Mu Mwaka wa 2022 Mwali Amafya Ayengi Nga Nshi—Finshi Baibo Yalandapo?

Mu mwaka wa 2022, twaleumfwa sana amalyashi pa nkondo, ukwafya kwa mikalile, e lyo na masanso ayalecitika pa mulandu ne fyabumbwa. Ni Baibo fye e yalondolola umulandu ifi fyonse filecitikila.

Icalengele ukuti ifyacitike mu 2022 ficitike

Ifyacitike muli uyu mwaka wapwile nafilenga camonekesha ukuti tuleikala mu nshita iyo Baibo ita ukuti “inshiku sha kulekelesha.” (2 Timote 3:1) Inshiku sha kulekelesha shatendeke mu 1914. Moneni ifyo ifyacitike nomba line filefikilisha ifyo Baibo yasobele ukuti e fikalacitika muno nshiku:

“Inkondo.”—Mateo 24:6.

• ‘Mu 2022 e mwaka ifyalo fya ku bulaya na kabili fyakwetepo amafya ayakalamba nga nshi pa mulandu wa nkondo.’a

“Ifipowe.”—Mateo 24:7.

• ‘Mu mwaka wa 2022 mwali ifipowe ifyabipa icine cine.’b

“Ifikuko.”—Luka 21:11.

• “Ubulwele bwa Polio bwalitendeke na kabili. Ubulwele beta ukuti monkipoksi (monkeypox) nabo bwalicushishe abantu sana, kabili icikuko ca COVID-19 naco calitwalilile ukucusha abantu. Ifi fyonse fyalilangile apabuta tuutu ifyo amalwele ayambukila yabipa ne fyo abantunse bashacingililwa.”c

“Ifya kutiinya.”—Luka 21:11.

• “Ifintu pamo nga ukukabisha kwa miceele, ifilala, umulilo wa mpanga, na ba mulamba fyalileta sana ubonaushi mu mwaka wa 2022, kabili fyalipeye abantu abengi nga nshi no kulenga abantu abengi mwi sonde lyonse bashala ukwabula amayanda.”d

“Ifimfulunganya.”—Luka 21:9.

• “Apo abantu balifulilwe sana pa mulandu wa kuti imikalile yalyafishe icine cine, na pa fyo imitengo ya fintu yalenininako fye, abantu balimine no kulailishanya ku mabuteko mu misebo. Mu mwaka wa 2022 emo abantu bailishenye sana mu misebo ukucila kale lyonse.”e

Finshi fikacitika mu mwaka uleisa?

Tapali umuntu nangu umo uwingeshiba ifikacitika mu 2023. Ico twaishiba ca kuti nomba line Ubufumu bwa kwa Lesa nelyo ubuteko bwa ku muulu buli no kwalula ifintu pano isonde. (Daniele 2:44) Ubu ubuteko bukafumyapo fyonse ifilenga abantu balecula kabili bukashininkisha ukuti ukufwaya kwa kwa Lesa kwacitwa pano isonde.—Mateo 6:9, 10.

Tulemukoselesha ukulakonka amashiwi ya kwa Yesu Kristu no ‘kulalola’ pa kuti mulemona ifyo ifilecitika filefikilisha amasesemo ya mu Baibo. (Marko 13:37) Tutumineni nga mulefwaya ukusambilila na fimbi pa fyo Baibo ingamwafwa pali ino nshita, ne fyo ingalenga imwe na balupwa lwenu mwaba ne subilo lya cine cine ilya kuti ifintu ku ntanshi fikawama.