Twalilileni Ukushintilila Pali Yehova pa Kuti Alemutungulula

1. Fintu nshi fimo ifyo fwe bantunse tukabila? (Mateo 5:3)

YEHOVA alishiba ifyo fwe bantu tukabila. Ku ca kumwenako, tulakabila ifya kulya, ifya kufwala no mwa kwikala. Nga tatukwete cimo pali ifi nangu fye ni pa kashita akanono, imikalile ilakosa. Yehova alishiba no kuti tulakabila ifya kwa Lesa, e kutila tufwile ukumwishiba kabili tufwile ukushintilila pa fyo atutungulula. (Belengeni Mateo 5:3.) Nga tulefwaya ukuba ne nsansa sha cine cine, tufwile ukwishiba ukuti tulingile ukushintilila pali Yehova pa kuti aletutungulula no kutwalilila ukumucetekela.

2. Bushe amashiwi ya kuti “abaishiba ukuti balakabila ifya kwa Lesa,” yalola mwi? Langilileni.

² Bushe amashiwi ya kuti “abaishiba ukuti balakabila ifya kwa Lesa,” yalola mwi? Mu ciGriki aya mashiwi yalanda pa muntu uulelombelesha ifya kwa Lesa. Aya amashiwi yalenga twatontonkanya pa muntu umupiina sana. Elenganyeni umuntu uufwele ifya kufwala ifyalepauka, ekele panshi mu musebo kabili alyonda sana. Ekala fye pa kasuba kabili ubushiku alaala fye pa mpepo. Abantu balamutaluka. E ico alinaka sana kabili takwata insansa. Umuntu wa musango uyu aleshiba ukuti alakabila aba kumwafwa pa kuti imikalile yakwe ingawamako. Ifi fine e fyo caba na ku baishiba ukuti balakabila ifya kwa Lesa. Balishiba ukutila kuti baba fye ne nsansa sha cine cine nga ca kuti Lesa alebafwa. E ico balafwaisha ukunonkelamo mu fyo Yehova atungulula abantu abamutemwa.

3. Finshi twalasambililapo muli cino cipande?

³ Muli cino cipande, twalasambilila pa fyo twingasambilila ku mwanakashi umwina Foinike uwapaapeete Yesu ukuti amwafwe. Ku lyashi lya uyu mwanakashi twalasambililako imibele itatu iyo abantu abaishiba ukuti balakabila ifya kwa Lesa balingile ukukwata. Lyena twalaisasambililako ku mutumwa Petro, ku mutumwa Paulo na ku Mfumu Davidi. Aba bonse balishintilile pali Yehova pa kuti alebatungulula.

IMIBELE ITATU IYO TUFWILE UKUKWATA

4. Finshi umwanakashi umwina Foinike alefwaya kuli Yesu?

⁴ Bushiku bumo umwanakashi umwina Foinike aile kuli Yesu. Uyu mwanakashi alikwete umwana umwanakashi uo icibanda ‘caikete ububi.’ (Mat. 15:​21-28) Alifukamine Yesu e lyo amupaapaata ukuti amwafwe. Ilyo uyu mwanakashi aile kuli Yesu alilangile imibele itatu iyo akwete. Natulande pali iyi mibele.

5. Mibele nshi iyo umwanakashi umwina Foinike akwete, kabili finshi Yesu acitile? (Moneni ne cikope.)

⁵ Uyu umwanakashi umwina Foinike alilangile ukuti ali uwaicefya icine cine. Cinshi twalandila ifi? Pantu takalipe ilyo Yesu abomfeshe icilangililo icalelangilila ukuti alemulinganya ku kabwa. Akabwa ako Yesu alandilepo nalimo e tubwa uto abashali baYuda baleteka mu mayanda. Bushe nga nimwe Yesu aebele ifyo aebele uyu mwanakashi nga mwacitile shani? Bushe nga mwaumfwile ukuti alimusaalwile sana ica kuti mwafumapo no bukali? Ifi te fyo uyu mwanakashi umwina Foinike acitile. Alilangile ukuti ali uwaicefya. Kwali na cimbi ico acitile. Alitwalilile ukupaapaata Yesu ukuti amwafwe. Cinshi calengele atwalilile ukupaapaata Yesu? Ni co alitetekele Yesu. Na kuba, ilyo Yesu amwene ifyo uyu mwanakashi amutetekele sana, alimwafwile. Nangu ca kuti e lyo Yesu aebele fye uyu mwanakashi ukuti Lesa amutumine fye ku “mpaanga ishaluba isha mu ng’anda ya kwa Israele,” alifumishe icibanda mu mwana wakwe.

