Kalata Ukufuma kwi Bumba Litungulula

Kuli Bamunyinefwe na Bankashi:

Kasesema Esaya alishibe ukutila icalengele ukuti ifintu fileenda bwino mu Bufumu bwa kwa Yuda nico Yehova alebapaala. Pali Esaya 26:12 atile, “Mwe Yehova, . . . namutubombela fyonse.” Nga twatontonkanya sana pa fintu ifyacitike mu mwaka wa mulimo uwapwile, na ifwe bene kuti twasuminisha amashiwi ayalandile uyu kasesema. Cine cine Yehova ‘alecita ifipesha amano ifishatala aficitwa!’ (Ukufu. 34:10) Taleni tontonkanyeni pa mapaalo yamo yamo ayo twakwata pa mulandu wa kuti Yehova alatwafwa.

Webu saiti yesu iya jw.org ilebomba bwino sana. Nomba ili mu ndimi ukucila pali 600, kabili kuti mwabelenga no kukopolola impapulo mu ndimi ukucila pali 750. Bushe iyi webu saiti ileyafwa shani abantu abafwaya ukusambilila icine? Ku ca kumwenako, abaupana bamo balilekele ukucetekela imipepele pantu balimwene ifyo abantu ababa muli iyi mipepele baba no bumbimunda. Ilyo balefwailisha ifingabafwa ukwishiba Lesa, balisangile webu saiti yesu. Balitampile ukubelenga impapulo shesu e lyo no kulatamba amavidio. Lyena balikopolwele na katabo ka Ukubebeta Amalembo Cila Bushiku kabili balebebeta amalembo cila bushiku na bana babo babili. Na kuba, lintu Inte sha kwa Yehova babatandalile, babasangile balebebeta ilembo lya bushiku. Ba Nte ababashimikile imbila nsuma batile ifyo aba muli ulu lupwa balesambilila pa webu saiti fyalibafwile ukwalula imisango yabo. Balifuutile ifyo bashilawile pa mubili no kupoosa ifimpashanya, balilekele ukusefya inshiku sha mwikalwe e lyo no kutamba amafilimu yabipa. Balilekele ukucita fyonse ifi ilyo ba Nte bashilabashimikila ne mbila nsuma. Pa nshita ici icitabo calelembwa ninshi aba abaupana no mwana wabo umo ni bakasabankanya kabili balepanga ukubatishiwa.

Twalipokelela na mashiwi ayasuma aya kutasha pali programu yesu iya JW Broadcasting. Iyi programu iibako cila mweshi, nomba ili mu ndimi ukucila pali 70 kabili ku ntanshi ikalabako mu ndimi na shimbi. Aba mu ndupwa ishingi balatamba iyi programu pa Mapepo ya Lupwa. Munyina umo atile: “Icilonganino ca kwa Yehova nacikula sana ica kuti natwishiba bwino sana aba mwi Bumba Litungulula!”

Abantu ba kwa Yehova balatemwa sana ukusangwa ku kulongana kwa citungu. Ukulongana kwa citungu ukwali mu ncende ishalekanalekana mu mwaka wa mulimo uwa 2015 nako kwaliweme nga nshi. Pali kulya kulongana, balitambishe amavidio 42 ne fikope, e lyo ne nyimbo 6 isho balelisha ilyo ukulongana takulatendeka. Munyina umo uwabombela Yehova pa myaka iingi atile: “Ukulongana nga kwatendeka abantu baleikala fye pa fipuna pantu balefwaya ukumfwa fyonse.” Mishonari umo atile, “Amavidio ayo batambishe pali uku kulongana yalengele nashininkisha ukuti ifyo tusambilila e lyo no Bufumu bwa kwa Lesa fya cine.”

Na kabili mu mwaka wapwile twalikwete inyimbo sha Bufumu ishipya ishafumine. Abaupana bamo balembele abati: “Nga tulekutika kuli ishi nyimbo ishipya tumfwa kwati Yehova natukumbatila. Shilatusansamusha nga tuli na mafya.” Ifyo twasambilile pali uku kulongana fyalengele twaibukisha ifyo aba bwananyina abemba babombesha pa kuti Yehova alelumbanishiwa!

Bushe bakasabankanya ababa mu cilonganino cenu balashimikila imbila nsuma ukubomfya kastandi ka mawilo? Ala iyi nshila ya kubililamo imbila nsuma ilebomba bwino sana! Abantu bamo abekala mu mayanda ayo bashingulushako ulupango ayakwata amalinga na abekala mu fikuulwa ifya ntunti ishitali sana nabo bene balesambilila icine ukubikako fye na ba Nte bamo abali abanaka. Mu January mu 2015, umwaume umo uwa ku South Korea aile apo ba Nte baleshimikila imbila nsuma ukubomfya kastandi ka mawilo. Abalondolwelele ati alefwaisha ukwishiba ifyaba mu Baibolo. Balitendeke ukumusambilisha Baibolo. Mu February aliile mu kulongana pa muku wa kubalilapo; lyena mu March, alilekele ukupeepa fwaka. Mu April uyu mwaume aliletandala kwi ofeshi lya musambo ku South Korea kabili alitwalilila ukulunduluka mu fya kwa Lesa. Ili ilyashi twalandapo limo fye pa malyashi ayengi nga nshi ayo twapokelela kuno ku maofeshi yakalamba.

Ico tulefwaisha ca kuti ifyebo ifyali pa kulongana kwa citungu fyafwe abantu bonse abalebombela Yehova pa nshita imo, ukubwelela kuli ena ilyo impela ishilaisa! Tulemukoselesha bonse ukupokelela bwino abakulabwelela kuli Yehova. Nga mwabapokelela bwino ninshi mulepashanya Yehova.—Esek. 34:16.

Ukwabula no kutwishika, Yehova alitupaalile sana mu mwaka wa mulimo uwa 2015. Ni finshi fimbi ifyo tuleenekela? Tulingile twalolela. Ilyo tulelolela, ishibeni ukuti fwe ba mwi Bumba Litungulula twalimutemwa nga nshi kabili lyonse tulamupepelako.

Shi Yehova engalamupaala,

Ni fwe bamunyinenwe,

Ibumba Litungulula Ilya Nte sha kwa Yehova