Bushe Kukaba Inshita Ilyo Kushakabe Ulufyengo?

Cimoneka kwati ulufyengo lwaba fye mpanga yonse. Moneni ifya kumwenako fimo ifilanga abantu abo bafyengele no kubabika mu cifungo:

• Mu January mu 2018, kapingula umo mu calo ca United States apingwile ukuti umwaume uo bakakile pa myaka ukucila pali myaka 38 bamukakule. DNA basangile yalengele caishibikwa ukuti tacitile umulandu bamupeele.

• Mu September 1994, abacaice abaume batatu aba mu calo cimo ica mu Africa balibakakile pa mulandu wa kuti balikeene ukwingila ubushilika. Ilyo calefika mu September 2020, ninshi nabekala mu cifungo pa myaka 26 ukwabula ukubeba umulandu babakakile nelyo ukulubulula.

Nga balimufyengapo, nalimo kuti mwaumfwa nge fyaumfwile Yobo, umwaume uwaliko ilyo Baibolo yalelembwa, uwatile: “Ndailishanya, lelo umulinganya taumoneka.” (Yobo 19:7) Nangu ca kuti umulinganya umoneka kwati te kuti ubeko, Baibolo yalitulaya ukuti ku kaba inshita ilyo kushakabe abakalila pa mulandu wa lufyengo. Na kabili amano yaba mu Baibolo kuti yamwafwa ukwishiba ifya kucita nga mwafyengwa.

Cinshi cilenga ulufyengo?

Abantu abakaana ukuti Lesa alebatungulula e balenga kwaba ulufyengo. Baibolo ilangilila ukuti umulinganya wa cine cine ufuma kuli Lesa. (Esaya 51:4) Muli Baibolo, amashiwi bapilibula ukuti “umulinganya” na “ubulungami” yalipalana sana. (Amalumbo 33:5) Umuntu nga alecita ifyalungama nelyo ifisuma ukulingana ne fyo Lesa afwaya, kuti aba no mulinganya. Lelo mu lubembu e mufuma ulufyengo, icilolele mu kuti abantu abashikonka amafunde ya kwa Lesa. Katulangilile:

• Bukaitemwe. Bukaitemwe no lubembu fyalipalana sana. (Yakobo 1:14, 15) Pa kuti abantu bakwate ifyo balefwaya, abengi balafyenga abanabo. Nomba Lesa afwaya tulecitila ifingawamina bambi.—1 Abena Korinti 10:24.

• Ukukanaishiba ifintu. Bamo balafyenga abanabo ukwabula no kuti beshibe, na lyo line Lesa amona ukucita ifi ukuti lubembu. (Abena Roma 10:3) Na kuba abantu abashaishibe ifishinka e balengele bafyenge Yesu Kristu ica kuti bamwipaya no kumwipaya.—Imilimo 3:15, 17.

• Utubungwe twa bantunse utwafilwa ukubomba. Aba mapolitiki, aba makwebo, ne mipepele iyaba mwi sonde itila ilacita ifingalenga abantu baba no mulinganya ne fingalenga kwaba umulinganya mu bwikashi. Nomba icishinka ca kuti, ilingi line aba mapolitiki, aba makwebo na ba mipepele e balenga abantu balufyanya, kwaba amafisakanwa, akapaatulula, ubufunushi, ulupato e lyo balalenga abakankaala balekwatilako fye icuma e lyo abapiina balebelako abapiina, ifi bacita filalenga abantu balafyenga abanabo. Abapanga utubungwe tumo bantu abafwaya ukucita ifisuma. Na lyo line fyonse ifyo abantunse bacita ifipusana na mafunde ya kwa Lesa te kuti fitunguluke.—Lukala Milandu 8:9; Yeremia 10:23.

Bushe Lesa omfwa shani pa lufyengo?

