IFYACITIKE UMWAKA WAPWILE

Imilandu

Umutumwa Paulo akoseleshe Abena Kristu ukuti: “Muleibukisha abo bakaka mu fifungo kwati na imwe balimukaka pamo na bo.” (Heb. 13:3) Apo tuli babomfi ba kwa Yehova, tulatwalilila ukwibukisha ababwananyina abacitetekelo kabili tulapepelako na “bashimucindikwa bonse; pa kuti tuleikala mu mutende kabili mu cibote pa kuti tufishepo bukapepa bwesu no kulabika amano ku fintu.”—1 Tim. 2:1, 2; Efes. 6:18.

Amalipoti yakonkapo yalelanda pa milandu imo imo iyo Inte sha kwa Yehova babapeele uyu mwaka wapwile:

Bamunyinefwe ku Russia balitwalilila “ukushimikila no kubila imbila nsuma ukwabula ukuleka” nangu ca kuti aba mwi calici lya Orthodox ilya ku Russia na ba mu buteko balafwaisha ukulesha umulimo wesu uwa kushimikila. (Imil. 5:42) Aba mu buteko balitwalilila ukubomfya ifunde ilishaishibikwa na bwino ilyo bapangile pa kuti bapwishe ubwafya bwa kusansa kwa fipondo, ku kucushishako bamunyinefwe no kulesha impapulo shesu isho bamona kwati mwaliba amashiwi ayabi sana. Ne ci calenga aba mu filye fya mu Russia bapingule ukuti mu mpapulo shesu nalimo 70 mwaliba amashiwi ayabi sana kabili ishi mpapulo bashipendela pa mpapulo isho ubuteko bwa Russia bwabinda mu calo. Pa mulandu wa uyu mutunganya, aba mu buteko bamo balitoba Amayanda ya Bufumu na mayanda ya bamunyinefwe pa kuti bafwayemo impapulo. Bakapokola nabo balalindika ba Nte abali mu mulimo wa kushimikila, balabakopa, balasenda ififwati fyabo kabili ilingi line balabatiinya ilyo babalindike.

Ukutendekela mu May 2013, bamunyinefwe na bankashi 16 aba mu musumba wa Taganrog, balibatwele mu kulubulula pa mulandu fye wa kuti balelongana, no kwasukapo e lyo no kushimikila. Uyu e muku wa kubalilapo uo Inte sha kwa Yehova babatwele ku kulubulula pa mulandu wa fyo basuminamo ukutula apo ubuteko bwa Soviet Union bwapwilile amaka. Aba mu buteko bwa ku Russia bacili balatunka bashicilye mu fitungu fimbi ifya calo ukubinda impapulo shesu no kulapeela bamunyinefwe umulandu wa kupata ifilonganino fya mapepo fimbi.

Mu Eritrea namo mwine ababwananyina bacili balebacusha. Mu July 2013, ba Nte abaali mu cifungo baali 52 kabili 8 pali aba ni bamunyinefwe na bankashi 6 abali ne myaka ukucila pali 70. Bamunyinefwe batatu, Paulos Eyassu, Isaac Mogos, na Negede Teklemariam balibakaka mu cifungo ukutula pa 24 September 1994, pa mulandu wa kukaana incito ya bushilika.

Ukucila pali hafu wa bamunyinefwe baba mu cifungo ca ku Meiter, icabela ku kapinda ka ku kuso aka musumba ukalamba uwa Asmara. Ukufuma mu October 2011 ukufika mu August 2012, aba mu buteko balikandile bamunyinefwe 25 ilyo bababikile mu kayanda akepi ako bakuulila na malata yeka yeka. Mu lusuba, bamalonda balafumya abafungwa akasuba pantu mulakaba sana. Na lyo line, tababapeela ifya kulya fyalinga na menshi, kanshi bamunyinefwe balacula sana. Ku ca bulanda, Munyinefwe Yohannes Haile, uwali ne myaka 68 alifwile mu August 2012 pa mulandu wa kumucusha. Ifi fine e fyafwile na Munyinefwe Misghina Gebretinsae mu 2011.

Balikeene Ukubomba Incito Itungilila Ifya Bushilika pa Mulandu wa Kampingu Yabo

Ukulingana na Esaya 2:4 na Yohane 18:36.

ARMENIA

Icilye ca European Court of Human Rights (ECHR) calipingwile bwino umulandu pa 27 November, 2012 uwalebimbamo ba Khachatryan na banabo e lyo no buteko bwa Armenia. Ubuteko bwapeele ba Nte 17 umulandu wa bumpulamafunde pa kukaana ukubomba incito iyaletungululwa na bashilika nangu ca kuti tayali bushilika. Ubuteko bwa Armenia bwalifuta bamunyinefwe pa lufyengo kabili bwalibalipila ne ndalama balebomfya mu kulubulula.