6. Finshi tulesambililako ku lyashi lya mwanakashi umwina Foinike?

⁶ Pa kuti tulenonkelamo mu fyo Yehova atutungulula, na ifwe bene tulingile ukuba ne yi imibele iyo umwanakashi umwina Foinike akwete. Tulingile ukuba abaicefya, tulingile ukutwalilila ukulomba Yehova ukuti aletwafwa, kabili tulingile ukukwata icitetekelo icakosa. Umuntu uwaicefya alatwalilila ukulomba Lesa ukuti alemwafwa. Tufwile no kutetekela sana Kristu Yesu kabili tulingile ukucetekela na abo apeela umulimo wa kutungulula fwe basambi bakwe. (Mat. 24:​45-47) Yehova na Yesu balatemwa nga ca kuti tuli abaicefya, nga ca kuti twatwalilila ukubalomba ukuti batwafwe, kabili nga ca kuti tuli ne citetekelo. Nga ca kuti tulecita ifi, bakalatwafwa kabili bakalatutungulula. (Linganyeniko Yakobo 1:​5-7.) Nomba natusambilile pa fyo Yehova atutungulula, pa fyo atupekanishisha fyonse ifyo tukabila pa kuti tuleba ne nsansa. Twalasambilila pa fyo twingapashanya umutumwa Petro, umutumwa Paulo ne Mfumu Davidi pa fyo tulingile ukucita pa kuti tulenonkelamo mu fyo Yehova atupekanishisha.

MULEISAMBILISHA ICEBO CA KWA LESA NGA FILYA PETRO ALECITA

7. Mulimo nshi Yesu apeele Petro, lelo finshi Petro alingile no kulacita? Londololeni. (AbaHebere 5:14–6:1)

⁷ Natulandeko pa mutumwa Petro. Petro ali pa baYuda ababalilepo ukwishiba ukuti Yesu e wali Mesia, e o Yehova alebomfya pa kusambilisha abantu “amashiwi ya mweo wa muyayaya.” (Yoh. 6:​66-68) Ilyo Yesu ashilabwelelamo ku muulu, aebele Petro ukuti: “Uleliisha utwana twandi utwa mpaanga.” (Yoh. 21:17) Petro alibombele uyu mulimo ne cishinka kabili Yehova alilengele alemba amakalata yabili ayaba mu Baibo. Lelo Petro alingile no kulaisambilisha Icebo ca kwa Lesa. Ku ca kumwenako, aleisambilisha mu makalata ayo umutumwa Paulo alembele. Petro alisumine ukuti ifintu fimo ifyo Paulo alembele fyali “ifyakosa ukumfwa.” (2 Pet. 3:​15, 16) Na lyo line, alitwalilile ukuisambilisha kabili alicetekele Yehova ukuti ali no kumwafwa pa kuti omfwe ifyo Yehova alengele Paulo alemba muli aya makalata ifyali kwati “fya kulya ifyakosa.” Alicetekele no kuti Yehova ali no kumwafwa pa kuti engalakonka ifyo aleisambilisha.—Belengeni AbaHebere 5:14–6:1.

