Bushe Baibolo Kuti Yamwafwa Ukushipikisha nga ca Kuti Imiceele Naibipa Sana?

Bushe na imwe muli pa bantu abengi abakwata amafya pa mulandu wa kuti imiceele nabipa? Imiceele yabipa isa mu nshila ishalekanalekana, pamo nga icikuuku ca mwela icikalamba icisunkila amenshi ya muli bemba ku mulundu, icimwela icikalamba ico beta ukuti typhoon, kankungwe, nelyo mulamba. Imfula nga yaloka sana limo umushili ulatendeka ukubunguka, kabili imfula ya cimwela kuti yaleta inkuba kabili ikuba kuti ya-ambusha umulilo no kulenga umulilo wa mpanga ukonaula ifintu. Ifilala, ukukabisha, e lyo no kutalala sana kuti kwaonaula ifintu.

Mu ncende ishingi mwi sonde fye lyonse, imiceele ileya ilebipilako fye. Akabungwe ka International Federation of Red Cross and Red Crescent Societies katile: “Impendwa ya bantu abalecula pa mulandu no tuyofi ileya ilekulilako, ilyo mulamba, ifikuuku fya mwela e lyo ne filala filefulilako, filelenga abantu ukufwa, imikalile ukwafya e lyo no kusha abantu ukwabula amayanda.”

Ilyo ifya musango uyu filecitika, abantu balacula sana. Balacula pantu ninshi nabalufya ifipe fyabo pamo nga amayanda, e lyo inshita shimo nalimo balafwilwa na balupwa nelyo ifibusa .

Nga mulecula pa mulandu wa miceele iyabipa, Baibolo kuti yamwafwa ukushipikisha. Ilasansamusha, ilapeela isubilo, kabili mwaliba amano aya-afwa abantu abengi abakwata amafya pa mulandu wa miceele yabipa. (Abena Roma 15:4) Na kabili Baibolo ilasuka icipusho icacindama ico abantu abengi bayipusha ica kuti: bushe icilelenga ukuti Lesa asuminishishe ifi ukucitika, ni co alenkanda?

Ifi muno nshiku imiceele yabipa tacipilibula ukuti Lesa aletukanda

Baibolo isambilisha ukuti Lesa te ulenga amafya abantu bakwata. Ilanda ukuti “takuli uwingatunka Lesa ukucita ifyabipa, kabili umwine tatunka umuntu iyo.” (Yakobo 1:13) Ici cilepilibula ukuti te ulenga abantu balecula pali lelo pa mulandu wa miceele yabipa.

Mu Baibolo mwaliba ifya kumwenako ifilangilila ukuti inshita imo, Lesa alibomfeshe ifyo abumba ku konaula abalecita ifyabipa. Lelo ifi alecita fyalipusana sana ne fyo imiceele ileonaula ifintu pali lelo, imiceele yabipa isa fye mu kupumikisha ica kuti abantu abacita ifisuma na bacita ifyabipa bonse balacula. Nomba ifyo Baibolo yalandapo filanga ukuti Lesa alecingilila aba kaele, alesoka abantu, kabili alelondolola no mulandu alecitila ifintu fimo. Ku ca kumwenako, Lesa alilondolwele umulandu aleteele ilyeshi pe sonde mu nshiku sha kwa Noa, alisokele abantu ilyo ashilaleta ilyeshi, kabili alipuswishe Noa no lupwa lwakwe.—Ukutendeka 6:13; 2 Petro 2:5.

Pa kuti mwishibilepo na fimbi ifilanga ukuti Lesa te ulenga ifyabipa ificitika pa mulandu wa fyo abumba, moneni icipande citila “Finshi Baibolo Ilanda pa Masanso Ayacitika pa Mulandu ne fyo Lesa Abumba?”

Lesa alasakamana abantu bonse abacula pa mulandu wa kubipa kwa miceele

Baibolo ilanda ukuti Yehovaa Lesa alasakamana kabili wa cikuuku. Moneni amalembo yakonkapo.

• Esaya 63:9: “Lyonse ilyo balecula, na o [Lesa] alecula.”

  Umwalola aya mashiwi: Yehova alomfwa sana ububi nga amona abantu balecula.

• 1 Petro 5:7: “Asakamana imwe.”

  Umwalola aya mashiwi: Yehova alabika amano ku fimucitikila mu bumi.

Yehova alasakamana kabili icikuuku e cilenga alecitapo cimo. Alatusansamusha ukubomfya ukupanda amano kwaba muli Baibolo e lyo ne subilo lyabamo ililanda pa fyo ifintu fikaba ku ntanshi ilyo kushakabe amafya yabako pa mulandu wa kubipa miceele.—2 Kor. 1:3, 4.

