Kulekaba Sana mwi Sonde Lyonse—Finshi Baibolo Yalandapo?

Mu July 2022, lipoti yalangilile ukuti mwi sonde lyonse kwalikaba ukucila mu cipimo:

• “Pa miku ibili muli uno mweshi, abalashi babuteko mu China balisoka abantu ukuti mu misumba ukucila pali 70 muli no kukaba icine cine.”—July 25, 2022, CNN Wire Service.

• “Pa mulandu wa kuti mu Bulaya monse ilingi line mulakaba sana, mu fyalo ifingi mulaba umulilo wa mpanga.”—July 17, 2022, The Guardian.

• “Pa Mulungu, mu misumba iingi mu United States mulekaba sana ukucila kale lyonse, ilyo icikabilila caenda ukufuma ku lulamba lwabela ku kabanga na mu ncende shimo isha ku kapinda ka ku kulyo na pa kati ka masamba.”—July 24, 2022, The New York Times.

Ni mwi umo ifi fyonse fyalola? Bushe ifintu fikabipa sana pano isonde ica kuti cikafye ifya mweo ukutwalilila ukubako? Finshi Baibolo ilanda?

Bushe ifi kulekaba sana filefikilisha ubusesemo bwa mu Baibolo?

Ee. Ifi kulekaba sana mwi sonde lyonse filefikilisha ifyo Baibolo yasobele ukuti e fikalacitika muno nshiku. Ku ca kumwenako, Yesu asobele ukuti kukaba “ifya kutiinya.” (Luka 21:11) Pa mulandu wa kuti kulekaba sana mwi sonde lyonse, abantu abengi baletiina ukuti ifyo abantu bacita fili no kulenga cikafye ukwila pano isonde.

Bushe Isonde likafika apa kuti tukalafilwa no kwikalamo?

Awe. Lesa apangile isonde ukuti abantu bakaleikalamo umuyayaya. (Amalumbo 115:16; Lukala Milandu 1:4) Takasuminishe abantu ukulyonaula, lelo “akonaula abaleonaula isonde,” nga fintu atulaya.—Ukusokolola 11:18.

Moneni amasesemo yabili ayalanga na fimbi ifyo Lesa atulaya:

• “Amatololo ne mpanga yauma fikasekelela, kabili iciswebebe cikasansamuka no kubalula nga maluba ya ntongola.” (Esaya 35:1) Lesa takaleke isonde likabe iciswebebe ceka ceka umushingekala ifya mweo, lelo akawamya incende ishaonaika mwi sonde.

• “Mwalolesha pe sonde, pa kuti mulipeele ifingi; mwalicindamika nga nshi.” (Amalumbo 65:9) Lesa akalenga isonde ukuba paradaise.

Pa kuti mwishibilepo na fimbi pa fyo imiceele ileyaluka ifilefikilisha ifyo Baibolo yasobele, belengeni icipande citila “Ukwaluka kwa Miceele ne fyo Ikaba ku Ntanshi—Finshi Baibolo Yalandapo?.”

Pa kuti mwishibilepo na fimbi pa fyo Baibolo yalaya ukuti isonde likawama, belengeni icipande citila “Nani Uukapususha Isonde?”