Ukukuula Bwangu Amayanda ya Bufumu

ALA cilawama sana ukumona ifyo Yehova alelenga abantu mwi sonde lyonse baleisa mu kupepa kwa cine! (Esa. 60:22) Apo abantu abengi baleisa mu kupepa kwa cine, Amayanda ya Bufumu na yambi yalefwaikwa. Amayanda ya Bufumu ukucila pali 13,000 e yalefwaikwa ukukuulwa mwi sonde lyonse.

Pa kuti Amayanda ya Bufumu yakuulwe bwangu kabili ukwabula ukupoosapo indalama ishingi, Ibumba Litungulula lyalyalulako ifintu ifyo ababa mu madipartimenti ya makuule balingile ukulakonka. Aba bwananyina ababombela muli Dipartimenti iyo bapangile nomba line iyo beta ukuti Worldwide Design/Construction Department (WDC) balabombesha pa kuti amakuule no kuwamya ifikuulwa fya kupepelamo filebombelwapo bwangu. Iyi yaba mu Brooklyn, ku New York dipartimenti kabili e ilolekesha pa makuule mwi sonde lyonse. Ababombela ku dipartimenti ya makuule iyo beta ukuti Regional Design/Construction Departments (RDC) iya ku musambo wa Australasia, uwa Central Europe, uwa South Africa, no wa United States balabombesha pa kukuula bwangu Amayanda ya Bufumu kabili ukwabula no kupoosapo indalama ishingi mu fitungu umo babombela. Ababa muli iyi dipartimenti balasambilisha ababomfi ba makuule ifya kuwamya ififulo apa kupepela ne fya kulafisunga bwino. Na kabili, cila musambo walikwata dipartimenti ya makuule iyo beta ukuti Local Design/Construction Department (LDC) iyangalila umulimo wa makuule ya Mayanda ya Bufumu ne Fikuulwa fya Kulonganinamo Ukulongana ku Kalamba.

Mu January 2015, baeluda bonse aba ku United States balikumene no kulanshanya pa nshila ishipya isha kukuulilamo Amayanda ya Bufumu ne nshila sha kulayasungilamo. Ifi e fyo balanshenye.

• Ifya kukuula Amayanda ya Bufumu: Bali no kulakuula Amayanda ya Bufumu aya musango umo wine ukulingana na ku ncende baleyakuulila kabili ukulingana ne fyo Komiti ya Kusabankanya iye Bumba Litungulula yabasuminisha. Amayanda ya Bufumu ya kulakuulwa mu musango wa kuti tabakulapoosa indalama ishingi pa ku yasunga bwino, lelo yakulaba ayakosa kabili yakulamoneka bwino.

• Ifya kusunga Amayanda ya Bufumu: Bakasabankanya abakalaitemenwa ukubomba, bakalabasambilisha ifya kusunga bwino ifikuulwa fya kupepelapo pa kuti filaonaika bwangu.

Ca cine, umulimo wa kukuula no kusunga ifikuulwa fya kupepelapo ukalamba sana. Lelo abantu ba kwa Lesa nga babombela pamo, umulimo wa makuule ukalabombwa bwangu kabili bakulabomfya bwino indalama isho aba bwananyina basangula mu filonganino.