Ifintu Nafinina Umutengo mwi Sonde Lyonse—Finshi Baibolo Yalandapo?

Muli lipoti ya mu June 2022 iya kabungwe ka World Bank Group, umukalamba wa aka kabungwe alandile ukuti: “Ubunonshi bwa calo nabubipilako na kabili. Uno muku imitengo ya fintu ileilako fye pa muulu, pa nshita imo ine abantu balekwata fye indalama ishinono.”

Akabungwe ka International Monetary Fund kalandile akati: “Umutengo wa mafuta ne fya kulya naunina sana, kabili ababa mu fyalo ifipiina e baleculilamo sana.”

Baibolo ilalenga twaishiba ico imitengo ya fintu ileilako fye pa muulu, ifyo twingacitapo, e lyo ne fyo ubu ubwafya bukapwa ku ntanshi.

Imitengo ya fintu iilako fye pa muulu mu “nshiku sha kulekelesha”

• Baibolo ita shino nshiku twikalamo ukuti “inshiku sha kulekelesha.”—2 Timote 3:1.

• Yesu alandile ati “ifya kutiinya” fikalacitika muli shino nshiku. (Luka 21:11) Ifintu nga fyanina sana umutengo abantu balatiina. Balasakamikwa pa fyo ifintu fikaba ku ntanshi ne fyo bakalacita pa kufwaila ulupwa lwabo ifyo lukalakabila.

• Baibolo mwi buuku lya Ukusokolola yalisobele ukuti umutengo wa fya kulya wali no kulanininako muli shino nshiku. Itila: “Naumfwile icaleumfwika nge shiwi. . . . Calandile aciti, ‘Icipimo cimo ica ngano nelyo ifipimo fitatu ifya barle bakafishita mu malipilo ya pa bushiku bumo.’”—Ukusokolola 6:6, Baibolo ya Easy-to-Read Version.

Pa kuti mwishibilepo na fimbi pa “nshiku sha kulekelesha” na pa busesemo bwaba mwi buuku lya Ukusokolola, tambeni vidio itila Ifintu mu Calo Fyalyaluka Ukutula mu 1914 kabili belengeni ne cipande citila “Bushe Abaume Bane Abanina Pali Bakabalwe ni Bani?”

Ifyo amafya yonse ayo abantu bakwata pa mulanda wa kukanakwata indalama yakapwa

• “Bakakuula amayanda no kwikalamo; bakalima na mabala ya myangashi no kulya ifisabo fya yako. Tabakakuule amayanda e lyo bambi bakekalemo; tabakalime amabala e lyo bambi bakalye ifisabo.”—Esaya 65:21, 22.

• “Ingano shikafula nga nshi pano isonde; pa muulu wa mpili shikafula icine cine.”—Amalumbo 72:16.

• “‘Pa mulandu wa kupokolola abacula, pa mulandu wa kuteta kwa bapiina, uno muku wena ndeima,’ e fyasosa Yehova.”—Amalumbo 12:5.a

Nomba line fye Lesa ali no kufumyapo amafya ayo abantu bakwata pa mulandu wa kukanakwata indalama. Akapwisha aya amafya mwi sonde fye lyonse. Pa kuti mwishibe ifyo akacita pa kuyapwisha, belengeni icipande citila “Bushe Kukabala Akuba Inshita Ilyo Imikalile Ya Bantu Bonse Ikalingana?”

Na muno nshiku mwine, Baibolo kuti yalenga mwaishiba ifya kucita ifi imitengo ya fintu ileilako pa muulu. Finshi yalanda ifingamwafwa? Baibolo yalilanda pa fyo mwingalabomfya bwino indalama. (Amapinda 23:4, 5; Lukala Milandu 7:12) Pa kuti mwishibilepo na fimbi, belengeni icipande citila “Mulecingilila Ifyo Mwakwata” ne citila “Ifya Kucita pa Kuti Mulebomfya fye Indalama Ishinono Isho Mukwata.”