Imilandu

Bamunyinefwe na bankashi balitwalilila ukulanga ukuti ba cishinka kuli Yehova Lesa ilyo babapeela imilandu na lintu bakwata amafya. Ifyo batwalilila ne cishinka filatukoselesha ukuba abakosa mu citetekelo pantu twalishininkisha ukuti, “Yehova akasoobolapo uwa cishinka wakwe.”—Amalu. 4:3.

ARGENTINA | Insambu sha Kusambilisha Abana Ifya kwa Lesa

Ba Ruth bakuliile mu lupwa lwa Bena Kristu nomba balilekele ukulongana ninshi bacili abaice. Lyena mu kupita kwa nshita, batendeke ukwenda no mwaume kabili balikwete no mwana umwanakashi. Bushiku bumo mu musumba wa La Plata, ba Ruth balimwene Inte sha kwa Yehova baleshimikila pa kalitebulo kakubikapo impapulo kabili baibukishe ukuti bakuliile mu lupwa lwa Bena Kristu. Ici calengele ba Ruth batendeka ukulongana na kabili no kutendeka ukusambilisha umwana wabo umwanakashi Baibolo. Bawishi ba mwana balekaanya ba Ruth ukulongana kabili balibatwele ku cilye pa kuti belasambilisha umwana wabo Baibolo nelyo ukulamusenda mu kulongana.

Baloya ba ba Ruth balandile ukuti abafyashi bonse babili balikwata insambu sha kusambilisha umwana ifya kwa Lesa, kabili icilye te kuti cibakaanye ukucita ifi kano fye nga ca kuti ifyo balesambilisha umwana kuti fyamonaula. Icilye cabebele ukuti abafyashi balingile ukucindika insambu umwana akwata isha kuisalila uko alefwaya ukupepa, nangu ca kuti ali fye ne myaka 4 pali ilya nshita. Icilye cabebele no kuti apo umwana acili umunono uwa kuisalilapo ukusambilila ifya kwa Lesa kanshi abafyashi bonse babili balikwata insambu sha kusambilisha umwana ifya kwa Lesa.

Umwana wa ba Ruth alabelenga Baibolo lyonse ubushiku kabili pali ino nshita alaya na mu kulongana na banyina. Alafwaya sana no kuyatandalapo ku Bethel ya ku Buenos Aires.

AZERBAIJAN | Insambu sha Kulanda no Kucita Ifyo Umuntu Asuminamo

Umutumwa wa Bwina Kristu Paulo alandile ukuti mu cilonganino “icilundwa cimo nga cacula, ninshi ifilundwa fyonse fyaculila pamo.” (1 Kor. 12:26) Ifyo umutumwa Paulo alandile fyalimoneke mu calo conse ku Nte sha kwa Yehova ilyo bankashi babili ba Irina Zakharchenko na ba Valida Jabrayilova balebacusha sana ku Azerbaijan. Mu February mu 2015, ubuteko bwalipeele aba bankashi umulandu wa kulanda pa fyo basuminamo ukwabula insambu. Bakapingula babikile aba bankashi mu cifungo ilyo balelolela ukuti babapingule mu cilye kabili pa mulandu wa kulalikisha umulandu, aba bankashi baliikele pa mwaka umo mu cifungo umo baleshipikisha ilyo balebacusha sana no kukanakwata fyonse ifyo balekabila.

Ilyo batendeke ukubombela pa mulandu wabo mu January mu 2016, bakapingula basangile aba bankashi no mulandu kabili babapingwile ukulipila indalama. Apo balibakokweshe mu cifungo ukwabula ukuti babapingule, balifuutile umulandu no kubeba ukuti babwelelemo ku ng’anda. Ilyo aba mu cilye ca Baku Court of Appeal bakeene ukumfwa ku fyo aba bankashi balembele ukuti tabali na mulandu, bankashi batwele umulandu wabo ku cilye cikalamba ica Supreme Court. Na kabili, aba bankashi balilembeele ku UN Human Rights Committee pa fyo balebacusha sana mu cifungo nangu ca kuti balikwete insambu sha kulanda no kucita ifyo basuminamo.

Pali ino nshita, imilandu ya aba bankashi yalipwa. Balatasha sana pa fyo twalebapepelako ne fyo twababikileko amano ilyo bali mu cifungo. Nkashi Jabrayilova alembeele Ibumba Litungulula ukuti: “Amapepo yenu yalitwafwile ukushipikisha amafya. Nshakalabe ifyo imwe, Yehova na bamunyinefwe mwi sonde lyonse mwatutemwa no kutubikako amano.”