Nangu ca kuti ba Nte baliwinine umulandu uwalebimbamo ba Khachatryan na ba Bayatyan e lyo kabili ne cilye ca ECHR naco catile ba Nte tabakwete umulandu, ubuteko bwa Armenia bwalitwalilile ukulaikata ba Nte bacaice abalekaana ukwingila ubushilika pa mulandu ne fyo basuminamo. Lelo, pa 8 June, 2013, ubuteko bwaliyalulako fimo kwi funde ifilemoneka ukupoka abashilika amaka ya kulatungulula imilimo iishili ya bushilika. Ilyo calefika pa 12 November, 2013, ba Nte bonse abo bakakile pa mulandu wa kukaana ukwingila incito ya bushilika balibakakwile, kabili bamunyinefwe abacaice nga balomba ukubombako incito imbi mu nshita ya kubomba ubushilika balebasuminisha.

SOUTH KOREA

Ilyo calefika pa 31 October 2013, ninshi bamunyinefwe 602 baali mu cifungo. Ukufuma mu 1950 ukufika na lelo, ubuteko bwa ku South Korea bwalikaka ba Nte 17,605 mu cifungo imyaka yonse pamo 34,184 pa mulandu fye wa kukaana ukwingila ubushilika.

Ni nomba line fye balekele ukubika ba Nte mu cifungo cimo cine ne fipondo ifyapanga imilandu iikulu sana. Bamunyinefwe e bailemona umukalamba wa fifungo no kulomba ukuti abalashi ba cifungo belabika bamunyinefwe pamo na bafungwa bambi mu fifungo. Abalashi ba fifungo balibombelepo bwangu no kupaatukanya bamunyinefwe ku bafungwa bambi ica kuti ilyo calefika mu April 2013, ninshi bamunyinefwe abengi baleikala beka beka, bane nelyo basano mu miputule ya mu cifungo. Busuma nshi bwaba muli ifi ababwananyina bekala beka nomba?

Munyinefwe umo atile, “Nomba twalileka ukumona imisango ya bupulumushi no kumfwa imilandile ya musaalula.” Na umbi munyinefwe atile, “Pali ino nshita tulakoseleshanya kabili tulalongana ukulongana konse kusano cila mulungu.”

Nangu cibe ifyo, abaume 56 abo bafumishe ubushilika abaishileba Inte sha kwa Yehova, pali ino nshita balabacusha, balabalipilisha indalama no kubalindika pa kapokola pantu balakaana nga babeta ukuya mu kusambilila ifya bushilika. Ala calyafya ukupwisha ulu lufyengo, pantu nomba yaba imyaka 8 aba bamunyinefwe babeta fye ukuya ku kusambilila ifya bushilika.

SINGAPORE

Nangu ca kuti bamunyinefwe balyesha pa miku iingi ukulomba ubuteko ukuti bulebapeelako imilimo imbi iishili ya bushilika, bamunyinefwe 12 bacili balibakaka mu cifungo ca bashilika ica Armed Forces Detention Barracks kabili cila muntu bamukaka imyeshi 39. Munyinefwe na umbi balimukaka umwaka umo pa kukaana ukubomba imilimo ya bushilika.

TURKMENISTAN

Bamunyinefwe 9 abakaana ukubomba umulimo wa bushilika pa mulandu wa kampingu balibakaka imyeshi 18 ukufika na ku myaka ibili kabili balabapuma icabipisha kuli bakalinda ba fifungo na ku bashilika. Ilingi line nga bafuma, balabekata na kabili no kubabika mu fifungo umo babasopa sana. Abalwila insambu sha ba Nte 10 abakaana ukubomba ubushilika balitwala umulandu ku cipani cilolekesha pa nsambu sha bantu ica United Nations Human Rights Committee.

Balikaana Ukulasefyako Imitebeto ya Calo pa Mulandu wa Kampingu Yabo

Ukulingana na Daniele 3:16-18.

Tanzania: Ilyo icilye casangile ukuti tabakwete umulandu, aba bana be sukulu ba Nte balitampile ukuya ku sukulu na kabili

TANZANIA

Bakapingula bonse mu cilye cikalamba icaba mu Dar es Salaam, ku Tanzania ica The Court of Appeal batile, abalashi be sukulu balilufyenye pa kutamfya abana be sukulu basano no kwimika bambi 122 pa mulandu wa kukaana ukwimba ulwimbo lwa cishipa. Mu bupingushi ubo basabankenye pa 12 July, 2013, icilye calisumine ukuti abana be sukulu ba Nte balikwete insambu sha kupepa no kucita ifyo kampingu yabo yalebasuminisha. Icitetekelo cakosa ico aba baice balangile calengele ishina lya kwa Yehova ukusansabikwa no kukwata ubuntungwa bwa kupepa mu Tanzania.

