Ukupeela Yehova Amaofeshi ya Musambo

NKASHI umo uwaliko ilyo balepeela Yehova iofeshi lya musambo ku Madagascar pa Cibelushi pa 24 January, 2015, atile: “Nalitemenwe icine cine.” Uyu nkashi, pamo na ba bwananyina 583 abaliko, balitemenwe nga nshi ukumona icikuulwa icipya ica miputule 19 umwakwikala ababombela pa musambo no muputule uwakuliilamo uo bakushisheko e lyo no muputule uwakwipikilamo uo bawemye. Balikuuliilepo amaofeshi na yambi umwakubombela ababa muli Dipartimenti ya Mulimo, dipartimenti iilolekesha pa ndalama e lyo na Dipartimenti ya Makuule. Na kabili balikuulile imiputule iipya umwakubombela ababa mu dipartimenti ikopa amashiwi ne fikope, na dipartimenti ya lulimi lwa bankomamatwi, kabili balipanga na dipartimenti iipya iipanga impapulo mu filembo fya mpofu. Abaliko babalilepo ukumfwa ilyashi lya kale pa fyo umulimo wa kubila imbila nsuma wali mu Madagascar, lyena bakutike kuli munyinefwe Mark Sanderson uwa mwi Bumba Litungulula uwalandile ilyashi lya kupeela Yehova amaofeshi ya musambo.

Pa 14 February mu 2015, ba Nte mu Jakarta ku Indonesia balitemenwe nga nshi ilyo balepeela amaofeshi ya musambo kuli Yehova, pantu pa nshiku shafumineko mu Jakarta mwali ilyeshi, lelo pali ubu bushiku lyalicepeleko. Amaofeshi ya musambo nomba yaba mu cikuulwa ica ntunti 42 na mu cikuulwa ica ntunti 12 kabili ifi fikuulwa fyalipalamana. Na kabili ama dipartimenti yambi aya musambo yabela mu fikuulwa ifinono ifyabela mupepi. Ba Anthony Morris ababa mwi Bumba Litungulula e balandile ilyashi lya kupeela Yehova amaofeshi ya musambo, kabili ubushiku bwakonkelepo abantu 15,257 balilongene mu cibansa ca mupila ku kukutika ku lyashi ilyakwete umutwe uwaleti “Keep Enduring in Work That Is Good.” (Twalilileni Ukubomba Imilimo Iisuma) Abantu 11,189 e bakutike kuli ili lyashi pa makompyuta mu ncende 41 kabili uyu e wali umuku wa kubalilapo ilyo ba Nte abalongene bafulile sana mu Indonesia. Ba Ronald Jacka, bamo pali bamishonari ababalilepo ukubombela ku Indonesia batile: “Ilyo nafikile mu 1951, mu Indonesia monse mwali fye ba Nte 26. Nomba lelo abantu ukucila pali 26,000 e balongene pano. Ukwabula no kutwishika, Yehova alepaala abantu bakwe muli cino calo!”