8. Finshi Petro acitile ilyo malaika uo Yehova atumine kuli ena amwebele ukuti acite fimo?

⁸ Pa mulandu wa kuti Petro alitetekele sana Yehova, alekonka ifyo alemweba. Ku ca kumwenako, bushiku bumo ilyo Petro ali mu musumba wa Yopa, alimwene malaika mu cimonwa uwamwebele ukuti epaye no kulya inama isho Amafunde ya kwa Mose yaleseshe abaYuda ukulya pantu shali ishakowela. Pa mulandu wa kuti Petro ali muYuda, amwene ukuti talingile ukucita filya malaika amwebele ukuti acite. Pa kubala, Petro alandile ati: “Awe mwe Shikulu, pantu nshabalalyapo icakowela kabili icishasanguluka.” Lyena malaika amwebele ati: “Leka ukwita ifyo Lesa asangulwile ukuti ifyakowela.” (Imil. 10:​9-15) Petro alyumfwile ifyo malaika amwebele. Twaishiba shani? Tapakokwele ukutula apo Petro amwenene icimonwa, abaume batatu abo Korneli uwali Umwina Fyalo atumine balifikile kabili baebele Petro ukuti aleya nabo pa kuti aye alande na Korneli. Petro akanamona cilya icimonwa, nga tasumine ukuya ku ng’anda ya kwa Korneli pantu Korneli ali Mwina Fyalo. AbaYuda balemona Abena Fyalo ukuti bali abakowela. (Imil. 10:​28, 29) Nomba ilyo Petro aishibe fye ukuti Yehova alefwaya ukuti abantu bonse bomfwe imbila nsuma, taikete na ku cani, alile. (Amapi. 4:18) Alibilile imbila nsuma kuli Korneli na ba mu ng’anda yakwe kabili alitemenwe ilyo amwene basumina icine, bapokelela umupashi wa mushilo kabili babatishiwa no kubatishiwa.—Imil. 10:​44-48.

9. Bushe tunonkelamo shani nga ca kuti tulelya ifya kulya ifyakosa ifyaba mu Cebo ca kwa Lesa?

⁹ Nga filya Petro alecita, na ifwe bene tulingile ukulaisambilisha Icebo ca kwa Lesa. Ilingi line ifyo tuisambilisha fyalyanguka ukumfwa kabili fyaba kwati mukaka. Nomba tulingile no kulafwaisha ukulalya ifya kulya ifyakosa, e kutila ukulaisambilisha icine icakosa ukumfwa. Tulingile ukulakwata inshita iya kulaisambilisha sana Icebo ca kwa Lesa. Na kabili tulingile ukulaibikilishako pa kuti tuleumfwikisha fimo ifyaba mu Cebo ca kwa Lesa ifyo tushaumfwikishe kale. Nga tulecita ifi, tulanonkelamo mu nshila shibili. Inshila ya kubalilapo, tulasambilila fimo pali Yehova ifilenga twamutemenwako kabili twalamucindika sana. Inshila yalenga bubili, tulafwaisha ukwebako abantu ifisuma sana ifyo tusambilila pali Shifwe wa ku muulu. (Rom. 11:33; Ukus. 4:11) Na cimbi ico tusambililako kuli Petro ca kuti: Nga kwaba fimo ifya-aluka pa fyo twaishiba pa Cebo ca kwa Lesa, tufwile ukwangufyanya ukukonka ifyo fine. Nga tulecita ifi, Yehova akulatutungulula kabili tukalamubombela ne cishinka.

MULEPASHANYA PAULO KABILI MULEKWATA IMIBELE IINGALENGA LESA ASEKELELA

10. Ukulingana ne fyo Baibo ilanda pa Abena Kolose 3:​8-10, finshi tufwile ukucita pa kuti tulesekesha Yehova?

¹⁰ Inshila na imbi iyo Yehova atutungulwilamo, kutusambilisha imibele iingalenga asekelela. Umutumwa Paulo alembele ati, “fuuleni ubuntu bwa kale” kabili fwaleni “ubuntu bupya.” (Belengeni Abena Kolose 3:​8-10.) Palapita inshita pa kuti tufuule ubuntu bwa kale no kufwala ubuntu bupya kabili tufwile ukuibikilishako pa kuti tucite ifi. Natulandeko pali Paulo wine. Ukutula fye ilyo ali umwaice, alefwaya ukulasekesha Lesa. (Gal. 1:14; Fil. 3:​4, 5) Nomba taishibe ifyo alingile ukulapepa Yehova ukulingana ne fyo afwaya. Pa mulandu wa kuti taishibe ifyo Kristu alesambilisha kabili ali ne cilumba, aishileba umuntu “uwa musaalula,” kabili iyi mibele yalengele elasekesha Lesa.—1 Tim. 1:13.