ERITREA | Babakakila pa fyo Basuminamo

Ukufika mu July mu 2016, ubuteko bwa ku Eritrea bwalikaka Inte sha kwa Yehova 55 pa mulandu wa fyo basuminamo. Bamunyina batatu e kutila ba Paulos Eyassu, ba Isaac Mogos na ba Negede Teklemariam baba mu cifungo ukutula mu September mu 1994, kabili bamunyina bambi 9 nabo balibakaka pa myaka 10 no kucilapo.

Mu January mu 2016, icilye calipingwile ba Nte abo bakakile pa Cibukisho mu Asmara mu April mu 2014. Uyu e wali umuku wa kubalilapo uo ubuteko bwatwele ba Nte mu cilye ilyo bwabapeele umulandu no kubapeela ishuko lya kuilandila mu cilye. Nga filya fine caleenekelwa, bamunyinefwe na bankashi abo batwele mu cilye babapeele umulandu wa kulongana “ukwabula ukupeelwa insambu” kabili balibalipilishe indalama no kubeba ukuti babwelele ku mayanda yabo. Na lyo line, nkashi Saron Gebru uwali pali bankashi batwele ku cilye alikeene ukulipila indalama babebele ukulipila ne ci calengele ukuti bamukake pa myeshi 6. Nkashi Gebru alepokelela abeni umuku umo cila mulungu kabili atile balemusunga fye bwino mu cifungo. Uyu nkashi e lyo na ba Nte bambi 54 abo bakaka mu cifungo balatasha sana pa fyo tubapepelako ilyo ‘tuleibukisha abo bakaka mu fifungo kwati na ifwe balitukaka pamo na bo.’—Heb. 13:3.

GERMANY | Ubuntungwa bwa Kupepa

Pa 21 December mu 2015, icitungu ca Bremen mu Germany calipeele Inte sha kwa Yehova ubuntungwa bwa kupepa ukucila pa bo bakwete pa kubalilapo. Ba Nte babapeele ubu ubuntungwa pa numa ya kutwala uyu mulandu mu filye fya mu Germany pa myaka 4. Ukulingana ne fyapingwile icilye cikalamba ica Higher Administrative Court mu Berlin, ifitungu ifingi pa fitungu 16 ifyaba mu Germany fyalipeele Inte sha kwa Yehova ubuntungwa bwa kupepa ubo baleita ukuti public law status. Na lyo line, aba mu buteko mu citungu ca Bremen balikeene ukupeela ba Nte ubu buntungwa pa mulandu wa fyo balebabepesha ku babapatile.

Mu 2015 icilye ca Federal Constitutional Court ica Germany catile filya aba mu citungu ca Bremen bakeene ukupeela ba Nte ubuntungwa bwa kupepa kwali kwikala pa nsambu shabo isho bakwata. Ifyo bapingwile fyalelangilila ukuti icilye calipeele Inte sha kwa Yehova mu citungu ca Bremen ubuntungwa bwa kupepa. Apo balibapeele ubuntungwa bwa kupepa, ifilonganino tafyali na kulalipila imisonko nga fintu imipepele imbi mu Germany ishilipila.

KYRGYZSTAN | Insambu sha Kulanda no Kucita Ifyo Umuntu Asuminamo

Mu March mu 2013, aba mu buteko mu musumba wa Osh ku Kyrgyzstan balipangile umulandu wa bufi uo bapeele ba Oksana Koriakina na banyinabo ba Nadezhda Sergienko. Aba mu cilye babepeshe ba Nte ukuti balebepa sana abantu ilyo balebomba umulimo wabo uwa kusambilisha abantu Baibolo, kabili aba mu cilye balibindile aba bankashi babili ukushimikila no kwenda ilyo balelolela ukubapingula. Mu October mu 2014, aba mu cilye basangile ukuti ifishinka bakwete fyali fya bufi, tabakonkele ifyo balingile ukucita kabili aba bankashi babili tabali na mulandu. Mu October mu 2015, icilye cimbi calisuminisheko ku fyo bapingwile aba bankashi.

Na lyo line, loya wa buteko mu musumba wa Osh alitwele na kabili umulandu ku cilye cikalamba ica Supreme Court mu Kyrgyzstan. Aba mu cilye cikalamba batile tabasuminisheko ku fyo bapingwile ukuti bankashi tabali na mulandu kabili batile bali no kutendeka ukulubula uyu umulandu cipya cipya. Ilyo balelubulula uyu mulandu mu April mu 2016, baloya abalelandilako aba bankashi babili batile bankashi balingile ukubaleka baya pantu inshita bali no kupwishishapo uyu mulandu yalipitile. Ici calengele bakapingula bapwishe fye uyu mulandu.

