Papita Imyaka 100 Ukutula mu 1913
MU ULUPUNGU lwa kwa Kalinda ulwa January 1, 1913, mwali amashiwi ayaishibikwa ku bengi ayo Herbert Kaufman, kalemba wa lyashi umwina America alandile aya kuti: “Ino nshita tatulanda ukuti ‘te kuti cicitike’ . . . Nalimo fyonse ifyo abantu balefwaya kale fyalicitika pali nomba.” Mu 1913 abantu balesubila ukuti ku ntanshi kukacitika ifintu ifisuma.
Cimo icalengele abantu ukulasubila ukuti ku ntanshi kukacitika ifisuma, buyantanshi mu fya kupangapanga. Ku ca kumwenako, mu United States akampani kapanga imyotoka isho beta ukuti Ford kaliswile fakitare iipya mu musumba wa Highland Park, ku Michigan. Mu nshita fye iinono, umutengo wa myotoka walibwelele sana pa nshi ica kuti abantu abengi sana balikwete imyotoka. Cinshi calengele umutengo ubwelele pa nshi? Icalengele ni co muli iyi fakitare iipya balitendeke ukupangilamo imyotoka. Ici calengele aka kampani ukulapanga imyotoka ishingi mu nshita fye iinono.
Abantu ba kwa Yehova nabo bene balesubila ifisuma lelo bena icalengele cintu cimbi. Kale sana, Abasambi ba Baibolo balibilishe ukuti mu mwaka wa 1914, mukacitika ifintu ifyaibela. Imibombele yabo yalilangile ukuti tabalebwelela inuma ilyo ulya mwaka walepalama.
Mu June 1913 ukulongana kukalamba mu fifulo ifingi kwalitendeke. Ukulongana kwabalilepo kwa bushiku bumo mu musumba wa Kansas, uwaba mu Missouri, ku United States. Pa milungu 4 iyakonkelepo, ishitima lyalesenda bamunyinefwe ne nkashi ukucila pali 200 mu United States na mu Canada. Aba bamunyinefwe bali sana ne nsansa. Pa kulongana kumo na kumo, abalelongana balebeba ukulanda nga kuti batemwa ukusambilila na fimbi. Abantu abengi sana balisumine kabili Abasambi ba Baibolo baleya mu kubasambilisha.
Mu mwaka wa 1913 ababomfi ba pa maofeshi yakalamba ku Brooklyn balibombeshe ukupanga ubunkolanya ubwaleti “Photo-Drama of Creation.” Ili lyali lyashi lya mu Baibolo ilya ma-awala 8. Muli ili lyashi mwali inyimbo ne fikope ifyo baletambisha cimo cimo e lyo ne fyo baletambisha kwati ni filimu. Abasambi ba Baibolo bale-enekela ukuti “Photo Drama” ikabomfiwa ku kushimikila abantu abengi abalefwaya ukumfwa icine, nangu ca kutila pali ilya nshita kwali fye bakasabankanya 5,100 abalebila imbila nsuma. Batile, “balefwaya abantu abengi pano calo ukumfwa ubukombe bwabamo.”
Cinshi cali no kucitika mu 1914? Bushe abantu bali no kutemwa ubunkolanya bwa “Photo-Drama”? Cinshi cali no kucitika Inshita sha Bena fyalo nga shapwa? Abasambi ba Baibolo balelolela ukwishiba ifyasuko kuli ifi fipusho, kabili balicetekele ukuti Yehova akabafwa.
Inkondo Iikalamba iyali no kwisa iyo batendeke ukwita ukuti Inkondo ya Calo iya Kubalilapo yali no kuletela abantu ubulanda. Ifya kupangapanga tafyali no kupwisha amafya ayo abantu bakwete. Mu mwaka wakonkelepo ifintu ifingi fyalyalwike sana ku Basambi ba Baibolo na mu calo conse.
[Icikope pe bula 174, 175]
Inyendo ba Pastor Russell baendele e lyo na Basambi ba Baibolo pa Hot Springs, mu Arkansas, pa 4 June, 1913
[Charti pe bula 177]
Ukulongana Kukalamba Ukwaliko mu 1913
Mu United States
Pertle Springs, Mo. June 1-8
Hot Springs, Ark. June 1-8
Los Angeles, Calif. June 11-15
San Francisco, Calif. June 14-16
Madison, Wis. June 29–July 6
Springfield, Mass. July 13-20
Asheville, N.C. July 20-27
Mu fyalo fimbi
Toronto, Canada July 20-27
London, England August 1-4
Glasgow, Scotland August 23-24
[Icikope]
Kardi: Inyendo isho Shimapepo Russell Ale-enda