11. Mibele nshi iyabipa iyo Paulo alingile ukuleka? Londololeni.

¹¹ Ilyo Paulo ashilaba Umwina Kristu, alekalipa bwangu sana. Ilyashi limo ilyaba mwi buuku lya Imilimo litila Paulo alifuliilwe sana abasambi ba kwa Yesu ica kuti ‘alebatiinya kabili alefwaya ukubepaya.’ (Imil. 9:1) E ico ilyo Paulo aishileba Umwina Kristu alingile ukuibikilishako pa kuti aleke ukukalipa bwangu. Aishileba umuntu uwatekanya kabili uwa cikuuku. (Efes. 4:​22, 31) Na lyo line, ilyo Paulo na Barnaba bapusene, Baibo itila “balikansene nga nshi.” (Imil. 15:​37-39) Ici icacitike, tacalengele Yehova asekelela, lelo Paulo alitwalilile ukuibikilishako pa kuti engakwata imibele iingalenga Yehova alasekelela.—1 Kor. 9:27.

12. Cinshi calengele Paulo alule imibele yakwe?

¹² Paulo alyalwile imibele yakwe pantu tashintilile pa maka yakwe umwine. (Fil. 4:13) Nga filya fine Petro alecita, Paulo na o ‘aleshintilila pa maka ayo Lesa alemupeela.’ (1 Pet. 4:11) Nangu cali ifi, inshita shimo Paulo alelufyanya kabili alefuupuka. Nomba nga afuupuka aletontonkanya pa fintu ifisuma ifyo Wishi wa ku muulu amucitiile, kabili ifi fyalelenga alefwaisha ukutwalilila ukwaluka pa kuti engalasekesha Yehova.—Rom. 7:​21-25.

13. Kuti twapashanya shani Paulo?

¹³ Kuti twalapashanya Paulo nga ca kuti tuleibukisha ukuti nangu ca kuti twalibombela Yehova pa myaka iingi, tulingile ukutwalilila ukufuula ubuntu bwa kale no kufwala ubuntu bupya pa kuti twingakwata imibele iisuma. Kwena inshita shimo kuti twalufyanya. Ku ca kumwenako, nga ca kuti twakalipa bwangu nelyo twaeba umuntu amashiwi ayabi, tatufwile ukulatontonkanya ukuti te kuti tucite nangu cimo icingalenga Yehova asekelela. Lelo tufwile ukutwalilila fye ukwesha na maka yesu yonse pa kuti twaluke mu fyo tutontonkanya na mu fyo tucita. (Rom. 12:​1, 2; Efes. 4:24) Na lyo line tulingile ukulaibukisha icishinka ca kuti: Nga tulefwaya ukwalula imibele yesu, tulingile ukuleka Yehova alatusambilisha kabili tulingile ukumwishiba bwino.

MULELEKA YEHOVA ALEMUCINGILILA NGA FILYA DAVIDI ALECITA

14-15. Bushe Yehova acingilila shani abantu bakwe? (Amalumbo 27:5) (Moneni ne cikope pa nkupo.)

¹⁴ Na kabili kuti twaba ne nsansa sha cine cine nga ca kuti Yehova aletucingilila. Bushe Yehova atucingilila shani? Kabili kuti twacita shani pa kuti aletucingilila?