Ilyo aba bankashi balepita muli aya amafya, balitwalilile ukushipikisha. Nkashi Sergienko atile, “Abantu limo balafulwa sana nga babafyenga nelyo nga babacusha lelo ine nalishibe ukuti Yehova alintemwa kabili alansakamana pantu bamunyinefwe na bankashi tabatulekeleshe.” Bankashi balimwene ukuti ifyo Yehova alaya pali Esaya 41:10 fya cine ilyo atile: “Witiina, . . . nkakutungilila no kuboko kwandi ukwa ku kulyo ukwa bulungami.”

KYRGYZSTAN | Ubuntungwa bwa Kupepa

Pa 9 August mu 2015, bakapokola abali 10 mu musumba wa Osh ku Kyrgyzstan baileingilila bamunyinefwe abalelongana. Baliputukishe uku kulongana pantu babebele ukuti tabakwete insambu sha kulongana kabili balefwaya no kulasa imfuti abantu ukucila pali 40 abalongene. Bakapokola balikete bamunyinefwe 10 no kubatwala ku kapokola uko bacushishe no kupuma abali 9 pali aba 10. Lyena balibafumishe no kubaleka baya. Pa numa ya nshiku shibili, bakapokola balikete munyinefwe Nurlan Usupbaev uwali pali bamunyinefwe bacushishe no kupuma kabili balimupeele umulandu wa kutungulula ukulongana ukwabula ukupeelwa insambu.

Ilyo munyinefwe Usupbaev bamutwele ku cilye ca Osh City Court, bakapingula tabamusangile no mulandu kanshi balipwishishe uyu mulandu. Loya wa buteko alitwele uyu mulandu ku cilye cimbi ica Osh Regional Court kabili ici cilye naco calikeene ukupeela munyinefwe Usupbaev umulandu pantu Inte sha kwa Yehova balilembeshiwa ku buteko mu Kyrgyzstan.

Na lyo line, loya wa buteko tatemenwe ifyo ici cilye capingwile kanshi atwele uyu mulandu ku cilye cikalamba ica Supreme Court mu Kyrgyzstan. Munyinefwe Usupbaev alitemenwe sana ilyo icilye ca Supreme Court na co cakeene ukumupeela imilandu nga filya fyacitile ifilye fimbi kabili calisuminishe no kuti Inte sha kwa Yehova mu Kyrgyzstan balikwata insambu sha kulongana. Bamunyinefwe abo bapumine kuli bakapokola ba mu musumba wa Osh balitwala uyu mulandu ku cilye kabili ucili taulapwa.

RUSSIA | Ubuntungwa bwa Kupepa

Nangu ca kuti abalolekesha pa nsambu abantu bakwata mu Russia tabasuminishako ku fyo ubuteko bwa Russia bucusha ba Nte, ubuteko bwena bwalitwalilila fye ukucusha sana Inte sha kwa Yehova no kubinda umulimo babomba. Ukufika pali ino nshita, ubuteko bwalibinda impapulo 88 isha Nte sha kwa Yehova pantu batila kuti shaleta icimfulunganya kabili balibinda na webusaiti ya jw.org. Mu 2015, ababombela pa mupaka wa calo ca Russia balikeenye ukwingisha Baibolo ya Amalembo ya Calo Cipya mu calo kabili icilye mu Vyborg cilefwaya ukubinda no kusansha iyi Baibolo pali shilya impapulo batila kuti shaleta icimfulunganya. Mu March mu 2016, abalashi ba mu buteko balipamine no kufwaya ukuyaisala amaofeshi yakalamba aya Nte sha kwa Yehova ku Solnechnoye mu St. Petersburg pantu baletila ba Nte “balecita ifyo ubuteko bwabindile.”

Nangu ca kuti ubuteko bwaletungilila kampeni umo abantu balelanda ukuti tabalefwaya Inte sha kwa Yehova, kwali ifisuma ifyacitike. Mu October mu 2015, loya alilembele ku cilye pa kuti bengesala akabungwe ka Local Religious Organization (LRO) aka Nte sha kwa Yehova mu Tyumen apalepa amakilomita nalimo 2,100 ukufuma ku kabanga ka Moscow. Nangu ca kuti bakapokola balikwete ifishinka ifyalelanga ukuti ba Nte bababepeshe fye, icilye ca Tyumen Regional Court calibapeele umulandu. Na lyo line, pa 15 April mu 2016, icilye cikalamba ica Supreme Court mu Russia capingwilepo ukuti “tapali ifishinka ifya kwisalilapo akabungwe ka Local Religious Organization aka Nte sha kwa Yehova mu Musumba wa Tyumen.” Ilyo kapingula mukalamba abelengele ifyo icilye capingwile, bamunyinefwe na bankashi 60 abali mu cilye balitemenwe sana kabili baalimine no kutoota.

