JW Broadcasting ‘Ilatukosha no Kutusansamusha!’

UKUTULA mu 2014 apo batendekele umulabasa wa pa Intaneti uo beta ukuti JW Broadcasting, abantu mwi sonde lyonse abatamba uyu umulabasa balakoseleshiwa sana kabili balaba ne nsansa. Uyu mulabasa nomba waba mu ndimi ukucila pali 90. Ku ca kumwenako, nomba amaprogramu balayapililwa mu ciEwe, iciGa, ne ciTwi. Kanshi bakasabankanya ukucila pali 130,000 abekala mu Benin, mu Côte d’Ivoire, mu Ghana, na mu Togo balatemwa ukutamba uyu mulabasa.a

Ba Agatha ba muka bakangalila wa muputule ku Ghana batile: “Nga ndekutika ku ba mwi Bumba Litungulula na bakafwa babo, ng’umfwa kwati Yehova alelanda na ine. Nga takwali uyu mulabasa, nga nshakwete ishuko lya kwishiba bwino aba bamunyinefwe no kukutika kuli bena. Uyu mulabasa walilenga twaishiba bwino bamunyinefwe na bankashi mwi sonde lyonse.”

Ku Zambia kwafumine lipoti iyatile: “Nangu ca kuti bakasabankanya mu filonganino ifingi bapiina, balabombesha pa kuti batambe JW Broadcasting. Ku ca kumwenako, icilonganino ca Misako cabela apalepa amakilomita nalimo 30 ukufuma mwi tauni lyabela mupepi kabili cabela mu mpanga umwaba utumana utwapikana sana kabili mu mainsa tulakwata sana amenshi.” Ba Simon ababomfi batumikila abaile mu kubombela pali ici icilonganino icali mu kukabila, balondolwele ukuti: “Cila mweshi kulaba uwenda amaawala yabili ukuya pa musebo no kunina motoka iileya ku tauni uko baya mu kukopolola amaprogramu. Abaume bamo abali ne myaka 70 na bana babo babili abaume tabatalile abalonganapo ne Nte sha kwa Yehova, nomba ilyo baumfwile ukuti kulaba ukutamba amavidio nangu ca kuti ni ku mushi, aba baume balefwaisha ukuya mu kulongana. Batile: ‘Iyi e nshila twingeshibilamo Lesa.’”

Kalata ya kutasha iyafumine ku Russia yatile: “Apo twatendekela ukutamba JW Broadcasting, napapita umwaka umo kabili twalitemwa sana ukukwata ili ishuko. Ilyo twatambile fye programu ya kubalilapo, twalyumfwile ifyo twaikatana na ba bwananyina! Twalitemenwe sana! Twalimwene ukuti tuli lupwa lumo ulukalamba! Twalitemenwe sana ukumona bamunyinefwe aba mwi Bumba Litungulula. Balalanda ifyebo ifyo batupekanishisha pa nshita iyalinga. Tulafwaisha ukutamba umulabasa cila mweshi. Kabili tulatemenwako ukwitwa ukuti Inte sha kwa Yehova. Twatasha sana bamunyinefwe! Tuletasha Yehova na Kristu pa milimo yonse iisuma iyo babomba. Tulakoseleshiwa sana kabili tulaba ne nsansa!”

Ba Horst na ba Helga abaupana kabili abakoloci abalwalilila abekala ku Germany batile: “JW Broadcasting isuma icine cine. Tulakoseleshiwa maka maka nga twaumfwa amalyashi ya bamunyinefwe na bankashi abalemana. Ifyo aba aba bwananyina babomba filatukoselesha ukubomba apapela amaka yesu te mulandu no kuti tulalwalilila. Ilyo twatambile munyina uwalemana sana kabili eluda, twalisambilileko ukuti bonse fye kwaliba ifyacindama ifyo twingacitila Yehova. Nga twamona ifyo aba aba bwananyina babomba bwino, tufwile fye ukutasha Yehova no kupepa ukuti alebapaala sana.”

Kodi uwikala ku England atile: “Ndetasha sana pa nshita ne fyo mubombesha pa kupanga jw.org, JW Broadcasting na mavidio ya kwa Kalebu na Sofia. Natasha pa fyo mutwafwa ukumfwikisha Baibolo. Nabatishiwe ninshi ndi ne myaka 8. Nga nakulako panono, nkabombako umulimo wa kuipeelesha mu kukuula Amayanda ya Bufumu! Kabili kuti natemwa ukubombako pa Bethel. Apa nomba ndi ne myaka 9, kanshi kwashala fye panono.”

Arabella uuli ne myaka 8 uwikala ku England alembele ukuti: “Ndetasha pa mavidio na pa fya kucita ifiba pa jw.org. Filangafwa ukwishibilako Yehova. Ndatemwa sana ukusambilila pali Yehova ukubomfya ifya kucita pa kusambilila ifiba pa jw.org. Mwalishiba sana ukupanga inyimbo ishayanguka isho bonse bengebukisha. Nalitemwa na mavidio ya kwa Kalebu na Sofia. Natasha pa fyo mubombesha.”