Muletasha Yehova pa fyo aba Kapekape

YEHOVA LESA ni kapekape. (Yakobo 1:17) Fyonse ifyo abumba filanga ukuti ni kapekape. Alipanga intanda ishingi nga nshi mu muulu, kabili alimesha ifimenwa ifisuma kabili ifingi pe sonde.—Amalumbo 65:12, 13; 147:7, 8; 148:3, 4.

Uwalembele Amalumbo 104 alitashishe sana Yehova pa fyo abumba, e co alembeele ulwimbo ulwa ku mulumbanya. Bushe na imwe nga mwabelenga amashiwi yaba muli ili ilumbo, mulatasha Yehova nga filya uwalembele amalumbo alemutasha? Atile: “Nkembila Yehova inshita yonse iya mweo wandi; Nkalalumbanya Lesa wandi pa filimba ilyo ndipo.” (Amalumbo 104:33) Bushe na imwe mulafwaya ukulalumbanya Yehova?

ICA KUMWENAKO ICISUMA ICA BUKAPEKAPE

Yehova afwaya ukuti na ifwe tube bakapekape nge fyo aba. Yehova alatweba ico tulingile ukubela bakapekape. Alengele umutumwa Paulo alembe ukuti: “Konkomesha aba fyuma muli cino calo ukuti belaitakisha, nangu ukucetekela ifyuma ifishibelelela, lelo balecetekela Lesa, uutupeela ifintu fyonse ifyo tuipakisha; ubebe ukulacita ifisuma, ukulabomba sana imilimo iisuma, ukuba bakapekape, abaiteyanya ukupako bambi, pa kucita ifi bakaisungila abene umufula uusuma uwa kukuulapo ku ntanshi, no yu mufula ukaba e cuma cabo, pa kuti bekatishe ku mweo wine wine.”—1 Timote 6:17-19.

Muli kalata ya bubili iyo Paulo alembeele abena Korinti, alilondolwele ico tufwile ukubela bakapekape. Atile: “Onse acite umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.” (2 Abena Korinti 9:7) Ni bani banonkelamo nga tuli bakapekape? Paulo alandile ukuti tulafwa ababulishe, e lyo kabili nga twabafwa Yehova alatupaala.—2 Abena Korinti 9:11-14.

Lyena Paulo alandile pa bushininkisho ubukalamba ubulanga ukuti Lesa ni kapekape, atile: “Ala natuletasha Lesa pa bupe bwakwe ubushaikulila.” (2 Abena Korinti 9:15) Pa fya “bupe” fya kwa Yehova paba ne fintu ifisuma ifyo atupeela ukupitila muli Yesu Kristu. Te kuti tukwate na mashiwi ya kulondolola bwino bwino ifyo ubupe bwakwe bwacindama.

Kuti twalanga shani ukuti tulatasha pali fyonse ifyo Yehova na Yesu batucitila, e lyo ne fyo bakatucitila ku ntanshi? Inshila imo iyo twingalangilamo ukuti tulatasha kulabomfya inshita yesu, amaka yesu, e lyo ne fyo twakwata ku kupepa Yehova na ku kwafwa abantu ukusambilila pali ena. Nampo nga twalikwata ifintu ifingi nelyo iyo, kuti twaba bakapekape.—1 Imilandu 22:14; 29:3-5; Luka 21:1-4

Ifyo Bamo Basangula Ku Kwafwilisha Umulimo Wa Mwi Sonde Lyonse

Nga filya Abena Kristu mu nshita ya batumwa balecita, Abena Kristu abengi muno nshiku nabo balapatulako indalama ishakwafwilisha umulimo wa mwi sonde lyonse, kabili bashibika mu kabokoshi ka misangulo aka cilonganino cabo. (1 Abena Korinti 16:2) Cila mweshi, ifilonganino filatuma iyi misangulo kwi ofeshi lya Nte sha kwa Yehova ilyangalila umulimo mu calo cabo. Na kabili kuti mwatuma imisangulo yenu ukubomfya ishina lya kabungwe ako Inte sha kwa Yehova balembesha mwi funde. Nga mulefwaya ukwishiba ishina lya kabungwe ako balembesha mu calo cenu, kuti mwaya pa www.jw.org nelyo kuti mwalanda na ba kwi ofeshi lya Nte sha kwa Yehova ilya mu calo cenu. Imisangulo mwingatuma ni yi:

UBUPE

Kuti mwatuma imisangulo ya ndalama ukubomfya banki nelyo amakardi ya ku banki. Mu fyalo fimo kuti mwatuma imisangulo ukubomfya jw.org nelyo webusaiti imbi.
Indalama nelyo ifintu fimbi. Mufwile ukulemba na kalata iya kulangilila ukuti indalama nelyo ifintu fimbi ifyo musangwile, bupe fye.