Abantu ba kwa Yehova mu Russia balefwaisha ukutwalilila ukumubombela te mulandu na “icanso conse ico [babapangila].”—Esa. 54:17.

RWANDA | Insambu sha Kusambilila te Mulandu na uko Umuntu Apepa

Mu myaka ya nomba line, abana ba ba Nte mu Rwanda balebatamfya mu masukulu pantu tabalecitako ifya mapepo nelyo ifintu ifya kulanga ukuti balitemwa icalo cabo. Pa kuti ubuteko bupwishe ubu ubwafya, bwalibikileko icipope pa 14 December mu 2015 icali no kupeela abantu insambu sha kusambilila te mulandu na uko bapepa. Ici icipope calelanda ukuti amasukulu yalingile ukucindika ubuntungwa bwa bana be sukulu ubwa kupepa uko balefwaya.

Pa 9 June mu 2016, pa jw.org apo balemba ukuti Ifilecitika balibikilepo icipande icaleti “Icilye ca mu Rwanda Cakaanya Ukulacusha Abantu pa Mulandu na uko Bapepa.” Icawemeko ca kuti abalemba inyunshipepala imo iya pa Intaneti mu Rwanda balikopolwele ici cine cipande no kucibika pa Intaneti. Abantu abengi ukucila pali 3,000 balitemenwe ici cipande kabili balelanda ifisuma pa fyo ubuteko bwacitile. Ba Nte mu Rwanda balitasha sana pali ici icipope pantu calipeela abana babo insambu sha kusambilila te mulandu na uko bapepa.

SOUTH KOREA | Ubuntungwa bwa Kukaana Ukwingila Ubushilika pa Mulandu wa Kampingu

Ukucila pa myaka 60, ba Nte abaume mu South Korea abali ne myaka pa kati 19 na 35 balakwata ubwafya bwa kubapatikisha ukwingila ubushilika. Ubuteko bwa ku South Korea tabusuminishako ku buntungwa umuntu akwata ubwa kukaana ukwingila ubushilika kabili tabwakwata incito imbi iya kupeela bonse abakaana ukwingila ubushilika lelo kubakaka fye. Ilingi line, ba Nte e kutila abana abaume, abafyashi babo abaume na bashikulwibo balabakaka mu cifungo pa mulandu wa kukaana ukwingila ubushilika.

Icilye ca Constitutional Court pa miku ibili calandile ukuti ukwingila ubushilika lifunde, nomba ifilye ifinono na baume abakaana ukwingila ubushilika pa mulandu na ili ifunde balatwala imilandu yabo ku cilye ca Constitutional Court. Kanshi pa 9 July mu 2015, aba mu cilye balisuminishe abalekaana ukwingila ubushilika ukuilandilako. Munyina Min-hwan Kim uwaikeele imyeshi 18 mu cifungo pantu kampingu yakwe tayalemusuminisha ukuya mu kusambilila ubushilika, atile: “Balinkakile mu cifungo kabili balimfumishe. Nomba ndesubila ukuti abengi abakaana ukwingila ubushilika tabakabakake mu cifungo nga ca kuti babombako imilimo imbi iingafwa aba mu cifulo bekala.” Aba mu cilye ca Constitutional Court bakabilisha ifyo bakapingulapo pe funde lya kuti umwaume onse afwile ukwingila ubushilika.

TURKMENISTAN | Ba Bahram Hemdemov

Munyina Hemdemov ali ne myaka 53, alyupa kabili alikwata na bana abaume 4. Alitemwa sana ifya kwa Lesa, kabili balimucindika sana mu cifulo aleikala. Mu May mu 2015, icilye calimukakile mu cifungo pa myaka 4 umo ali no kulabomba incito yakosa pa mulandu wa kulakwatila ukulongana kwa “mu bumfisolo” pa mwakwe. Aba mu cifungo umwafula bacintomfwa mwi tauni lya Seydi, umo bamucusha no kumupuma sana kuba ba mu buteko. Na lyo line, alitwalilila ukuba uwa cishinka kuli Yehova Lesa nge fyo ulupwa lwakwe nalo lwatwalilila. Ba Gulzira abakashi ba ba Hemdemov balipekanya ukulabatandalila mu cifungo no kulabakoselesha.

Natulepepelako abantu ba kwa Yehova ilyo batwalilila ukuba aba cishinka na lintu balebacusha. Ifyo bacita filatwafwa no kutukosha ukutwalilila aba cishinka kuli Lesa kabili filalenga twacetekela ubulayo bwaba pa Amalumbo 37:28 ubutila: ‘Yehova takashe aba cishinka bakwe.’