Bushe Kukabala Akuba Inshita Ilyo Imikalile ya Bantu Bonse Ikalingana?
Mu fyalo ifyalekanalekana abantu balaya mu misebo mu kuilishanya pa mulandu wa kuti imikalile ya bantu tayalingana. Ubu bwafya bwalibipilako ifi kwali icikuko ca COVID-19. Icikuko ca Kolona calilengele abantu balaumfwo ububi pa fyo imikalile yabo yaba, maka maka ifi kwali ukulesha abantu ukuba pamo, ukukanakwata indalama sha ku cipatala, nelyo nga baya ku cipatala ukukanabatangata bwino, ici calilenga ubupusano bwaba pa bapiina na bakankaala bwamwenekesha.
Bushe kukaba inshita ilyo imikalile ya bantu ikalingana? Ee. Baibolo yalilondolola ifyo Lesa akacita pa kupwisha amafya abantu bakwata.
Lesa akapwisha amafya ya mikalile
Ubwafya: Imitekele ya bantunse yalifilwa ukupeela abantu bonse ifyo bakabila mu bumi.
Ifyo Lesa akacita: Lesa akafumyapo amabuteko ya bantunse pano isonde no kubikapo Ubufumu bwakwe. Ubu Bufumu bukabela ku muulu lelo bukalateka pano isonde.—Daniele 2:44; Mateo 6:10.
Ifisuma ifikafumamo: Apo Ubufumu bwa kwa Lesa e bukalateeka isonde lyonse, bukalenga ifintu ukuwama pe sonde. Abantu tabakabale ababa abapiina nelyo ukusakamana ukuti bushiku bumo nalimo tabakakwate ifyo bakabila mu bumi. (Amalumbo 9:7-9, 18) Lelo bakalaipakisha ifyo bakulakwata mu kubombesha kwabo, kabili bakulaba ne nsansa pamo ne ndupwa shabo. Baibolo yalilaya ukuti: “Kabili bakakuula amayanda no kwikalamo; bakalima na mabala ya myangashi no kulya ifisabo fya yako. Tabakakuule amayanda e lyo bambi bakekalemo; tabakalime amabala e lyo bambi bakalye ifisabo.”—Esaya 65:21, 22.
Ubwafya: Tapali ifyo abantu bengacita pa kuti kwilaba ifingalenga baba na mafya nelyo ifingalenga bakwata fyonse ifyo bakabila.
Ifyo Lesa akacita: Lesa akabomfya Ubufumu bwakwe ukufumyapo ifilenga abantu ukulaikala mwenso mwenso no kumfwa ukuti tabacingililwa.
Ifisuma ifikafumamo: Ilyo Ubufumu bwa kwa Lesa bukalateeka, takwakabe ifikalalenga abantu ukukanakwata ifyo bakabila nelyo ifyo indupwa shabo shikabila. Ku ca kumwenako, takwakabe inkondo, ifipowe, e lyo ne fikuko. (Amalumbo 46:9; 72:16; Esaya 33:24) Lesa alanda ukuti: “Abantu bandi bakekala mu cifulo ca mutende na mu ncende ishacingililwa ne ncende sha kutuushishamo ishaba tondolo.”—Esaya 32:18.
Ubwafya: Ilingi line abantu balabapita pa mano ku bantu abaitemwa kabili abafunushi.
Ifyo Lesa akacita: Abakalatekwa no Bufumu bwa kwa Lesa, bakasambilila ukutemwa abantu nga fintu baitemwa abene.—Mateo 22:37-39.
Ifisuma ifikafumamo: Ilyo Ubufumu bwa kwa Lesa bukalateka bonse bakalanga ukutemwa uko Lesa akwata, umushaba “ukucita ifya kuisekesha.” (1 Abena Korinti 13:4, 5) Baibolo itila: ‘Tabakacite ububi nangu ubonaushi monse mu lupili lwandi ulwa mushilo; pantu isonde likesulamo ukwishiba Yehovaa filya amenshi yaisula muli bemba.’—Esaya 11:9.
Baibolo ilondolola ukuti, tuleikala mu nshiku sha kulekelesha kabili nomba line Lesa akafikilisha ifyo alaya, e kutila ukufumyapo ifilenga abantu balebulisha ifyo bakabila mu mikalile.b (Amalumbo 12:5) Na pali ino nshita ine, amashinte ya mafunde aya mu Baibolo kuti yamwafwa ilyo muli na mafya mu fya ndalama. Ku ca kumwenako, moneni icipande citila “Ifya Kucita pa Kuti Mulebomfya fye Indalama Ishinono Isho Mukwata” na “Bushe Caliba fye Bwino Ukutemwisha Indalama?”
a Baibolo itila ishina lya kwa Lesa ni Yehova.—Amalumbo 83:18.
b Pa kuti mwishibe umulandu mwingacetekela Baibolo, moneni icipande citila “Baibolo Citabo umo Twingasanga Icine ico Twingacetekela.”