Mulebomfya Webu Saiti Yesu Ilyo Muleshimikila—“Amasuko ku Mepusho ya mu Baibolo”

Nga mwaya apo balemba ukuti “Amasambilisho ya mu Baibolo” pa jw.org, mukasanga apo balemba ukuti “Amasuko ku Mepusho ya mu Baibolo.” Nga twaishiba bwino amepusho yaba pali uyu mutwe, umuntu nga atwipusha icipusho cimo pali aya mepusho, kuti twamulanga fye Webu saiti yesu pa kuti amone ifyo Baibolo ya-asuka. Aya mepusho kuti twayabomfya na pa kutendeka ukulanshanya na bantu ilyo tuleshimikila. Kuti twasalapo icipusho ico abantu ababa mu cifulo tushimikilamo bengatemwa, no kubeba ukulanda ifyo baishiba, lyena kuti twalanshanya nabo ifyo Baibolo yalandapo, ukubomfya ifyebo fyaba pa jw.org. Pa numa, kuti twabalondolwela nelyo ukubalanga apo twacifumya ifyebo twacilanshanya nabo. Nalimo kuti twabeba fye ukuti babelenge icasuko pa Webu saiti. Muka kangalila wa muputule umo ena atemwa ukweba abantu ati: “Abantu abengi balepusha ukuti ‘Bushe Lesa e ulenga ukuti tulecula?’ Bushe kuti mwatemwa ukwishiba icasuko kuli ici cipusho mu masekondi fye 51?” Lyena alabalishisha amashiwi ayo bakopa umo bayasuka ici cipusho ayo akopolwela muli foni yakwe. Na pa kulekelesha alabalanga icipandwa 11 mu citabo citila Ico Baibolo Isambilisha.