INDALAMA ISHO BENGABWESHA

Ni ndalama mwingasangula isho bengamubwesesha nga ca kuti mulefwaya ukushibomfya.
Mufwile ukulemba na kalata iya kulangilila ukuti indalama isho mutumine musangulo uwa kuseekesha fye.

UBUPE BUMBI

Kuti mwasangula imisangulo ku kwafwilisha umulimo wa kubila imbila nsuma uwa mwi sonde lyonse ukubomfya inshila ishili pe samba. Ilyo mushilasangula mufwile ukulanshanya naba kwi ofeshi lya musambo ilyangalila icalo cenu pa kuti mwishibe inshila mwingabomfya pa kusangula isho basuminisha mu calo cenu. Apo ifya kukonka na mafunde ya misonko tafyaba cimo cine mu fyalo fyonse, kuti cawama mwaipusha abaishiba bwino amafunde ilyo mushilasala inshila ya kubomfya pa kupeela ubupe.

Inshuwalansi: Umuntu kuti alembesha ishina lya kabungwe ako Inte sha kwa Yehova balembesha mwi funde ukuti e ko bakapeele indalama sha inshuwalansi nelyo isha penshoni.

Indalama sha ku Banki: Ukulingana na mafunde ye banki, umuntu kuti alembesha ukuti indalama isho abika ku banki, ifipepala ifilanga ukuti alibika indalama ku banki nelyo indalama sha penshoni te shakwe. Na kabili alingile ukulembesha ishina lya kabungwe ako Inte sha kwa Yehova balembesha mwi funde ukuti e kakapoka isho ndalama nga afwa.

Nsonsela: Umuntu uwakwata indalama ishingi mu twampani kuti alesangula nsonsela yakwe kwi ofeshi lya Nte sha kwa Yehova. Na kabili kuti alemba icipangano ca kuti nga afwa, nsonsela yakwe bakalepeela akabungwe ako Inte sha kwa Yehova balembesha mwi funde.

Impanga ne Fikuulwa: Umuntu nga alikwata impanga ne fikuulwa ifyo bengashitisha, kuti afipeela ku kabungwe ako Inte sha kwa Yehova balembesha mwi funde. Nga ca kuti alafibomfya kuti apekanya ukuti nga afwa e lyo bakafipeele.

Ubupe bwa Kulapeelwako Akanono: Umuntu kuti apeela indalama iofeshi lya Nte sha kwa Yehova. E lyo asuminishanya nabo ukuti balemupeelako akandalama akalinga cila mwaka mpaka akafwe. Mu mwaka apeela ubupe, ubuteko nalimo kuti bwaputulamo umusonko.

Ifya Cishale no Kuseekesha: Umuntu kuti alemba ukuti nga afwa ifipe fyakwe nelyo indalama fikapeelwe kwi ofeshi lya Nte sha kwa Yehova, nelyo kuti alemba fye mu kulungatika ishina lya kabungwe ako Inte sha kwa Yehova balembesha mwi funde ukuti e ko bakapeele ifipe nelyo indalama shakwe nga afwa. Nga abomfya iyi nshila nalimo ubuteko te kuti buputulemo umusonko mu ndalama shakwe.

Nga mulefwaya ukwishibilapo na fimbi pa fyo mwingasangwilako ku mulimo wa mwi sonde lyonse uwa Nte sha kwa Yehova, kuti mwabelenga broshuwa itila Charitable Planning to Benefit Kingdom Service Worldwide iyalembwa mu ciNgeleshi ne ciSpanish. Muli iyi broshuwa mwaliba ifyebo pa nshila shalekanalekana isho mwingapeelelamo ubupe. Ifyebo fimo muli iyi broshuwa nalimo te kuti mufibomfye pa mulandu wa mafunde ya misonko nelyo amafunde yambi ayaba mu calo mwikala. Kanshi nga mwabelenga iyi broshuwa, mufwile ukwipusha abaishiba amafunde pa misonko pa kuti bamwebako ifya kucita. Abengi ababomfya inshila balandapo muli iyi broshuwa pa kupeela ubupe bwa kwafwilisha umulimo wesu uwa mwi sonde lyonse tabalipila indalama sha musonko ishingi, e lyo limo takuba no kulipila. Iyi broshuwa nga e ko yaba mu calo mwikala, kuti mwapokako kuli kalemba wa mu cilonganino cenu.

Nga mulefwaya ukwishibilapo na fimbi, kuti mwaipusha iofeshi lya musambo ilyaba mu calo cenu.