Ubuntungwa bwa Kushimikila

Ukulingana na Imilimo 4:19, 20.

KAZAKHSTAN

Ibumba limo ilyo bapeele umulimo wa kufwailisha pa mipepele ya ba Nte, ilyaletungululwa ne cipani cilolekesha pa fya mapepo ica Regional Department of Religious Affairs lyatile, mu fitabo ifingi ifya Nte sha kwa Yehova, mwaliba ifyebo ifyabipa sana kabili ifingalenga abantu bapatana no kukanaumfwana mu mipepele. Pa 6 April, 2013, bakapokola ba mu musumba wa Karabalyk baliituntumbile no kuyasansa abalelonganina mu ng’anda no kubapoka impapulo. Pa 3 July, 2013, icilye ca Astana Economic Court calibindile impapulo shesu 10, kabili ubu bupingushi bwalenga ukuti balesopa sana impapulo shesu ishilefuma ku nse ya calo no kubelengamo nga ca kuti muli ifyebo ifyabipa. Lyena, mu December 2012, abalashi ba buteko batendeke ukulaikata no kukaka bamunyinefwe pa mulandu uo balebapeela uo abene baleti ba Nte balebomba umulimo wa bumishonari uushili wa mwi funde. Pa 28 March, 2013, akabungwe kalolekesha pa fya mapepo kaebele ba Regional Religious Center of Jehovah’s Witnesses ukweba ba Nte bonse mu Kazakhstan ukuti nga babasanga baleshimikila ukuli konse, mulandu kano fye mu fikuulwa fyabo ifyalembeshiwa ku buteko. Ilyo calefika mu July 2013, ninshi abalashi ba buteko balitwala bamunyinefwe na bankashi 21 ku cilye.

Ubuntungwa bwa Kulongana no Kupepela Pamo

Ukulingana na AbaHebere 10:24, 25.

AZERBAIJAN

Mu January 2010, icipani ca buteko icilolekesha pa tubungwe twa mapepo ica State Committee for Work with Religious Associations calikeene ukulembesha na kabili imipepele ya Nte sha kwa Yehova pa mulandu wa fyo balemona kwati tafyali bwino mu mapepala ya kulembeseshapo ayo ba Nte batwele. Nangu ca kuti bamunyinefwe balyeseshe pa miku iingi ukuwamya ifyo ubuteko bwaleti fyalilubene, abalashi bacili balakaana ukupoka amapepala ya ba Nte. Pa 31 July, 2012, bamunyinefwe balitwele umulandu ku cilye ca ECHR uko bailishenye ukuti ubuteko bwalibekala pa nsambu sha buntungwa bwa kupepa pa kubakaanina ukulembesha icilonganino cabo ica mapepo apabula umulandu. Nga ca kuti babakaanina ukulembesha na kabili ninshi bamunyinefwe tabakakwate insambu shakumanina isha kupepa.

Insambu sha Kucingilila Abantu ne Fipe Fyabo

Ukulingana na Abena Filipi 1:7.

UKRAINE

Nangu ca kuti ba Nte mu Ukraine balikwata ubuntungwa bwa kupepa, balabapuma, balabocela amayanda no batobela Amayanda ya Bufumu kabili bakapokola tababikako na mano nangu ukukanda abacita ifi. Ici e calenga na balwani ba ba Nte ukubacusha apo balefwaila. Ala kanshi bamunyinefwe baliculile nga nshi mu 2012 na mu 2013. Mu 2010, kwali imilandu 5 umo bamunyinefwe babatobele ifipe fyabo no kubocela amayanda. Mu 2011 imilandu ya musango uyu yafikile 15. Mu 2012 yafikile 50 kabili mu myeshi fye isano iya kubalilapo mu 2013, yafikile kuli 23. Iofeshi lya musambo lyalitwala ulu lufyengo ku cipani cilolekesha pa nsambu sha bantu ica United Nations Human Rights Committee.