¹⁵ Imfumu Davidi yalishininkishe ukuti Yehova ali no kulaicingilila mu nshita sha mafya. (Belengeni Amalumbo 27:5.) Yehova alacingilila abantu bakwe kuli fyonse ifingalenga baleka ukumucetekela. Bushe Yehova acingilila shani abantu bakwe ku fingalenga bucibusa bwabo na ena bwapwa? Alilanda ukuti icanso conse ico abantu bengapangila ababomfi bakwe tacakabombe. (Amalu. 34:7; Esa. 54:17) Nangu ca kuti Satana, ifibanda fyakwe na bantu abatucusha balikwata amaka, Yehova alikwata amaka ukubacila. Nangu fye bengatwipaya, Yehova akatubuusha. (1 Kor. 15:​55-57; Ukus. 21:​3, 4) Na kabili nga natusakamikwa, Yehova alatupeela amaka ya kushipikisha pa kuti twingatwalilila ukumubombela. (Amapi. 12:25; Mat. 6:​27-29) Yehova Shifwe uwatutemwa alitupeela na bamunyinefwe na bankashi abatusansamusha nga natukwata amafya. Alitupeela na baeluda abatucema. (Esa. 32:​1, 2) Ilingi line nga tulelongana, tulasambilila pa fintu ifyalekanalekana ifyo tufwile ukulacita pa kuti Yehova aletucingilila.—Heb. 10:​24, 25.

16. Bushe Yehova alecingilila shani Davidi?

¹⁶ Davidi nga aumfwila Yehova, alemucingilila ku mafya ayo abantu bakwata pa mulandu wa kubembukila Yehova ku mufulo. (Linganyeniko Amapinda 5:​1, 2.) Nomba Davidi nga akaana ukukonka amafunde ya kwa Yehova, Yehova talemucingilila ku fyabipa ifyalefuma mu fyo alesalapo ukucita. (2 Sam. 12:​9, 10) Inga lintu abantu balecusha Davidi, alecita shani? Davidi alepepa kuli Yehova kabili alemweba fyonse ifyo aleumfwa. Yehova na o alemusansamusha kabili alemulanga ukuti alimutemenwe sana kabili ali no kumusakamana.—Amalu. 23:​1-6.

17. Kuti twapashanya shani Davidi?

¹⁷ Kuti twapashanya Davidi nga ca kuti ilyo tushilasalapo ifya kucita tulelomba Yehova ukuti atutungulule. Na kabili tufwile ukulaibukisha ukuti inshita shimo kuti twacula pa mulandu wa kuti tatwasalilepo bwino ifya kucita. Nga twacula, tacipilibula ukuti Yehova nafilwa ukutucingilila. (Gal. 6:​7, 8) Na kabili nga ca kuti tulecula pa mulandu wa fintu fimbi, kuti twapepa kuli Yehova no kumulondolwela fyonse ifyo tuleumfwa kabili kuti twacetekela ukuti akalinda imitima yesu na matontonkanyo yesu.—Fil. 4:​6, 7.

TWALILILENI UKUSHINTILILA PALI YEHOVA PA KUTI ALEMUTUNGULULA

18. Bushe abantu abengi muno nshiku balafwaya ukuti Lesa alebatungulula, inga ifwe kuti twacita shani pa kuti Yehova atwalilile ukututungulula? (Moneni ne fikope.)

¹⁸ Ilembo lya mwaka wa 2026 lileti: “Ba nsansa abaishiba ukuti balakabila ifya kwa Lesa.” Maka maka muno nshiku, tufwile ukulakonka ifi Yesu alandile no kulashintilila pali Yehova pa kuti aletutungulula. Mulandu nshi? Pantu abantu abengi muno nshiku bamona ukuti tabakabila ifya kwa Lesa kabili tabafwaya ukuti alebatungulula. Bambi balisumina muli Lesa nomba tabamupepa ukulingana ne fyo afwaya. Bambi nabo bashintilila pa bantu banabo pa kuti balebatungulula. Ifi filenga belaba ne nsansa. Tatufwile ukulapashanya abantu ba musango uyu. Kuti twacita shani pa kuti twilabapashanya? Tulingile ukutwalilila ukuisambilisha Icebo ca kwa Yehova, ukulakwata imibele iingalenga alasekelela, ukulamumfwila no kulaleka aletutungulula.