Yesu abe uwatekanya ilyo alolela ukuti Yehova akamusuminishe ukonaula imilimo ya kwa Satana Kaseebanya umupwilapo? Cimo icalenga ni co Yesu ali-icefya kabili alishiba ukuti Yehova e wakwata amaka ya kulanda ilyo cino calo cilingile ukonaulwa.—Imil. 1:7.

13. Bushe Yesu aletekanishisha shani abatumwa bakwe, kabili mulandu nshi alebatekanishisha?

¹³ Na lintu Yesu ali pano isonde aletekanishisha abatumwa bakwe. Ku ca kumwenako, nangu ca kuti pa miku iingi balyumanine pa wali umukalamba pali bena, Yesu talekele ukubatekanishisha. (Luka 9:46; 22:​24-27) Alicetekele ukuti mu kupita kwa nshita, bali no kwaluka. Bushe mwalicitapo icilubo cimo cine pa miku iingi? Nga ca kuti mwalicitapo ifi, bushe tamutasha pa kukwata Imfumu iyaicefya kabili iyatekanya?

14. Kuti twacita shani pa kuti tube abatekanya?

¹⁴ Kuti twacita shani pa kuti tulepashanya Yehova? Nga ‘tuletontonkanya nge fyo Kristu atontonkanya,’ tukalatontonkanya nge fyo Yehova atontonkanya, kabili tukalacita ifintu nge fyo Yehova acita. (1 Kor. 2:16) Kuti twacita shani pa kuti tuletontonkanya nga Kristu? Icacindamisha ico tufwile ukucita, kulabelenga Amabuuku ya Mbila Nsuma. Ilyo tulebelenga, tulingile ukulatontonkanya sana pa fyo Yesu acitile na pa calengele aficite. Na kabili tufwile ukulalomba Yehova ukuti aletwafwa pa kuti tuleba abaicefya kabili abatekanya nga fintu Yesu ali. Nga twaishiba ifyo Kristu atontonkanya, cikalatwangukila ukupashanya Yehova. Tukaba abatekanya kabili tukalatekanishisha Abena Kristu banensu.—Mat. 18:​26-30, 35.

YEHOVA ALACINDAMIKA ABO ABANTU BAMONA UKUTI TABACINDAMA

15. Landeni pa fya kumwenako ifilanga ukuti Yehova alacindamika abo abantu bamona ukuti tabacindama. (1 Samwele 2:8)

¹⁵ Belengeni 1 Samwele 2:8. Tontonkanyeni pali ici: Yehova Uwapulamo mu muulu na pano isonde alabika amano na ku bo abantu bamona ukuti tabacindama! Natulandeko pali bamo abo abantu balemona ukuti tabali abacindama abo Yehova acindamike. Bamo nalimo tatwabeshiba na bwino. Lelo Yehova alilenga balembwa mu Baibo. Ku ca kumwenako, Yehova alilengele Mose alemba pali Debora uwali umubomfi uwa cishinka mu ng’anda ya kwa Isaki ne ya kwa Yakobo pa myaka nalimo 125! Nangu ca kuti finono twaishiba pali ulya mwanakashi uwali uwa cishinka, Yehova alilengele Mose alemba fimo ifilanga ukuti aba mu lupwa lwa kwa Isaki no lwa kwa Yakobo balimutemenwe. (Ukute. 24:59; 35:​8, fnt.) Ilyo papitile imyaka iingi, Yehova alisalile Davidi uwali fye kacema umulumendo pa kuti abe imfumu ya bena Israele. (2 Sam. 22:​1, 36) Ilyo Yesu afyelwe fye, Lesa alitumine bamalaika ukuyaeba bakacema ukuti mu musumba wa Betelehemu mwalifyelwe umwana uwali no kuba Mesia. Aba bakacema e babalilepo ukwishiba ukuti uwali no kuba Mesia alifyelwe. (Luka 2:​8-11) Na lintu Yosefe na Maria batwele Yesu pe tempele, Yehova alicindamike Simeone na Ana abali abakalamba pantu alilekele bamona Umwana wakwe. (Luka 2:​25-30, 36-38) Cine cine, nangu ca kuti Yehova alisumbuka, “alemya abashacindama mu lukungu”!

16. Bushe Yesu alepashanya shani Wishi mu fyo alemona abantu?

¹⁶ Yesu alapashanya Wishi. Yesu na o alecindamika abo abantu balemona ukuti tabali abacindama. Ku ca kumwenako, abantu ‘abashali abasambilila kabili abantu yaweyawe,’ alibasambilishe icine pa Bufumu bwa kwa Lesa. (Imil. 4:13; Mat. 11:25) Yesu aleundapa na balwele, kabili ilyo alebondapa alelenga baumfwa ukuti alibatemenwe kabili alibacindike. (Luka 5:13) Mu nshita ya bushiku pa bushiku afwile, alisambile na makasa ya batumwa bakwe. Uyu mulimo abombele, babomfi baleubomba. (Yoh. 13:5) Na kabili ilyo ashilabwelelamo ku muulu, alicindamike abasambi bakwe bonse kumo na ifwe bene muno nshiku, pantu alitupeela umulimo uwacindama uwa kwafwa abantu pa kuti bakesekwata umweo wa muyayaya.—Mat. 28:​19, 20.

17. Kuti twalanga shani ukuti twalitemwa abantu kabili twalibacindika? (Moneni ne cikope.)

¹⁷ Kuti twacita shani pa kuti tulepashanya Yehova? Tulanga ukuti twalicindika abantu nga ca kuti tulebila imbila nsuma kuli bonse, te mulandu ne fyo ifintu fyaba mu mikalile yabo, te mulandu no mushobo wabo, nampo nga balisambilila sana nelyo iyo. Na kabili tulanga ukuti twalitemwa bamunyinefwe na bankashi kabili twalibacindika nga ca kuti tulebamona ukuti balitucila muli fimo, nampo nga twalicenjela muli fimo nelyo nga tulabomba imilimo iikalamba mu cilonganino ca kwa Yehova. (Fil. 2:3) Yehova alatemwa nga ca kuti tuli abaicefya kabili nga ‘tulebalilapo’ ukulanga ukuti tulacindikana muli ifi twalandapo, na mu fintu fimbi.—Rom. 12:10; Sefa. 3:12.

18. Cinshi mulefwaila ukuba abaicefya nga fintu Yehova aba?

¹⁸ Nga tule-esha na maka yesu yonse pa kuti tulepashanya Shifwe wa ku muulu uwaicefya, abantu cikalabangukila ukulanda na ifwe, tatwakulaumina kumo, kabili tukaba abatekanya. Na kabili, tukalatemwa abantu kabili tukalabacindika nga filya fine Yehova acita. Natuleibukisha ukuti nga tuleba abaicefya nga fintu Lesa wesu aba, akatutemwa sana!—Esa. 43:4.