Ukraine: Bamunyinefwe balepekanya ukukuula cipya cipya Ing’anda ya Bufumu iyo batobele no koca baoca

Insambu sha Kuisalila Ifya Kucita

Ukulingana na Imilimo 5:29 na Imilimo 15:28, 29

ARGENTINA

Mu 2012, ba Pablo Albarracini abaiminine mupepi na uko ifipondo fyalefwaya ukwiba, balibacenene sana ne mpolopolo sha mfuti kabili babatwele ku cipatala ninshi nabafwa icipuupu. Ba Albarracini balisaine kale kardi ya Uwa Kunjimininako Kuli Badokota iyo beta mu ciNgeleshi ati durable power of attorney (DPA) iyalelanga ukuti balikeene ukubikwamo umulopa. Nangu ca kuti aba ku cipatala balefwaya ukukonka ifyo ba Albarracini basaine, lupwa wabo umo uushili Nte aile ku cilye no kupoka insambu sha kuti babikemo munyinefwe umulopa pantu alemona kwati e cali no kumupususha. Lelo, icilye cikalamba ica mu Argentina catile munyinefwe alikwete insambu sha kuisalila ifyo aba ku cipatala bafwile ukumundapa nangu ca kuti takwete amaka ya kuilandila. Tabamubikilemo umulopa kabili alipolele ica kuti atashishe na Yehova uwamwafwile ukuba uwa kaele ilyo akwete ubu bwafya.

Balibatobele Ing’anda ya Bufumu Pantu Balipatile Ukupepa Kwabo

Ukulingana na Luka 21:12-17.

KYRGYZSTAN

Pa 16 April, 2013 bamunyinefwe mu Toktogul baliwinine umulandu uo batwele ku cilye pantu abantu bamo kuli iyi ncende balitobele Ing’anda ya Bufumu imiku ibili. Icilye calipeele aba bantu imilandu no kubeba ukufuta ba Nte. Abali pa ntanshi mu kutoba Ing’anda ya Bufumu pa muku wa kubalilapo balibekata kabili tulesubila ukuti ici cikalenga aya mafya yakapwe. Lelo, pali ino nshita ifilonganino fili no kukuula iyi Ng’anda ya Bufumu cipya cipya.

[Icikope pe bula 34] — Kyrgyzstan: Abekashi ba kuli iyi ncende balyocele iyi Ng’anda ya Bufumu imiku ibili

Imilandu Ikalamba iyo Bacimfishe mu Cilye

Umulandu: Bushe icilonganino ca mapepo cilingile ukupoka ulusa pa kuti bakwate ukulongana kukalamba no kulongana kwa cila mulungu?

Ifyo bapingwile: Pa 5 December, mu 2012, icilye ca Constitutional Court of the Russian Federation capingwile ukuti bamunyinefwe kuti balelongana ukwabula no kupoka ulusa ku ba mu buteko pantu mu Russia mwaliba ifunde ilipeela abantu ubuntungwa bwa kupepa.
Umulandu: Bushe abekala calo balingile ukulanga bambi amapepala apo balemba ifya cipatala? Icacitike: Mu 2007 shicilye umo uwa mu musumba wa St. Petersburg mu Russia, aebele ababomfi ba mu cipatala bonse ukulatwala amapepala aya ba Nte bonse abalekaana ukubikwamo umulopa kwi ofeshi lyakwe, lelo ukwabula ukuti ba Nte abene beshibe. Ilyo ifilye fya ku Russia fyafililwe ukucingilila insambu sha ba Nte, bamunyinefwe batwele umulandu ku cilye cikalamba ica European Court of Human Rights (ECHR).

Ifyo bapingwile: Pa 6 June mu 2013, icilye ca ECHR capingwile ukuti shicilye alilufyenye kabili takwali “imilandu ine ine” iyo aba mu buteko balingile ukulamwena pa fipepala fya ku cipatala ifya bantu bambi. Pa 7 October umulandu walipwile ilyo sekishoni iikalamba sana iya mu cilye ca ECHR yakeene ukupituluka mu mulandu wa buteko bwa Russia.—Avilkina and Others v. Russia.

Apafikile Imilandu ya mu Cilye Iyalandilwepo mu Citabo ca Ilyashi lya Nte sha kwa Yehova

Ubuteko bwa France bwalisumina ukucita ifyo icilye ca ECHR capingwile pa 5 July, 2012 mu mulandu uo ba Nte balebalipilisha umusonko uo tabalingile ukulipila. Ubuteko bwalibwesesha ba Nte indalama bwabalipilishe, bwalibabikilapo na nsonsela, kabili bwalibabwesesha indalama babomfeshe pa kulubulula. Bwalifumyapo ne cibindo bwabikile pa fipe fya pa musambo wa ku France ifyo bwali no kupoka nga ca kuti ba Nte tabalipile indalama.—Ilyashi lya Nte sha kwa Yehova 2013, ibula 34.

Inte sha kwa Yehova bacili balebacusha sana mu fitungu ifingi ifya ku India. Lelo pali ino nshita tabalabalindikapo mu cifungo nelyo ukubalubulwishapo pa milandu ya bufi nga fintu caleba mu myaka ya ku numa. Pali ino nshita, kuli imilandu nalimo 20 umo bafyengele bamunyinefwe iyo balelolela ukuti bakapingule bwino mu cilye.—Ilyashi lya Nte sha kwa Yehova 2013, ibula 35.