WEBU SAITI YA JW.ORG—“Ubunte ku Nko Shonse”

Yesu atile: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” (Mat. 24:14) Webu saiti ya jw.org cine cine ileafwa abantu aba mu “nko shonse” ukwishiba icine mu nshita iinono iisheleko ilyo impela ishilaisa.

Bushiku bumo, ku calo ca Solomon Islands, mishonari umo no mwina mwakwe baleshimikila mu mushi uwabela ku lulamba lwa bemba uko bepaila isabi kabili basangile bashikulu bantu bane abakwete amafoni. E co balibepwishe nga ca kuti balishibe ifya kubomfya Intaneti pa foni, kabili balisumine. Lyena bamishonari balangile aba baume bane ifya kusanga Webu saiti ya jw.org, ifya kusanga ululimi lwabo, ifya kukopolola magazini na Baibolo, e lyo ne fya kubomfya ifipande fya lupwa ne fya bana. Lyonse nga baleshimikila, aba bamishonari balitemwa ukutambisha abaice vidio iitila, Pray Anytime. Ilyo abaice bamo batambile iyi vidio, balitemenwe sana ica kuti baile balebutuka mu kati ka mushi baleimba no lwimbo abati, “Anytime, anywhere, I can pray . . .”

Nomba natulande pa makalata ayanono fye pa makalata ayengi ayo abantu batuma ku maofeshi yesu ayakalamba ku New York:

“Ine na bena mwandi twalikuukila ku Mexico kabili tulesambilila iciSpanish pa kuti tuleshimikila abantu abengi. Lyonse nga naisula Intaneti pa jw.org, ndatasha Yehova pantu ndakutika no kusambililapo fimo. Paliba ifintu ifingi pamo nga magazini, ifitabo, inyimbo e lyo ne fyangalo fya mu Baibolo mu ndimi ishingi. Nalimutemwa kabili ndemutootela pa fyo mubombesha.”​—D.H., Mexico.

“Nshimwenesha, e co natemenwa sana Webu saiti yenu pantu paliba ifyakopwa ifingi ifyo ningakutikako. E co ndemukoselesha ukuti mutwalilile ukubika pa webu saiti ifitabo na mabroshuwa ayengi e lyo ne mpapulo na shimbi mu mashiwi yakopwa pantu kuti ndekutikako fye akasuba konse.”—K.G., United States.

“Ala nalitemwa iyi Webu saiti ya jw.org, pantu yalyanguka ukusanga ifyo ulefwaya kabili yalilenga ndefwaisha ukulaisambilisha no kufwaisha ukulashimikila. Ndi ne myaka 72 kabili apo nabatishiwilwa napapita imyaka 47 kabili nalibomba bupainiya pa myaka 30. Nakwata abana 9 kabili bonse balibatishiwa, abeshikulu 16 e lyo batatu fishikulula. Pali lelo mu lupwa lwesu mwaba inkulo sha bapainiya ba nshita yonse shine. Ala ndatasha Yehova ­pali ­ifi fya kulya fya ku mupashi ifya pa nshita yalinga.”—M.T., United States.

“Ino nshita ndelemba iyi kalata ni 4 koloko ya lucelo. Ilingi line ubushiku, ndafilwa ukulaala pantu nalilwala ubulwele ubulenga umuntu ukuba kwati alilwala ubulebe. Kabili nalikwata na mafya yambi ayo ababwananyina mwi sonde lyonse baculako. Yehova alatusunga bwino lwa ku mupashi, kanshi e co nalembele iyi kalata ya kumutasha. Ndeshiba bwangu ifintu nga fili mu fikope. E mulandu wine natemenwa sana iyi Webu saiti. Na kabili nalitemwa sana amacharti, amavidio ne fikope ifyo balondolola bwino mu mashiwi ayayanguka.”—B.B., New Zealand.

“Ico nalembela iyi kalata, kumutootela. Njikala mwi tauni limo ilyaba sana ukutali mu Sri Lanka, uko momba incito ya budokota kabili takwaba magazini ya mu lulimi lwandi. Nomba ndetootela sana pali iyi Webu saiti, pantu kuti nakopolola no kubelenga ifyebo mu lulimi lwandi. Webu saiti yenu ca bupe icisuma sana ico Yehova apeela abantu pamo nga ine.”—N.F., Sri Lanka.

“Nalemba ino kalata pa kuti imutashe pa fyo mubombesha ukwafwa abantu ukwishiba Yehova. Ala mutwalilile ukupanga amavidio pa Webu saiti ya jw.org. Amavidio yaba pali iyi Webu saiti yalafwa ulupwa lwesu. Vidio batila, Beat a Bully Without Using Your Fists e yangafwile sana. Na kabili ndetila, mwabombeni.”—Y.S., uwa myaka 9, ku United States.

“Ndefwaya ukumutasha no kutasha Yehova pa ca kulya ca ku mupashi ico tulepokelela. Webu saiti ya jw.org yalingafwa sana, maka maka icipande citila ‘Imisepela.’ Na kabili nalitemwa ne cipande citila Beni Cibusa wa kwa Yehova. Nalikwata abaice bandi batatu abakashana, kabili nalimona ukuti ifyebo fyaba pali iyi Webu saiti filebafwa sana. Nangu ca kuti twikala ukutali na imwe, tuli lupwa ulwaikatana pantu bonse twalitemwa Yehova. Natasha sana.”—A.B., Peru.