Lesa alipata ulufyengo kabili alipata ne fyo abantu bacita ifilenga kwaba ulufyengo. (Amapinda 6:16-18) Alengele kasesema Esaya ukulemba ukuti “Ne Yehova,a nalitemwa umulinganya, napata ubupuupu pamo no bubifi.”—Esaya 61:8.

Amafunde Lesa apeele abena Israele yalanga ukuti Lesa afwaya abantu baleba no mulinganya. Aebele abapingushi mu Israele ukukanapoka amafisakanwa no kukanacita ifintu ifyali no kulenga bafilwa ukuba no mulinganya. (Amalango 16:18-20) Na kabili aebele abena Israele ukuti ali no kubakaana nga balecusha abapiina na balanda pantu ninshi tabalekonka amafunde yakwe.—Esaya 10:1-3.

Bushe Lesa akafumyapo ulufyengo?

Ee. Lesa akabomfya Yesu Kristu, ukufumyapo ulubembu ululenga kwaba ulufyengo kabili akalenga abantu bakapwililike. (Yohane 1:29; Abena Roma 6:23) Alibikako no Bufumu ubukaleta isonde ilipya umwaba ubulungami no mulinganya ku bantu bonse. (Esaya 32:1; 2 Petro 3:13) Nga mulefwaya ukwishibilapo na fimbi pa Bufumu bwa kwa Lesa, tambeni vidio itila Bushe Ubufumu bwa kwa Lesa ni Cinshi?

Bushe abantu bakalaikala shani mu calo cipya icalungama?

Mwi sonde lyonse nga mwaba umulinganya, bonse fye abantu bakalaikala umutende kabili takwakulaba ica kubatiinya. (Esaya 32:16-18) Lesa alicindika ubumi bwa bantu bonse, kanshi takwatabe uukalafyengwa. Takwakabe abakulaumfwa ubulanda, abakalalila, abakalaumfwa ubukali pa mulandu wa lufyengo pantu ninshi nabalufumyapo umuyayaya. Kabili mu kupita kwa nshita tukalaba ifyabipa ifyatucitikile pa mulandu wa lufyengo. (Esaya 65:17; Ukusokolola 21:3, 4) Nga mulefwaya ukwishibilapo na fimbi moneni icipande citila “Finshi Ubufumu bwa kwa Lesa Bukacita?”

Bushe kuti mwacetekela ifi Lesa atulaya ukutupeela isonde umushakabe ulufyengo?

Ee. Mu Baibolo mwaliba amasesemo ayafikilishiwa ayo twingacetekela, mwaliba amalyashi aya kale aya cine kabili nga yalanda pali sayansi ilanda ifya cine. Ifyebo fya muli Baibolo filomfwana kanshi kuti twacetekela ifyo yatulaya. Ifipande fikonkelepo nafilondolola ifingi pali ifi:

• Bushe Kuti Twashininkisha Shani Ukuti Ifyo Baibolo Ilanda fya Cine? (vidio)

• “Amasesemo Ayafikilishiwa Kale na Yalefikilishiwa Muno Nshiku”

• “Ukusesema Ukwalembwamo Kulafikilishiwa”

• “Reasons to Trust the Bible”

Bushe pali ino nshita kuti twacimfya ulufyengo?

Abantu abasuma abaliko mu nshita balelemba Baibolo balecita ifyalelenga belabafyenga. Ku cakumwenako balefwaya ukupangila umutumwa Paulo icilye no kumufyenga kabili aba mulubulwisha nga bamupingwilile ukufwa. Mu cifulo ca kusumina fye ifyo bamwebele ukuti bamulubulwishe, alilombele ukuti bamutwale kuli Kaisare uko bali no kumulubulwisha.—Imilimo 25:8-12.

Na lyo line abantu nangu bengesha shani ukufumyapo ulufyengo te kuti balufumyepo. (Lukala Milandu 1:15) Abengi balisanga ukuti ukucetekele ifyo Lesa atulaya ukuti akatupeela isonde ilipya umukaba ubulungami kwalibafwa kuleka ukumfwa sana ububi no kuba no mutende nangu bababafyenga.