Milimo Nshi Ibombwa pa Bethel?

Imilimo aba pa Bethel babomba mu madipartimenti yalekanalekana itungilila umulimo wa kushimikila mu calo baba na mu fyalo fimbi. Bamo ni bakapilibula, bambi babombela ku kupulinta magazini, nelyo ukupanga ifitabo. Kwaba na babombela umo balongela no kusungila ifitabo, na ku kupanga amavidio yalanda pali Baibolo, na maCD ya nyimbo ne fintu fimbi. Bambi babomba imilimo imbi iifwaikwa muli ico calo.

Komiti ya Musambo e yangalila imilimo pa Bethel. Ibumba Litungulula lyalipeela Komiti ya Musambo umulimo wa kwangalila amaofeshi ya musambo. Muli iyi Komiti muba baeluda bafikapo batatu no kucilapo. Komiti ya Musambo ileba ababa mwi Ibumba Litungulula ifyo umulimo uleenda mu calo babombela e lyo na mafya ayali yonse ayabako. Ici cilafwa Ibumba Litungulula ukwishiba ifya kulandapo mu mpapulo shikalembwa ku ntanshi, ne fya kusambililapo pa kulongana kwa cilonganino na pa kulongana kukalamba. Abemininako Ibumba Litungulula, balatandalila amaofeshi ya musambo no kwafwa ababa mu Komiti ya Musambo ifya kubomba imilimo yabo. (Amapinda 11:14) Umwiminishi nga atandalila umusambo, kulaba ukulongana kukalamba. Pali uku kulongana, umwiminishi wa maofeshi yakalamba alalanda ilyashi lya kukoselesha aba muli ico calo na ba mu fyalo fimbi ifyo uyo musambo wangalila.

Ukwafwilisha ifilonganino. Pa musambo paliba bamunyinefwe abapeelwa umulimo wa kusuminisha ukuti ifilonganino ifipya fipangwe. Aba bamunyinefwe e balolekesha na pa mibombele ya bapainiya, bamishonari, na bakangalila benda ababombela mu fyalo ifyo umusambo wabo wangalila. Balapekanya ukulongana kukalamba no kwafwa ifilonganino ukukuula Amayanda ya Bufumu, kabili balashininkisha ukuti ifilonganino fyakwata magazini ne fitabo ifyo filekabila. Imilimo yonse iibombwa pa Bethel, ilenga umulimo wa kushimikila ukwenda bwino.—1 Abena Korinti 14:33, 40.

• Bushe aba muli Komiti ya Musambo bafwilisha shani Ibumba Litungulula?

• Milimo nshi ibombwa pa Bethel?