Ilyo kushakabe amafya ayesako pa mulandu wa kubipa kwa miceele

Baibolo yalilanda ukuti Yehova alitulaya “[ukutupeela] inshita ya ku ntanshi iisuma ne subilo.” (Yeremia 29:11) Afwaya abantu bakabe ne nsansa ilyo bakalaikala muli paradaise pano isonde, kabili tabakulaba no mwenso wa kuti imiceele yabipa yalalenga balecula.—Ukutendeka 1:28; 2:15; Esaya 32:18.

Lesa akabomfya Ubufumu bwakwe, ubuteko bwa ku muulu umo Yesu akalateka ku kufikilisha ifyo alaya ukucitila abantu. (Mateo 6:10) Yesu alikwatisha amano na maka ya kulesha imiceele yabipa. Ilyo Yesu ali pano isonde, alilangile amaka akwata pa miceele. (Marko 4:37-41) Ilyo Yesu akalateka, akulabomfya amano no kulaumfwikisha abantunse, ukubasambilisha ifya kusakamana isonde mu nshila ya kuti tabalelyonaula. (Esaya 11:2) Ilyo Yesu akulateka, abantu tabakabale abakwatapo amafya ayesako pa mulandu wa kubipa kwa miceele.

Nalimo kuti mwayipusha amuti, ‘Ni lilali Yesu akabomfya amaka yakwe pa kuti imiceele yabipa ikapwe’? Pa kwasuka ici cipusho, moneni icipande citila “Ni Lilali Ubufumu bwa kwa Lesa Bukatendeka Ukuteka Isonde?”

Ifyo mwingacita pali ino nshita pa kuti muleshipikisha ukubipa kwa miceele

Ukupanda amano kwa mu Baibolo kuti kwamwafwa ilyo imiceele tailabipa, ilyo ibipile na pa numa yaonaula ifintu.

• 

  Ilyo imiceele tailabipa: Ipekanishisheni kabela pa fyo mukacita mu kwangufyanya.

  Ifyo Baibolo ilanda: “Uwasalapuka nga amona ububi alabelama, lelo imbulwa mano shena shiya fye no kukandwa.”— Amapinda 22:3.

  Umwalola aya mashiwi: Muletontonkanishisha libela pa masanso ayengacitika ku ncende mwikala pa kuti mwingaicingilila no lupwa lwenu mu kwangufyanya.

  Icacitike: Ba Tamara abekala mu, California, ku U.S.A batile “Pa bushiku twafulumwike umulilo mpaanga, twali-ipekanishishe libela. Twalikwete utufyola twalongele libela akakusenda nga ulefulumuka mukampampa. Twalisendele umuti. Twalisendele ifya kufwala. Abantu ku cifulo twaleikala balisakaikwe sana, tabaishibe ne fya kucita. Lelo twalisendele ifyo twalekabila, kabili ndatasha sana pali ifi!”

• 

  Ilyo imiceele taili bwino: Mulebika amano ku fyacindama.

  Ifyo Baibolo ilanda: “Pantu umuntu nangu akwate shani ifingi, ubumi bwakwe tabwaba mu fintu akwata.”—Luka 12:15.

  Umwalola aya mashiwi: Ubumi bwalicindama sana ukucila ifyo twakwata.

  Icacitike: Ba Leslie abekala ku Philippines batile: “Ilyo icimwela icikalamba ico baleita ukuti Typhoon Lawinbcaonawile ing’anda yesu, nalifililwe ukutontonkenya bwino pa fyo nali no kucita. Lelo icintu cimo na citile, na lipepele kuli Yehova Lesa. Nalilwike ukuti ifyaonaike fintu twakwete, lelo te bumi.”

• 

  Imiceele yabipa nga yaonaula ifintu: Mwilasakamikwa pa lwa mailo.

  Ifyo Baibolo ilanda: “Mwilasakamikwa pa bushiku bwa mailo, pantu ubwa mailo bukaba na masakamika ya buko.”—Mateo 6:34.

  Umwalola aya mashiwi: Mwilasakamana sana pa fili no kucitika ku ntanshi.

  Icacitike: Ba Sally abekala mu Florida ku U.S.A. batile: “Ilyo icikuuku ca mwela icasunkiile amenshi ya muli bemba ku mulundu capitile, calibunshishe ing’anda yandi. Nalingile ukupingula pa fintu ifingi ifyalekanalekana kabili nalisakamikwe sana. Nakonkele ukupanda amano kwa mu Baibolo ukwa kuti amafya ya ubo bushiku yalinga pali ubo bwine bushiku. Nailwike ukuti Yehova nga angafwa, kuti nashipikisha amafya ayengi ukucila na pa fyo naletontonkanya.”

Nga mulefwaya ukwishibilapo na fimbi, moneni icipande citila “Ifyo Mwingaicingilila no Kucingilila Bambi—Nga Kwacitika Amasanso.”